Mat 12
12
Fwala tä n'ot'elakw'et ichufwi Hin'o Lhäs len'ohyaj
(Mar 2.23-28; Luc 6.1-5)
1Häp fwala tä n'ot'elakw'et p'ante, Jesús lhäy'e lechufwenkay ilunche yachuyaj. Wet lechufwenkay nichuyuhen, wet iwo tesa tä itonhiche trigo lhay tä kamaj lakonkay wet tufw. 2Mat tä Fariseo lhayis hiw'en, tahuyej Jesús tä yok:
–Lhek yahinya achufwenkay, lhamel iwoye m'ak tä tek õ'wahnej elh che iwoye häp fwala tä n'ot'elakw'et.
3Mat lham yok:
–¿Hä leyahyenhit'a m'ak tä David iwoye p'ante? Iche p'ante fwala tä lham lhäy'e let'unfwas nichuyuhen, 4wet tä lham tiyäjchufwi p'ante Dios Lew'et, tufw t'at pan tä õyen t'amajchetesayej Dios,#1~Sam 21.1-6 häp m'ak tä tek õ'wahnej p'ante che lham, wok let'unfwas, wok elh che häpek tufw, mat tajlhamat iyhäj tä sacerdotes tä õ'wahnej.#Lev 24.5-9 5¿Wok hä leyahyenhit'a Ley p'ante tälhe Moisés tä yäme häp sacerdotes, tä tej tä nileyayej lechumet tä ihi Dios Lew'et häp fwala tä n'ot'elakw'et, mat letes ihihit'a?#Núm 28.9-10 6Wet ofwen amhohen, ikana m'ak tä inu'pe Dios Lew'et. 7N'äl tä lehanhiyejt'a m'ak tä häpe Dios lhämet p'ante yok,
“A'enay hap'altsentsesa, häp tä owatlä.
Tek owatlä itshätäy tä lelänhen
tä lhen han'okhayaja n'oyej.”#Oseas 6.6
Che lehanhiyej, tek letihiyej letes häp lhamel tä laj letesa. 8Tsi fwala tä n'ot'elakw'et ichufwi Hin'o Lhäs len'ohyaj.
Jesús ichesat hin'o tä takwech'o tamchäy
(Mar 3.1-6; Luc 6.6-11)
9Jesús yikch'oye täja wet ihochufwi n'ohusew'et, 10wet iche hin'o tä takwech'o tamchäy. Wet tä Fariseo lhayis t'ukwe m'ak che yen tesayej Jesús, häp tä lhamel tay'ätshaneje tä yok:
–¿Hä õ'wahnej che õ'chesat t'inhayaj länek häp fwala tä n'ot'elakw'et? 11Jesús nichulho wet yok:
–¿Atsi elh amel tä lelä tson'ataj ihi, wet che nichäte chowej häp fwala tä n'ot'elakw'et, hä nekaye yämlek tachuma wet itonphä?#Luc 14.5 12Wet tä hin'o laha lhäy'e lhip tä inu'pe tson'ataj, tä mälhyejtso, õ'wahnej t'at che õ'woyeje n'oelh m'ak tä is häp fwala tä n'ot'elakw'et.
13Wet nech'e tahuyej hin'o tä takwey tamchäy wet yok:
–Piyen akwey.
Wet hin'o ipiyen takwey wet iches, nech'e hätet iwoye elh. 14Mat tä Fariseo lhayis inukwephä, wet iwo lehuseya'pe m'ak che fwetaj iwoyeje Jesús yämlek ilän.
Dios Lakawo tä tatshupiye häpe Jesús
15Tä Jesús ihanej tä Fariseo lhayis iwo huseya'pe, yikch'oye täjtso, wet wujpe wichi tä ihän. Wet ichesthen nilhokej, 16wet yäm äytajche lhämet tä ifwenho lhamel tä yok:
–¡Yej lhenay ämetan'o!
17Täjtso, lhayäm matche Dios lhämet p'ante profeta Isaías yen silätyaja tä yok:
18“Lhek yahinya okawo tä ottshupiye,
ohumnek wet ohusek akäjejlhi.
