Luc 11

Jesús ichufwenej lechufwenkay chik iwo t'alhyaja

(Mat 6.9-13)

1Fwala elh p'ante Jesús ihi lhip tä ihoye wet iwo t'alhyaja. Tä ileyej t'alhyaj tä iwoye, lechufwenkay elh tahuyej wet yok:

–Iwuk, chufwen n'oyejen chik owo ot'alhyaja, mälhyej tä Juan Bautista ichufwenejen p'ante lechufwenkay.

2Jesús nichulho wet yok:

–Chik lewoyay alhyaja, oyaykwe,

“Ijcha, is chik õyen t'amajcheta ey.

Is chik Aniyatyaj in'oyejen.

3W'en n'ohomche olhäk fwalapej,

4Täyhat n'oyejen och'isukyajay,

tsi häte olhamel otäyhtejen letes

elhpej tä iwoyej n'oyehen m'ak tä ni'isa.

Yej ch'anlhaye chik ikalh n'ohiche n'olhelhtshayaj.”

Yej t'elej tä lewo alhyaja

5Wet Jesús äp yok:

–Chik iche elh amel tä akalay'i ihi, wet lehoye lew'et tä honaj chowej wet letahuyej tä lhok, “Yaelh, cheyjänhat ayej n'oyej tres pan, 6tsi olham okalay'i nech'efwaj tä näm wet niwohit m'akfwaj chik in'oyej chik ow'enho.”

7“Wet akalay'i nichulh amho tä tum lewukwech'oye wet yok, Yej lhaklitn'o, pajche op'ohi lepe, athana olham lhäy'e oles omähen t'at. Okalhihit'a chik onephä wet ow'en amho m'ak tä let'alhe.

8“Mat olham oyok, tej chik aknip'altsena tä ahäpe lakalay'i, mat chik letujlhache tä let'alhe, nehiphäla wet hiw'enla amho nilhokej m'ak tä lewatlä. 9Tä mälhyejtso, ofwel amhohen, oyok, Alheje Dios m'ak tä lewatlä wet hiw'enla amhohen. Ukwe wet lew'enla. Änch'oye Dios wet ifwoynhila ahilähen. 10Tsi elh chik t'alhch'oye ikatej t'at, wet elh chik t'ukwe hiw'en t'at, wet elh chik t'änch'oye Dios, Dios ifwoynhilahlä.

11“¿Wok iche p'iya elh amel tä leles ihi, wet chik lhäs t'alheje w'ahat, wet hiw'enho amlhäj, 12wok t'alheje ho'o lhich'u, wet hiw'enho chitsom? 13Lhek yahinya amel tä akni'isahen, mat lehanej tä lew'enho ales m'ak tä isen. ¿Wet chiwoye Ajchayay tä ipuleye? ¡Nemla koyhyaj tä lham hiw'enho Espíritu tä T'amajchet häp lhamel tä t'alheje!”#Mat 7.7-11; Juan 14.13-14; 15.7,16; 16.23-24; 1~Juan 3.21-22; 5.14-15

Õyäme tä Satanás lakhajyhayaj tä iyej Jesús

(Mat 12.22-30; Mar 3.20-27)

14Jesús inuhatphä ahät tä yen isuka hin'o, wet tä ahät inuphä hin'o nech'e tahuy. Wet wichi wuj tä iseltejen, 15mat iche iyhäj tä yok,

–Beelzebú tä ahät lhayis kaniyat, häp tä hiw'enho lakhajyhayaj yämthilek inuhatchephä ahät lhayis.#Mat 9.34; 10.25

16Iyhäj fwetaj ikanej Jesús wet yok:

–Lhek enlhi n'ohohen n'otetnek häpkhilek n'äl chik akhajyhayaj tälhe Dios.

17Mat Jesús nitäfwelej lhamel letichunhayaj, wet yok:

–Häp honhat chik häpe, chik lhaich'esaj n'oniyatyaj tä ihi, tatay lahilä, wet tatäy t'at. Wet chik wichi tä lhalew'et lheley lhaiw'enhathen, noj t'at. 18Wet häp tä mälhyej'attso, chik Satanás lhaiw'enhat wet tatayhlä ahät lhayis, nemla niyat. Ofwel amhohen täjtso, häp tä amel lhämaye tä onuhtejchephä ahät lhayis lhamel laka niyat Beelzebú lakhajyhayaj. 19Mat chik mälhyej tä lhämayetso, ¿atsi tä hiw'enhomche lakhajyhayaj häp iyhäj amel tä inuhatchephä ahät lhayis? Oyok, amel aiyhäjtso hin'älit tä lewetahen t'at, mathichet'a ämtes. 20Mat tä häpe Dios lakhajyhayaj tä onuhtejchephä ahät lhayis, n'äl tä Dios Niyatyaj näm amehen.

