Gén 45
45
José lhaitäfwnhatej lepuhfwas
1José nemhit tumlä letichunhayaj, wet häp tä ifwitsenej tä ifwenho lakawos tä yok:
–¡Nukwephä nilhokej!
Wet nech'e ts'ilak lham tä iyej lepuhfwas, wet lhaitäfwnhatej lhamel. 2Wet wuj tä tafwlhi, wet Egipto lheley iläte, wet õ'fwenho häp niyat tä ihi lew'et. 3José tahuyej lepuhfwas wet yok:
–Ohäpe José. ¿Hä kamaj iläy ojcha?
Wet lhamel wuj tä iseltej tä iläte, wet yok tam. 4Mat José yok:
–Lhuyay, hoyay n'oye.
Tä lepuhfwas ihoye, wet lham yok:
–Ohäpe hach'inij José tä amel lewomayhte wet Egipto lhele ichäj. 5Mat yej lhak'alwethä wet yej lhen atichunhayaja tä amel lewomten'o. Tsi Dios t'at tä ichunkatn'o ahilähen kana tä t'uhläk newache amel awit'äyhyaj. 6Athana tajyäme täkwfwas nekchämis tä nehläs iche honhat, mat kamaj tatäy cinco nekchämis iyhäj. Tejlak wichi tutcheyhen, mat niwohit m'ak chik ihutwek. 7Dios ichunkatn'o ahilähen kana yämthilek amel lew'en lakhajyhayaj chik aifwayhthen wet nittäya ales tä lepes lheley.
8“Tä mälhyejtso, Dios t'at tä ichenn'o kana, häpkhit'a amel. Wet yen n'oye Egipto kaniyat lech'otfwa tä lhamya, wet äp yenn'o lewuka häp lham lew'et, wet äp yen n'oye gobernador tä ihi Egipto. 9Mähen kelaye ojcha wet fwenhola olhämetna tä oyok, Dios yenn'o niyatayej imälhewek honhat tä Egipto. ¡Oyok, Lhuu ho n'oye, yej wo anahhata! 10Ena haw'eta honhat tä lhey Gosén, am lhäy'e ales, lhäy'e achetsos, lhäy'e aläy, lhäy'e nilhokej m'ak tä i'amej, häpkhilek akni'tofwaye n'ohlä. 11Ow'enla amho äk, häpkhilek newache m'ak chik tatäy amej, lhäy'e haw'et lheley, lhäy'e aläy. Tsi kamaj tatäy cinco nekchämis tä nehläs ihichela.
12“Wet athana och'inij Benjamín, lhäy'e amel, lew'enayn'o tä olham t'at tä owoye olhämettso. 13Fwenhola ojcha häp oniyatyaj tä oihi Egipto, lhäy'e nilhokej m'ak tä amel lew'enay tä ihi täjna. ¡Mähen kelchetshi, wet chäj alhoho ojcha!”
14Tä iwoyetso, tatsufwelej lech'inij Benjamín wet tafwlhi. Häte Benjamín tafwlhi tä tatsufwelej lechila José. 15Wet nech'e hits'uhen lechilalis ch'alos wet tafwlhi t'at. Tä ileyej, wet lechilalis yämhoplhi.
16Wet nilhokej wichi tä ihi Egipto kaniyat lew'et ihanej tä José lepuhfwas nämhen. Wet lham niyat lhäy'e lakawos lhamel akäjejlhi. 17Wet niyat tahuyej José wet yok:
–Fwenho achilalis, is chik ilhuhyenejen asnolis häp n'olhäk tä lhamel yäple honhat tä Canaán. 18Wet is chik ichäj n'oye lajcha lhäy'e lhamel lew'et lheley wet iho n'oye. Olham ow'enhihola honhat tä wuj tä is tä ihi Egipto, wet tufwila yachuyaj lhay tä wuj tä isen. 19Fwenho achilalis, is chik ichäj kaletas tä yikhen yämthilek ichäj alhoho lech'efwas lhäy'e leles, lhäy'e lhamel lajcha. Is chik nekhen t'at, 20isit'ak yen lhakliya laka m'ayhay chik imälhehchä, tsi m'ayhay tä lhäy'e lhip tä isis tä ihi Egipto lewuhuyla lhamel.
21Wet Israel leles iwoye. Wet José hiw'enho lhamel häp kaletas tä Egipto kaniyat ne'tek hiw'enho, lhäy'e lhäk tä inukwe len'äyij. 22Wet hiw'enho elh weihalhapej lew'uy tä nech'ayek yämthilek iwo iyhäja lew'uyis. Wet hiw'enho lech'inij Benjamín trescientos chinaj t'äj lhäy'e cinco lew'uyis tä nech'ayhis. 23Wet diez asnolis tä ilhuhyenejen m'ayhay tä isis tä Egipto lhele tä ichene lajcha, wet diez asnolis tä ilhuhyenejen trigo, lhäy'e pan lhäy'e lhäk yämthilek lajcha tufw chik nekche len'äyij. 24Tä José iwo tsilhekayej lepuhfwas, wet ifwenho lhamel wet yok:
–Tä lhekhen yej chuwet amehen.
Wet lhamel yikhen, 25wet tä ifwalas iyhäj lhamel nichäte honhat tä Canaán tä lajcha Jacob ihi. 26Wet lhamel ifwenho lajcha wet yok:
–¡José y'inhit'a p'ante! ¡Lham t'at tä häpe Egipto kagobernador!
Tä Jacob iläte, lhämet ihihit'a, tsi ikachu t'at m'ak tä leles ifwenho. 27Mat lhamel ifwenho nilhokej José lhämtes, wet äp yok:
–¡Lhek yahinya kaletasni, häp tä ichen ame!
Wet tä Jacob hiw'en kaletas tä José ichene yämthilek ichäj lham, nech'e lehusek lakäjyaj ihi. 28Wet yok:
–¡Is t'at tä ohanej olhäs tä kamaj iläy t'at! Ohohiyela wet ow'enla tä kamaj n'am leyej honhat.
Currently Selected:
Gén 45: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