Otihla'pe oka Espíritu,
wet iwohla silätayej nilhokej wichi tä i'pe honhat
häp m'ak tä is alhoho.
19Tek inokwajiyejlhila elh che häpe,
wet tek ifwitsenhiyeja lhämet tä iwoye,
wet tä ilunlhi yämhit'ala äytaji lechos.
20Inäk'äsit'ala kanohi tä ipofwokwe,
wet nitäyijlhahiyela n'ochäkw tä eyte y'omhi.
Tujlhahichela pajla'tha m'ak tä is alhoho
ikalhi m'ak tä ni'isa,
21wet nilhokej wichi tä i'pe honhat
itihiyeja leniwhayaj.”#Isa 42.1-4
Õyäme tä Satanás lakhajyhayaj tä iyej Jesús
(Mar 3.20-30; Luc 11.14-23)
22Õ'häne Jesús ahät länek tä asnam wet isuk. Wet Jesús ichesat, wet hin'o nech'e tahuy wet hiw'enche honhat. 23Wet wichi lhäy'e lhip tä iseltejen wet yok:
–Elat häpe N'ofwayhthi tä Dios Chenek p'iya, David Lhäs.
24Tä Fariseo lhayis iläte wichi, wet yok:
–Beelzebú tä ahät lhayis kaniyat, häp tä hiw'enho lakhajyhayaj yämthilek inuhatchephä ahät lhayis.#Mat 9.34; 10.25
25Mat Jesús nitäfwelej lhamel letichunhayaj, wet yok:
–Häp honhat che häpe, che lhaich'esaj n'oniyatyaj tä ihi, tatay lahilä, wet noj t'at. Wet che wichi tä lhalew'et lheley lhaiw'enhathen, nofwila. 26Wet che häpe Satanás tä ichenphä Satanás, n'äl tä lhaiw'enhat, wet nemla niyat. 27Wet tä amel lhämaye tä onuhtejchephä ahät lhayis lhamel laka niyat Beelzebú, che mälhyejtso, ¿atsi tä hiw'enhomche lakhajyhayaj häp iyhäj amel tä inuhatchephä ahät lhayis? Oyok, amel aiyhäjtso hin'älit tä lewetahen t'at, mathichet'a ämtes. 28Mat tä häpe Dios laka Espíritu tä onuhtejchephä ahät lhayis, n'äl tä Dios Niyatyaj näm amehen.
29“Lhek tetshan olhämet, ¿chip lhaiwoyneje hin'o che tiyäjchufwi elh tä takhajay lewukwe yämthilek isoyej m'ak tä iyej, che nichunkata tä inayhit lhamtso? Mat che ichunkat tä inayhit, nech'e häpkhilek ihanej tä isolhi.
30“Elh che newa n'oyej häpe t'at otayhfwa, wet elh che nitch'ota n'oye tä ohutwek wichi, häpe t'at elh tä itsatkatpe honhat.
31“Wet häp tä ofwel amhohen tä oyok, Dios itäyhthiyeja letes häp wichi nilhokej lesukyajay lhäy'e lhämtes tä ni'isachehen tä isitäynej lham. Mat tek itäyhthiyeja letes häp elh che isitäynej lhämtes tä ni'isachehen häp Espíritu tä T'amajchet. 32Itäyhthiyeja letes elh che häpe che itayejlä lhämet häp Hin'o Lhäs. Mat elh che itayejlä lhämet häp Espíritu tä T'amajchet, lham letes tatäyhit'a athana wet yämthilek tiyäj'attsiy.
33“Häp hal'ä tä is, isen t'at lhay. Häp hal'ä tä ni'isa, isihent'a lhay. Tsi hal'ä che häpe, lhay t'at tä ikalelhät. 34¡A'amlhäs t'at! ¿Chip iwoyek lhämaye m'ayhay tä isen tä ahäpehen iyhäj tä ni'isahen? Häp m'ak tä tapoyej hin'o lehusek, häpe t'at tä tälhche lak'aj tä yämlhi. 35Hin'o tä is yäme t'at m'ayhay tä isen, tsi m'ak tä is ihi t'at lehusek. Wet häp hin'o tä ni'isa yäme t'at m'ayhay tä ni'isachehen, tsi m'ak tä ni'isa ihi t'at lehusek. 36Ofwel amhohen, che nichäthiyela Fwala tä N'okalelhthayaj, Dios itetshanhiyeja nilhokej wichi häp lhämtes tä ni'isachehen tä iwoye. 37Tsi ämtes häpkhilek tamen amej che Dios itäyhat ates wok nitäyhata.”