21“Lhek tetshan olhämet, chik hin'o tä khajay lhäy'e tä wuj laka'tshayajchal tä iyej, t'uye lew'et, wet m'ak tä ihi lewit'äy ihihit'a. 22Mat chik näm elh tä lakhajyhayaj inu'pe wet ikalhi, isoyej laka'tshayajchal tä iyej tä t'ekhaye, lhäy'e m'ayhay tä lhayen lewuka, wet hiw'enhomche iyhäj.

23“Elh chik newa n'oyej häpe t'at otayhfwa, wet elh chik nitch'ota n'oye tä ohutwek wichi, häpe t'at elh tä itsatkatpe honhat.

Ahät chik tapinho lew'et tä pajche

(Mat 12.43-45)

24“Chik ahät inuphä tä tälho hin'o, yik tä ilunche ts'anis, t'ukwe lew'et yämlek iwo t'elakw'eta. Mat tä nilhokaye, yok, Oyäpnhiyela ow'etnaj otälho. 25Tä tapile, hiw'en tä hin'o hätet iwoye hup tä õ'sekchufwi, wak'alh t'at. 26Tä mälhyejtso, chunkat tä yik, t'ukwe ayej iyhäj tä ihi siete tä hich'atej tä ni'isahen, wet nech'e lhamel tiyäjo häp hin'o wet yen lew'eta, wet nem koyhyaj lewit'äy, inu'pe tä ichun.”

Dios lakäpfwayaj tä is iyej lhamel tä iwoye lhämet

27Tä Jesús yäme m'ayhaytso, iche atsinha tä iyej wichi, ifwitsenej tä t'än wet yok:

–¡Dios lakäpfwayaj tä is iyej atsinha tä takapuhtshan amej wet aichihelit!

28Jesús nichulho wet yok:

–¡Lhäy'e lhip tä Dios lakäpfwayaj tä is iyej lhamel tä tach'ahuye lhämet wet iwoye!

Õt'alheje Jesús häp n'otetnek

(Mat 12.38-42; Mar 8.11-12)

29Wichi kamaj tujlhache t'at tä lhaihute Jesús, wet lham tahuyej lhamel wet yok:

–Wichi tä ihi fwalasna lhäy'e lhip tä ni'isahen. T'alhch'oye n'otetnek,#Luc 11.16 mat naya t'at n'otetnek tä häpe Jonás p'ante. 30Tsi mälhyej tä Jonás häpe t'at n'otetnek yämlek wichi tä ihi p'ante hupuy tä Nínive hiw'en, häte mälhhiyejattso Hin'o Lhäs, häpkhilek wichi tä ihi fwalasna hiw'en. 31Wet chik Fwala tä N'okalelhthayaj, häp niyat tsinha p'ante tälh tapinhiye nehiphäla wet itihiyeja letes wichi tä iche fwalasna. Tsi tej tä lhäy'e lhip tä tofwe lew'et niyat tsinhatso, mat ihoye p'ante Salomón yämlek tach'ahuye lehanyaj.#1~Rey 10.1-10 ¡Wet lhek yahinya, ikana m'ak tä inu'pe Salomón p'ante! 32Häte chik Fwala tä N'okalelhthayaj, wichi tä ihi Nínive p'ante nehiphäla wet itihiyeja letes wichi tä iche fwalasna. Tsi Nínive lheley iwo p'ante lehusey iyhäja tä iläte Jonás lhämet.#Jonás 3.5 ¡Wet lhek yahinya, ikana m'ak tä inu'pe Jonás p'ante!

N'ot'isan lechäkw

(Mat 5.15; 6.22-23; Mar 4.21; Luc 8.16)

33“Nehit katsik iwun lechäkw wet iskat, wok itichufwi m'ak chik hip'oyejpe, mat itonitphä yämlek lhamel tä ihochufwi lew'et hiw'enchehen honhat. 34Häp asan lechäkw häpe t'at atelhoy, wet chik isen, häte imälhewek asan ihi isi. Mat chik ni'isahen atelhoy, imälhewek asan ihi honatsi. 35Tä mälhyejtso, atetshan häpkhilek isi tä i'amhi kahäpeya honatsi. 36Tsi chik imälhewek asan tä isi iyej wet honatsi ihit'a amhi, lew'enla nilhokej m'ayhay, mälhyej tä n'ochäkw ihutun atape.”

