Gén 28

1Tä mälhyejtso, Isaac t'äne Jacob wet yok:

–Lhawuk i'amej. Athana lhek tetshan olhämet, oyok, Yej lhena hach'efwaya elh atsinhay tä ihi honhatna Canaán. 2Mäh hoye achäti Betuel lew'et tä ihi honhat tä Padán-aram, wet ena hach'efwaya elh awithok Labán les tsinhay. 3Is chik Dios tä laj letumfwaya iti amej lakäpfwayaj tä is wet hiw'en amho wujpey ales häpkhilek wujpey wichi tä tälh ame. 4Wet is chik hiw'en amho lhäy'e ales häp lakäpfwayaj tä ifwenho p'ante Abraham, häpkhilek alewuhuy t'at häp honhat tä kalhaw'eta tä y'ehina, mälhyej iwoye lhämet p'ante ifwenho Abraham.#Gén 17.4-8

5Wet häp tä Isaac ichene p'ante lhäs Jacob häp honhat tä lhey Padán-aram. Wet ihoye lewithok Labán lew'et, häp hin'o tä lham lako Rebeca lechila tä lajcha häpe Aram lhayis elh tä lhey Betuel.

Esaú äp tachuma atsinha elh wet nech'e tres lech'efwas

6Esaú hiw'en tä lajcha Isaac hiw'enho lakäpfwayaj Jacob wet ichene honhat tä lhey Padán-aram yämthilek yen ch'efwaya elh atsinhay tä lew'et honhattso. Wet hiw'en tä lajcha takäpfwaye häp Jacob wet n'äyejo chik yen ch'efwaya elh atsinhay tä lew'et Canaán, 7mat lajcha lhäy'e lako ne'tek ihoye Padán-aram, wet lham yik tä ihoye t'at. 8Tä mälhyejtso, Esaú nitäfwelej tä lajcha lhäy'e lako tek ihumnhen häp atsinhay tä lham lech'efwas tä lew'et Canaán. 9Wet lham yik tä ihoye Ismael, Abraham lhäs, wet yen ch'efwaya lhäse tä lhey Mahalat tä häpe Nebayot lepuhfwa. Wet nech'e tres lech'efwas tä nilhokej, täkwfwas tä lew'et Canaán wet elh häpe Ismael lhäse.

Jacob tafwilhan tä ihi Betel

10Jacob yikp'antech'oye Beerseba wet inukwe n'äyij tä tiyäje Harán. 11Tä yäm p'ante kanhi, honaj t'at, fwala y'uy, wet tä imä tachuma tunte wet t'aleyej. 12Wet lefwilhek ihi, tafwilhanej n'ot'äsawet tä tälho pule pajtha taji t'at honhat, wet Dios laka ángeles inupejchä wet äp yäpilphäpej.#Juan 1.51 13Häte hiw'en tä Lhawuk takasitwhäye lham wet tahuyej tä yok:

–Ohäpe Dios tä achäti Abraham Lewuk wet ajcha Isaac Lewuk. Am lhäy'e ales ow'enhihola honhat tä lemähina,#Gén 13.14-15 14wet häpkhila wichi tä wujpey, hätehlat iwoye honhat mok. Wet lhamel ifwtsatla'pe honhat, yenla lew'eta honhat tä tumej tafwojhiye, lhäy'e tä tapinhiye, lhäy'e tä hichä, lhäy'e tä kaphä. Wet wichi tä w'enhache lhamej tä ihiche nilhokej honhates isiyeja okäpfwayaj tä tälh ame lhäy'e ales.#Gén 12.3; 22.18 15Olham oi'amej wet ot'uhla ame honhat chik häpek lehoye, wet chik paj oainachajiyela honhatna. Olehit'ala amej, wet oyämla matche olhämet tä ofwel amhona.

16Tä Jacob n'om, wet yok:

–¡Matche tä Lhawuk ihi t'at häp honhatna, mat nech'e tä ohanej! 17Wet wuj tä noway wet yok:

–¡Lhipna n'ot'amajchet t'at! ¡Dios lew'et täjna wet pule lepe!

18Tä nech'e fwamlafwaj Jacob nephä, wet tachuma tunte tä yen t'alaja, wet ikasthayen wet itsäype aceite tä yen t'amajcheta. 19Wet häp honhattso fwalas tä pajche iche p'ante hupuy tä ihi tä lhey Luz.#28.19 N'olhämet Luz tek yiwitej ahätäy lhämet tä yok, Isi. Mat häpe n'olhämet p'ante yok, Hal'ä tä lhey almendro. Mat Jacob iwo elha lhey, wet yen lheya Betel, wok oyok, Dios Lew'et. 20Wet hit'unhatche lhämet tä yok:

–Chik Dios nek n'okwe wet t'u n'oye tä owo ow'ekyaja, wet hiw'en n'oho olhäk lhäy'e ow'uy, 21wet newache owit'äyhyaj pajla'tha oyäple ojcha lew'et, chik mälhhiyejatso, oyok, Lhawuk häpkhila oka Dios. 22Wet tunte tä okasthayenna häpkhila Dios Lew'et, wet oyok, Nilhokej m'ak chik lew'enla n'oho ow'enla amho lhip tä diezmo.

Currently Selected:

Gén 28: WCHB

Highlight

Copy