Õt'alheje Jesús häp n'otetnek
(Mar 8.11-12; Luc 11.29-32)
38Elhpej Fariseo lhayis lhäy'e hin'ol tä lhayen lewosayej Ley p'ante tälhe Moisés, tahuyej Jesús wet yok:
–Maestro, olhamel ot'uhläk ow'en n'otetnek che lhenlhi n'oho.
39Mat Jesús nichulho wet yok:
–¡Wichi tä ihi fwalasna lhäy'e lhip tä ni'isahen wet ileyej m'ak tä is alhoho! T'alhch'oye n'otetnek, mat naya t'at n'otetnek tä häpe profeta Jonás p'ante. 40Tsi mälhyej tä Jonás ihi p'ante w'ahat tä wujche lets'e fwalas tres lhäy'e honatsis tres,#Jonás 1.17 wet häte Hin'o Lhäs õ'thathihola honhat fwalas tres lhäy'e honatsis tres. 41Wet che Fwala tä N'okalelhthayaj, wichi tä ihi hupuy tä Nínive p'ante nehiphäla wet itihiyeja letes wichi tä iche fwalasna. Tsi Nínive lheley iwo p'ante lehusey iyhäja tä iläte Jonás lhämet.#Jonás 3.5 ¡Wet lhek yahinya, ikana m'ak tä inu'pe Jonás p'ante! 42Häte che Fwala tä N'okalelhthayaj, häp niyat tsinha p'ante tälh tapinhiye nehiphäla wet itihiyeja letes wichi tä iche fwalasna. Tsi tej tä lhäy'e lhip tä tofwe lew'et niyat tsinhatso, mat ihoye p'ante Salomón yämthilek tach'ahuye lehanyaj.#1~Rey 10.1-10 ¡Wet lhek yahinya, ikana m'ak tä inu'pe Salomón p'ante!
Ahät che tapinho lew'et tä pajche
(Luc 11.24-26)
43“Che ahät inuphä tä tälho hin'o, yik tä ilunche ts'anis, t'ukwe lew'et yämthilek iwo t'elakw'eta. Mat tä nilhokaye, yok, 44Oyäpnhiyela ow'etnaj otälho. Tä tapile, hiw'en tä hin'o hätet iwoye hup tä õ'sekchufwi, wak'alh t'at, wet najit lheleya. 45Tä mälhyejtso, chunkat tä yik, t'ukwe ayej iyhäj tä ihi siete tä hich'atej tä ni'isahen, wet nech'e lhamel tiyäjo häp hin'o wet yen lew'eta, wet nem koyhyaj lewit'äy, inu'pe tä ichun. Wet häp tä mälhhiyejattso lewit'äy häp wichi tä ni'isahen tä ihi fwalasna.”
Jesús lech'inhis lhäy'e lako
(Mar 3.31-35; Luc 8.19-21)
46Tä kamaj Jesús yämhoplhi wichi, nämhen lech'inhis lhäy'e lako María wet takasit alhoye, t'uhläk tahuyej. 47Wet iche elh tä ifwenho Jesús tä yok:
–Ako lhäy'e hach'inhis i'alhoye, t'uhläk tahuy amej.
48Mat Jesús nichulho lham wet yok:
–¿Atsi tä häpe oko, wet atsi tä häpe och'inhis?
49Wet tapäye lechufwenkay wet yok:
–Lhamelni häp tä oko wet och'inhis. 50Tsi elh at che häpe che iwoye Ojcha tä ihi pule lenech'ethayaj, häp tä och'inij, wet och'inhä, wet oko.
Currently Selected:
Mat 12: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
