Hab 1
1
1Häp täjna m'ak tä Lhawuk itäfwnhatej profeta Habacuc.
Habacuc y'ulhan m'ak tä ni'isa tä hiw'en wet y'ätshane Lhawuk tä yok:
2Iwuk, ¿atsihila lewhäy tä oleyej tä ot'änlhi
tä owatlä hach'otyaj tä am kach'ahuya n'oye?
¿Atsihila lewhäy tä oleyej tä ot'än hach'oye
tä am kafwayhata n'oyejen häp m'ak tä ni'isa?
3¿Atsi m'ak tä tumenej
tä lepäyen n'oye m'ak tä ni'isa
lhäy'e õlhaklis tä wuj?
Oihi lechowej häp m'ak tä ni'isa lhäy'e õlänyaj,
wet ilhokej lhipey tä iche wichi
tä itaywek wet lhailänhen.
4Nemhit õ'chumyenlhi häp ley.
Õt'äsche m'ak tä is wet najit lakhajyhayaja.
Elh tä ni'isa itayhlä elh tä is,
wet isit'a alhoho lakalelhthayaj tä iwoye.
Lhawuk ichulho Habacuc wet ifwenho tä itayhthiyela lewit'äy Judá lheley. Wet yok:
5“Lhek yahinya wichi iyhäj
tä ihiche laka honhates.
Wujla tä leseltej chik lew'en yämlek lenowaye.
Tsi ifwalas tä lhehina
oyenhilhila m'ak tä äyteschehen,
wet tej chik õ'fwen amho, mat lekachuhla.
6Tsi olham tä onityen alhoho Babilonio lhayis
tä häpe wichi tä fwitses
lhäy'e tä tektshanthä,
wet ilunche ilhokej honhates
yämlek lhayen lewuhuya.#2~Rey 24.2
7Häpehen wichi tä nhoch'ayhen
wet iyhäj wuj tä nowaye.
Lhamel lhaichäjthä
wet iwoye m'ak tä iwoye.
8Lhamel lew'utey yel'atas iläfwenhen,
inu'pe hay'äj lhayis,
wet fwitses, inu'pe m'awotas
tä ilunthä tä honatsi.
Häp wujpe laka wichi
tä iche'pe yel'atas tä nekche honhat,
lhamel tälhe lhip tä tofwe
wet iläfwel tä tiyäje lelänek,
hätet iwoye kotsaj
tä ikele tä hich'a'pe lelänek.
9M'ak at chik häpe tä lhamel hiw'en,
lhamel itäyhat,
wet ilhokej honhatpej tä lhamel tiyäjche,
wichi lhäy'e lhip tä nowaye.
Wet wujpe wichi tä lhamel yen kwenkaya,
inu'pe holotaj tä ihi tewok lhip.
10Häp lhamel iläkwthä niyatey
wet yen w'et m'ayeka wichi tä lhamenya.
Tä lhamel iyahne hupuy
tä õyen lep'otesa õfwamtes tä ch'opwayhen,
wet lhamel ikachuye,
yen häpeya m'ak tä naj lakhajyhayaja.
Wet yenthä lhamhohen let'äsawetes
yämlek lhamel isakanche'pe.
11Tä ikalhi, wet lhamel hätet iwoye ihwokwetaj
tä tiyäjche honhat wet tiyäme.
Häpehen wichi tä matche tä letes ihi,
wet laka dios ihihit'a,
ts'ilak lhamel lakhajyhayaj tä ichaye.”
Häp yachajo tä profeta tumeje m'ak tä Lhawuk iwoye, wet yok:
12Iwuk, am ahäpe Elh tä ichun p'ante,
tälhe tä nech'enyaya tä lheche.
Ahäpe oka Dios tä T'amajchet
tä n'ilataj yämlek tiyäj'attsiy.
Iwuk, ahäpe oletnhawet,
mat am tä lew'enho lakhajyhayaj Babilonio lhayis
yämlek lhamel tä iwoye akalelhthayaj
wet iti n'oyejen atasnhayaj.
13Iwuk, ats'ilak amej
tä asilatyaj ihi tä naj hach'ohleya
wet t'uhawethiyejt'a tä leyahin häp m'ak tä ni'isa.
Tä mälhyejtso,
¿chäte tä lech'anlhaye häp õlhikoyistso?
¿Atsi m'ak tä tumenej tä naj ämeta tä lew'en
wet lech'anlhaye häp wichi tä ni'isahentso
yämlek ilänhen iyhäj tä isen tä inu'pe lhamel?
14¿Chäte tä lewoynejetso häp hin'ol
tä letech'aynej w'ahat tä ihi tewok
lhäy'e tshätäy tä naj lewuka?
15Häp Babilonio lhayis lhayen lewuhuya wichi,
hätet iwoye w'ahat kot tä ichumahen w'ahat.
Tä ihäne lewot lhäy'e laka timek,
wet chik wujpe tä isakanejen,
wet wuj tä käjlhi tä hiw'en.
16Häp tä tumenej tä w'ahat kot
ihumin lewot lhäy'e laka timhay,
wet iwujyen tä yen t'amajcheta,
tsi isej lhamel yämlek hiw'en
lhäk tä isilataj wet naya.
17¿Mälhnhiyejattso tä Babilonio lhayis nileyayej
tä iti n'ohlähen lewotes?
¿Hä lhamel tujlhahichela
tä nip'altsenahen wichi tä ilänhen?
Currently Selected:
Hab 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