Jesús yen tesayej Fariseo lhayis lhäy'e hin'ol tä lhayen lewosayej Ley p'ante tälhe Moisés

(Mat 23.1-36; Mar 12.38-40; Luc 20.45-47)

37Tä Jesús ileyej tä yämlhi, iche Fariseo tä t'äne yämlek ihoye lew'et wet tachufwiyej tä t'ek. Wet Jesús yikche t'at, tä nichäte Fariseo lew'et, ihochufwi wet ihowhäye mesa. 38Mat Fariseotso wuj tä iseltej tä hiw'en tä Jesús niwoyaye häp n'okey tä hin'o ilejchehen ayej lefwus tä kamaj nit'eka.#Mar 7.1-9 39Mat Lhawuk tahuyej wet yok:

–Amel Fariseo lhayis lelejaywethä tä tumphä häp äthis lhäy'e äkhis, mat ilech'oye amel tapo amejen etanyajay lhäy'e m'ak tä ni'isachehen. 40¡Ach'isukwis! ¿Hä lehanhiyejt'a tä Elh tä yenlhi m'ak tä tumphä häte hip'ajtej t'at tä tum lech'oye? 41Lhek tetshan olhämet, chik lewo t'awayhtesa iyhäj, is chik häpe t'at m'ak tä tälho ahusek tä is, häpkhilek isen t'at nilhokej m'ak tä lewoyaye.

42“¡Awit'äy ihla amejen, Fariseo lhayis! Tsi tej tä lelemsas m'ayhay, mat lew'enhatay lhip tä tälhe, mälhyej hal'ä w'oley tä n'olhäk, wet lhenay aka diezmoya yämlek lew'enho Dios.#Lev 27.30 Mat tek lewoyeje iyhäj m'ak tä is alhoho wet lehuminhit'a häp Dios. Mat olham oyok, Woyeje t'at iyhäj m'ak tä is alhoho wet huminay t'at häp Dios, tsi tähestso häp tä laha ihi. Wet yej leyej tä lhenlhi diezmo lhäy'e m'ayhay iyhäj tä isen.

43“¡Awit'äy ihla amejen, Fariseo lhayis! Tsi tä lhehiche n'ohusew'etes, lehuminaypej n'ow'etes tä let'uhläk nilhokej wichi ahiw'en. Wet tä lhehiche hup kawayhil, let'upejläk wichi n'okwi amejen tä hiw'en ahilä wet iti amejen awujyaj.

44“¡Awit'äy ihla amejen, Fariseo lhayis! Tsi ahätet iwoye n'op'itseyhay lehis tä nin'äla'pe, wet wichi t'äsche t'at wet nech'e kok'aye.”

45Wet iche elh häp hin'ol tä lhayen lewosayej Ley p'ante tälhe Moisés, tä iläte Jesús lhämtesna wet yok:

–Maestro, tä lewoynejetso ämet, häte lelätyenejwethä olhamel.

46Jesús nichulho wet yok:

–¡Häte amel tä alewos Ley p'ante tälhe Moisés, awit'äy ihla amejen! Tsi lelhuhyenejen iyhäj häp lelhuy tä choyhthen tä nehit katsik ikalhi chik yikchufwi, wok oyok, achufwenyajay tä nehit katsik ikalhi chik iwoye. Wet amel tek lech'otyeneje afwuj yämlek leneyhatphä.

47“¡Awit'äy ihla amejen tä lhenwethä lep'itseyhay lehis häp profetas p'ante atetsel ilänhen! 48Tsi tä lewoyaye täjtso, kalelhäj tä lehuminache t'at m'ak tä atetsel p'ante iwoye tä lhamel ilänhen profetas, wet amel lhenwethä lehis lep'itseyhay.

49“Mat Dios pajche ihanej t'at täjtso, wet lhämet yop'antekwe, Ochenhiyela profetas lhäy'e apóstoles, wet lhamel ilänhihena elhpej wet itihiyeja laka'tshayaj iyhäj. 50Wet täjtso, Dios yenla tesayej wichi tä ihi fwalasna häp profetas tä õ'länhen tälhe täjp'ante lham yenlhi honhat, 51tälhe Abel#Gén 4.8 yäk nichäte Zacarías#2~Crón 24.20-21 tä õ'län p'ante tä ihi altar lhip tä tumejlä Dios Lewukwech'o Elh tä N'ot'amajchet. Matche tä ofwel amhohen, Dios yenla tesayej wichi tä ihi fwalasna häp nilhokej lhameltso t'ilek p'ante.

52“¡Awit'äy ihla amejen amel tä alewos Ley p'ante tälhe Moisés! Tsi lesoyej lecha häp lepe tä tataye n'otäfwnhayaj tä matche, wet lewahnhiyejt'a iyhäj tä t'uhläk tiyäjo, mat häte amel letiyäjihot'a.”

53Tä Jesús yikch'oye Fariseo lew'ettso, häp Fariseo lhayis lhäy'e hin'ol tä lhayen lewosayej Ley p'ante tälhe Moisés, lhamel wuj tä fwitses. Wet wujpe m'ayhay tä tay'ätshaneje Jesús, 54t'uhläk iläte lhämet chik lhamel fwetaj ni'isa yämlek iche m'ak chik yen tesayej.

Currently Selected:

Luc 11: WCHB

Highlight

Copy