Lev 8
8
Õyen t'amajchetesa Aarón lhäy'e leles
(Éx 29.1-9)
1Lhawuk tahuyej Moisés wet yok:
2–Chuma Aarón lhäy'e leles, wet äp chuma sacerdote lew'uyis lhäy'e aceite tä õ'tsäype m'ak chik õyen t'amajcheta. Wet äp chäj alhoho tolo lhäs tä õ'län tä õtiskanejpe n'och'isukyaj, lhäy'e häp täkwfwas tson'atas tä hin'ol, lhäy'e lehi tuskal tä õyenlhi tä pan tä levadura newayej ihi. 3Wet hutwek nilhokej Israel lhayis, wet is chik amel lhehi carpa tä owukwe lepe.
4Wet Moisés iwoye Lhawuk lhämet, t'änehen wichi wet lhamel lhaihuthiwek carpa tä Lhawuk lewukwe lepe. 5Wet Moisés tahuyej lhamel wet yok:
–Iche m'ak tä Lhawuk ne'tek õyenlhi.
6Wet Moisés t'äne häp Aarón lhäy'e leles. Wet lhamel ihoye wet lhailejwethä, mälhyej tä Moisés ne'tek iwoye. 7Wet nech'e äp Moisés tachuma sacerdote lakay'uche wet y'uyitche Aarón, wet yenlhi lakawak tä lakay'uche t'ak, hit'unthi. Wet äp ithatpe lew'uy elh, lhäy'e m'ak tä lhey efod, wet äp hit'unthi kawak tä efod t'ak. 8Wet ithatpe let'okwep'ot wet itihi lechal tä lhey Urim lhäy'e Tumim tä häpkhilek ihanej Dios lenech'ethayaj. 9Tä tajyäme täja, wet iti'pe lhetekp'ot. Wet äp tachuma oro lhip tä isilataj, wet iti'pe lhetekp'ot lhip tä i'pe letacho tä yen tetnekayej tä Aarón nech'e häpe Lhawuk t'amajchet. Moisés iwoynejatso, yenlhi t'at m'ak tä Lhawuk ne'tek yenlhi.
10Wet nech'e tachuma aceite tä õ'tsäype m'ak chik õyen t'amajcheta. Wet itsäype carpa tä Lhawuk lewukwe lhäy'e nilhokej m'ak tä ilech'oye, wet nech'e häpe m'ak tä n'ot'amajchet. 11Wet aceitetso kamaj häpe t'at tä itsäype siete veces häp altar, lhäy'e häp n'ochumetchal tä n'ot'amajchetes tä iyej, lhäy'e inät lehi wet lew'et tä õ'ti'pe tä õ'chumyenlhi. Wet häp tä yen t'amajchetesa nilhokej tähestso.
12Wet Moisés nech'e itsäype Aarón lhetek aceitetso tä hiw'enho len'ohyaj tä nech'e häpe sacerdote. 13Wet Moisés äp t'uhläk Aarón leles ihoye. Wet y'uyyenchehen lakay'uchelis, wet yenlhi häp lakawakay, wet itiche'pe lhetekp'otes, mälhyej Lhawuk lhämet tä ne'tek iwoye.
Õ'län itshätäy tä õyen Lhawuk t'amajchetesa häp Aarón lhäy'e leles tä nech'e häpe sacerdotes
(Éx 29.10-30)
14Wet Moisés nech'e t'alhe chik õ'tone tolo tä õtiskanejpe Aarón lech'isukyaj lhäy'e leles lech'isukyajay. Wet lhamel iti'pe takweyey tolo lhetek. 15Wet Moisés ilän tolo wet tachuma lew'oyis, y'uytho lefwuj, ilänej altar lech'ul tä iyejen letselhäs, häpkhilek nofw lech'ohle tä iyej häp altar. Wet w'oyis lhip tä imälhehi itsäche altar lhip tä honhate. Wet altar nech'e häpe Lhawuk t'amajchet wet t'uhawetej chik õ'ti'pe n'otw'ayhtes tä õ'wompe n'och'isukyajay. 16Tä tajyäme täja, wet Moisés tachuma itshäwet t'alhä tä iyej lheley, lhäy'e t'alhä tä iyej letänek, wet lhäy'e lechäntowayis lhäy'e t'alhä tä iyejwethä, wet iti'pe altar, ilhokonej tä iwunhomche. 17Wet lhipey tä imälhehi tolo, häp t'äj, t'isan, wet lakäs, ihän alhoye tä iwunhomche. Tsi häp tä Lhawuk t'uhläk õ'woynejatso tä õ'wunhomche häp itshäwet lhipeyna.
18Wet Moisés nech'e äp t'alhe chik õ'häne tson'ataj tä hin'o tä häpkhilek õ'wunho. Wet Aarón lhäy'e leles lhamel iti'pe takweyey tson'ataj lhetek. 19Wet Moisés nech'e ilän wet itsächehen lew'oyis altar lhipey. 20Wet iwo lhipeya tson'ataj wet iwunho lhetek, lhäy'e lhipey tä pajche yisthen, wet lhäy'e häp t'alhä. 21Wet ilej lheley lhäy'e lhechey, wet imälhewek t'isan tä iwunho tä iti'pe altar, tsi häpe t'at n'otw'ayhat tä lenij akäjche tä ikäjyenlhi häp Lhawuk. Tsi häp tä Lhawuk t'uhläk õ'woynejatso tä õyenhoplhi häp lham.
