Gén 33

Jacob lhäy'e Esaú nichutwek wet lha'isyenwek

1Tä Jacob hiw'enlä Esaú tä näm, lhäy'e cuatrocientos hin'ol tä nekche, lham hiw'enhathen leles, hiw'enhatej iyhäj Lea, wet hiw'enhatej iyhäj Raquel, wet hiw'enhatej iyhäj lakawos tsinhay. 2Wet m'ak tä iwoye, itumtejlä wichi tä nämhen häp lakawos tsinhay lhäy'e leles, wet nech'e Lea lhäy'e leles iw'echehi, wet Raquel lhäy'e lhäs José iw'echehi Lea. 3Wet nech'e Jacob ichunlä lhamel, wet tä yik t'upeypej katsi, nephäpej, wet äp yikpej. Mälhyej'attso tä iwoye yäk siete veces tä iwoynejepejtso, pajtha tott'aye t'at lechila Esaú. 4Wet tä lechila hiw'enlä, inu alhoho tä ihohlä lech'inij. Tä nichäte, tatsufwelej wet hits'u lech'alo, wet nech'e lhamel tafwchehchä. 5Wet Esaú iyahin atsinhay lhäy'e Jacob leles wet yok:

–¿Atsi tä häpe tähestsi?

Jacob nichulho wet yok:

–Lhamel häpehen oles tä Dios hiw'en n'oho tä akawon'o.

6Wet nech'e Jacob lakawos tsinhay lhäy'e leles lhamel ihoye Esaú wet t'upeyhchä pajtha letachol taji honhat. 7Wet nech'e äp Lea lhäy'e leles lhamel ihoye wet n'okwiyej. Tä lepes Raquel lhäy'e lhäs José lhamtej n'okwiyej. Nilhokej lhamel t'upeyhchä pajtha letachol taji honhat. 8Wet Esaú tay'ätshane Jacob wet yok:

–¿Atsi m'ak tä lewoyeje itshätäy tä onchutejen tä õyokwes?

Jacob nichulho wet yok:

–Häp tä ot'uhläk okäjyenejlhi owuk tä onäme.

9Esaú yok:

–Ipuhfwa, kha, naya t'at m'ak tä in'oyej. Amajej t'at m'ak tä alewuk.

10Mat Jacob yok:

–Kha. Woye tä owoye, chik matche tä akäjlhi n'oyej tä onäm ame, chum'atlä m'ak tä oyen awayhata. Tsi tä ow'en ate'pe, hätet iwoye Dios te'pe tä ow'en, tsi letachum n'ohlä tä onäm. 11Olhaip'altsen ame, chumlä awayhat tä ohän amena. Tsi Dios yenn'o häpeya hin'o tä wuj lakäywet wet niwohit m'ak chik tatäy n'oyej.

Wet tä Jacob inityenej lechila Esaú, tä lepese tachum'atlä m'ak tä lech'inij hiw'enho.

Esaú yäple lew'et wet Jacob ihoye lhip elh

12Wet Esaú äp yok:

–Mäh n'ekhen, olham ochun ahilä.

13Mat Jacob nichulho lechila wet yok:

–Ipuhfwa tä ohumnek, lehanej t'at tä oles tek takhajayhen, wet äp wuj tä oyen lhakliya tson'atas lhäy'e w'asetas lhäy'e leles. Chik n'am p'altsen wet oyikchufwi ifwala imälhewek, y'inhiyejena t'elak. 14Is t'at chik lechun n'ohlä. Olham oyik t'at mat oläfwenhit'a tä oyik. Ochunkattshi itshätäy wet oyikche oles, wet oaifwitla chik lhehi Seír.

15Esaú yok:

–Is t'at. Mat is chik on'äy amej iyhäj hin'ol tä nek n'okwe.

Mat Jacob nichulho lechila wet yok:

–Kha, yej lhen alhakliyan'o.

16Wet ifwalatso Esaú yäple lew'et Seír, 17mat Jacob tatshupiye lhip tä lhey Sukot. Tä nichäte, yenlhi lewukwe tä ihi wet äp yenlhi leläy huplawtes. Wet häp tä tamenej tä õyen lheya honhattso Sukot tä yok, Huplawtes.

Jacob nichäte Sikem

18Tä Jacob tapile p'ante Canaán tä tälhe Padán-aram, newache lewit'äyhyaj chik häpe. Wet iwo p'ante lew'etahi honhat lhip tä tatayhlä hupuy tä Sikem. 19Tä paj p'ante, ichäj honhat lhiptso tä lewuk Hamor leles tä häpehen hin'o tä lhey Sikem lepuhfwas. Wet laha tä itihi cien monedas.#Jos 24.32; Juan 4.5 20Wet yenlhi laka altar, wet yen lheya “Dios häpe Israel lhayis laka Dios.”

Currently Selected:

Gén 33: WCHB

Highlight

Copy