Gén 9
9
Dios itiyej lakäpfwayaj tä is häp Noé
1Dios takäpfwayeje lhämtesna häp Noé lhäy'e leles wet yok:
–Woyay alesa, a'ämay wujpey häpkhilek tapoyej honhat. 2Nilhokej itshätäy tä ihi honhat nowayhla amehen, lhäy'e afwenchey, lhäy'e w'ahat, lhäy'e m'ayhay tä lhaitonchehen honhat. Nilhokej tähestso ihlachufwi han'ohyaj. 3Ow'en amhohen yämthilek häpe äk, lhäy'e hal'ä lhay mälhyej tä ow'enhohte atetsel. 4Mat iche m'ak weihalha tä on'äyej amhohen. Oyok, yej tuj t'isan tä lew'oyis ihi. Tsi n'ow'atshancheyaj häp tä ihi w'oyis. 5Olham oyenla letesayej elh at chik häpe, hin'o wok itshäwet, chik itsäyhchä lew'oyis elh chik häpe amel. Elh weihalhapej hin'ol oyenla letesayej chik itäyhat elh lew'atshancheyaj. 6Elh chik ilän elh, häte lham õ'länla, tsi olham oyenlhi hin'o wet otech'ayen lhamej. 7Amel woyay alesa, a'ämay wujpey häpkhilek tapoyej honhat.
Dios hit'unhatche lhämet tä iwoyeje Noé
8Wet Dios tahuyej Noé lhäy'e leles wet yok:
9–Tetshan. Olham tek otäyhthila olhämetna tä ot'unhatche amejen, lhäy'e ales pajtha nichäte iyhäj tä lepes lheley, 10lhäy'e nilhokej itshätäy tä i'amejen tä lenukwephä tä letälho ahi, lhäy'e afwenchey. 11Oyachajo tä oyok, Tek owohla elha olhämetna tä ot'unhatche amejen. Nemla otäyhtejen pelhay häp wichi lhäy'e itshätäy. Ihichet'ala elh pelhay tä itäyhat honhat. 12Häp täja letetnek olhämet tä ot'unhatche amejen, lhäy'e itshätäy, yämlek tiyäj'attsiy: 13Otihi pule häp lewo tä oyen tetnekayej olhämet tä ot'untejche honhat. 14Chik olham ochenpe honhat pules, wet n'änhiyepeja lewo tä ihi. 15Wet chik oyahnhipeja, oyenhipeja otichunhayaja olhämet tä ot'unhatche amejen, lhäy'e itshätäy, wet nemla iche pelhay tä itäyhthen olhenhay. 16Chik lewo n'älehi pule, olham oyahnhila wet oyenla otichunhayaja olhämet tä ot'unhatche yämlek tiyäj'attsiy, tä owoyeje wichi lhäy'e itshätäy tä ihi honhat. 17Häp täjtso tä oyen tetnekayej olhämet tä ot'unhatche tä owoyeje nilhokej amel.
Mälhyejtso lhämet Dios tä tahuyej Noé.
Noé lhäy'e leles
18Häp Noé leles tä tälho p'ante lehi häpe Sem, Cam tä häpe Canaán lajcha, lhäy'e elh tä lhey Jafet. 19Häp tähestso Noé leles, wet nilhokej wichi tä i'pe honhat tälhe t'at lhamel.
20Noé iwo tesa tä yenlhi yachuyaj, itihchä uvas. 21Fwala elh p'ante iyäyej hat'es wet w'oknajej, wet nichät katsi tä ts'ilakche tä ichufwi lewukwe tä tsänt'äj. 22Wet lhäs tä lhey Cam, wok oyok, Canaán lajcha, hiw'en lajcha Noé tä ts'ilakche, wet yik tä iwo silätaye lepuhfwas. 23Tä mälhyejtso, Sem lhäy'e Jafet lhamel tachuma lew'uy wet iti'pe lhamel lechäyi, wet tatache len'äyij tä yikhen tsi tek t'uhläk iyahin lajcha tä ts'ilakche. Tä nichäte lajcha, wet ithatpe lew'uy.
24Tä Noé n'om tä nojphä tä w'oknaj, wet ihanej m'ak tä lhäs tä nithaläkwa iwoye. Wet yok:
25–¡Lewit'äy ihi Canaán! Häpkhila n'okwenek tä lhäy'e lhip tä p'elitsaj, lepuhfwas yenla lakawoya.
26Wet äp yok:
–Is chik Lhawuk Dios takäpfwaye Sem, wet is chik lakwenek t'at häp Canaán. 27Is chik Dios iwahnej chik lhäy'e lhip Jafet leles, wet äp ihi t'at Sem lew'etes, wet is chik lakwenek t'at Canaán.
28Tälhe täjp'ante pelhay itäyhat wichi, Noé hiw'en trescientos cincuenta (350) nekchämis iyhäj. 29Tä mälhyejtso, nekchämis tä Noé hiw'en p'ante tä nilhokej novecientos cincuenta (950), wet häp p'ante tä y'il.
Currently Selected:
Gén 9: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