22Wet Moisés t'uhläk õ'häne häp tson'ataj elh tä hin'o tä häpkhilek õ'län tä Lhawuk yen t'amajchetesa häp Aarón lhäy'e leles. Wet lhamel iti'pe takweyey häp tson'ataj lhetek. 23Wet nech'e Moisés ilän, wet tachuma lhip lew'oyis wet ilänej Aarón lech'ote tä lefwomkat lets'e. Wet äp ilänej lefwuj lhokwe tä ihi takwey tä lefwomkat, lhäy'e häp lefwuj lhokwe tä ihi lepach'o tä lefwomkat. 24Tä tajyäme täja, wet Moisés t'äne häp Aarón leles. Wet äpte ilänej lhiphaj w'oyis lech'ote tä lefwomkat lets'e, lhäy'e lefwuj lhokwe tä ihi takwey tä lefwomkat. Wet lefwuj lhokwe tä ihi lepach'o tä lefwomkat äpte ilänej lhiphaj häp w'oyis. Wet w'oyis lhip tä imälhehi itsächehen häp altar lhipey.
25Wet Moisés tachuma itshäwet t'alhä, lhäy'e lechäs t'alhä, lhäy'e nilhokej t'alhä tä iyej lheley, wet t'alhä tä iyej letänek, lhäy'e lechäntowayis lhäy'e t'alhä tä iyejwethä, lhäy'e lheche tä lefwomkat. 26Wet Moisés tachuma tefwaji pan tä levadura newayej tä itälhtho lehi tuskal tä õyenlhi, lhäy'e tefwaji pan tä aceite iyej, lhäy'e häp tortillafwaj, wet ithate itshäwet t'alhä lhäy'e itshäwet lheche tä lefwomkat. 27Wet Moisés yachaje nilhokej tähesna häp Aarón lhäy'e leles, wet häp tä nech'e lhamel itiye Lhawuk tä yen t'awayhata. 28Tä tajyäme täja, wet Moisés tachuma nilhokej m'ak tä ihi lhamel takweyey wet iwunhomche, iti'pe altar, wet ithate itshäwet tä iwunho. Wet tähestso nech'e häpe t'at n'otw'ayhat tä õ'wujyenej Lhawuk, tä hiw'enho len'ohyaj Aarón lhäy'e leles häpkhilek lhamel yenlhi sacerdote lechumet. Wet lenij tä akäjche tä tälhe m'ak tä õ'wunho, häp tä ikäjyenlhi häp Lhawuk.
29Wet Moisés nech'e tachuma häp itshäwet let'okwe wet itiye Lhawuk. Wet Lhawuk hiw'enho Moisés häp tson'ataj lhipna häpkhilek tufw.
30Wet Moisés tachuma lhip aceite tä õ'tsäype m'ak chik õyen t'amajcheta, lhäy'e lhip häp w'oyis tä i'pe altar. Wet itsäype Aarón lhäy'e leles, lhäy'e nilhokej häp lhamel lew'uyis tä sacerdote lakhäy. Wet häp tä yen t'amajchetesa lhamel lhäy'e lew'uyistso, wet nech'e häpe Lhawuk laka sacerdotes.
N'okäjyaj tä n'ot'amajchet
(Éx 29.31-37)
31Tä tajyäme täja, wet Moisés yäme häp Aarón lhäy'e leles wet yok:
–Is chik amel lepen itshäwet tä ihi häp carpa tä Lhawuk lewukwe lepe. Wet is chik amel lhehi tä letufw itshawet t'isan lhäy'e häp pan tä n'ot'amajchet tä ihi lehi tuskal tä õyenlhi. Tsi häp tä Lhawuk pajche ifwel n'oho tä yok, “Aarón lhäy'e leles is chik lhamel tufw itshäwet t'isanna.”
32“Is chik amel lewunhomche itshäwet tä imälhehi lhäy'e häp pan tä imälhehi. 33Yej lhekaych'oye siete ifwalas häp carpa tä Lhawuk lewukwe lepe, pajla'tha awak'alhen tä letachuma sacerdote lechumet. 34Lhawuk t'uhläk imälhewek lewhäytso tä õyenlhi m'ak tä tet iwoye tä õyenlhi ifwalana, häpkhilek tatäy hach'isukyajay. 35Nilhokej siete ifwalas tä amel lhehihila häp carpa tä Lhawuk lewukwe lepe. Ifwalaspej lhäy'e tä honatsispej is chik amel lewoye Lhawuk lhämet, häpkhilek kat'ilahen. Tsi häpe Lhawuk lhämet täja tä ifwel n'oho.”
36Wet Aarón lhäy'e leles lhamel iwoye nilhokej Lhawuk lhämet tä ifwenho Moisés tä ne'tek iwo siläta lhamel.
Currently Selected:
Lev 8: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
