Gén 21

Nech'e iche Isaac

1Lhawuk yen tichunhayaja Sara wet yäm matche lhämet tä pajche ifwenho. 2Tä Abraham häpe hin'o tä wuj tä hich'ut, wet nech'e hich'otshan Sara. Wet tä nichäte p'ante lewhäy tä Dios yok, “Häp lewhäytso häpkhilek lewohla äsa”, wet matche t'at, nichätchä lhäsaj. 3Wet Abraham yen lheya Isaac, 4wet iwo p'ante lhijtsekayej tä hiw'en ocho ifwalas, mälhyej tä Dios ne'tek iwoye.#Gén 17.11-12 5Abraham hiw'en p'ante cien nekchämis tä nech'e iche p'ante Isaac. 6Wet Sara letichunhayaj yok, “Dios hiw'en n'oho m'ak tä oyen t'ischeyeka. Wet elh chik häpek ihanch'oye tä owo olhäsa, lhamtej t'ischeyhiyeja.#21.6Häp n'olhey Isaac yok, T'ischeylhi. 7¿Atsihit elh chik ifwenho p'ante Abraham chik yop'antek, Sara iwohla lhäsa? Ihichet'a. Matkat athana owot lhäsa tä lham häpe hin'o tä hich'ut t'at.”

8Wet Isaac lhaichihelit, wet ifwala p'ante Sara ilehtej lakat'os, Abraham yenlhi lakäjyaj tä wuj.

Sara ne'tek Abraham ichen Agar lhäy'e lhäs Ismael

9Wet iche ifwala tä Sara hiw'en lakawo'tsinha Agar lhäs Ismael tä iläkwlhi Isaac. 10Wet Sara yik tä ifwenho Abraham wet yok:

–¡Chen okawo'tsinha, lhäy'e lhäs! ¡Tsi t'uhawethiyejt'ak han'äfwajtso isej akäywet tä lewukla olhäs Isaac!

11Tä Abraham iläte, wuj tä äytaj letichunhayaj, tsi lhäs t'at Ismael. 12Mat Dios tahuyej wet yok:

–Yej lhen alhakliya han'äfwaj lhäy'e lako tä häpe akawo'tsinha. Woye t'at m'ak tä Sara ne'tek lewoye, tsi ales tälhiyela äs Isaac leles. 13Wet akawo'tsinha lhäs häte oyenla häpeya lajcha wichi tä wuj, tsi äs t'at.

14Tä ifwala elh tä nech'e fwamlafwaj, Abraham hiw'enho Agar pan lhäy'e inät tä ihi lehi tä tsänt'äj wet tilhäj, wet hiw'enho lhäs Ismael, wet yok:

–Mäh.

Wet Agar yik, wet inukwe honhat tä ts'anis tä tumejlä hupuy tä Beerseba. 15Tä yäm kanhi, y'im inät tä ichäj. Tä mälhyejtso, hin'äy lhäs, itichufwi hal'ä hupel 16wet yikch'oye, lhaitontehlä tä tatayphä, tsi tek t'uhläk hiw'en lhäs chik y'il. Wet tä tatayphä, tafwlhi. 17Wet Dios iläte mamse tä tafwlhi, wet laka ángel t'än tä tum puleye wet yok:

–Agar, ¿atsi m'ak tä awit'äyhyaj? Yej nuhat amho, tsi Dios iläte mamse lhafwyhayaj. 18Nephä, chuma äs, yej leyej wet uye, tsi olham oyenla häpeya wichi tä wuj lajcha.

19Wet Dios hin'ältej Agar häp chowej tä inät ihi. Wet Agar ihoye wet itsäche lehi tä tsänt'äj, wet ihäne lhäs Ismael wet iyäynej.

20-21Wet Dios tach'ote mamse wet lhaichihelit, wet yen lew'eta honhat tä ts'anis tä lhey Parán. Wet häpe hin'o tä takwey isi tä ichäjlhi lutsej hal'ä. Tä paj lako itiyej atsinha tä lew'et Egipto wet yen lech'efwaya.

Abraham lhäy'e Abimelec hit'unhatche lhamejen lhämet

22Wet häp ifwalastso niyat Abimelec lhäy'e laka sip'äl kaniyat tä lhey Ficol, lhamel ihoye Abraham. Wet Abimelec tahuyej wet yok:

–Ow'en tä Dios i'amej tä lhenlhi m'ak chik häpe. 23Tä mälhyejtso, unhatche n'oyej ämet tä y'ehi täjna tä y'ehi tä Dios tatache, häpkhilek ohanej tä kalelhäj tä tek letihla n'oyej akanyaj, lhäy'e oles lhäy'e ochetsos, wet lewohiyepeja n'oyej m'ak tä is, lhäy'e wichi tä ihi honhat tä lhehina, mälhyej tä olham owoyejnaj ame.

24Abraham nichulho wet yok:

–Matche olhämet.

25Wet nech'e Abraham tahuyej Abimelec wet yok:

–¿Chiwoye tä akawos iso n'oyej chowej tä inät ihi?

26Abimelec nichulho wet yok:

–Häp tä n'am hanej. Nech'e tä oläte, tsi amtej lefwenhit'a n'oho.

27Wet Abraham tachuma tson'atas lhäy'e w'asetas wet hiw'enho Abimelec, wet lhamel iwoyej lhamehen lhämet tä hit'unhatche tä yämlat matche m'ak tä t'uhläk iwoye. 28Wet äp Abraham hiw'enhat siete tson'atas les. 29Wet Abimelec tay'ätshane wet yok:

–¿Atsi m'ak tä tamenej tä lewoye täja?

30Abraham nichulho wet yok:

–Chuma siete tson'atas les tä ow'en amho tä häpe otetnekej tä matche, olham t'at tä olhenek chowej tä inät ihi.

31Häp tä tamenej tä honhattso õyen lheya Beerseba, wok õyok, Chowej tä ot'unhatche olhämet. Tsi häp p'ante tä Abraham lhäy'e Abimelec ihi tä hit'unhatche lhamejen lhämet tä iwoye.

32Tä lhamel ileyej, Abimelec lhäy'e Ficol lhamel yäple Filisteo lhayis kahonhat. 33Wet Abraham yen lakäsa hal'ä tä lhey tamarisco tä ihi Beerseba. Wet t'änch'oye Lhawuk, Dios tä n'ilataj, wet n'okwiyej. 34Wet pitaj lewhäy tä Abraham ihi p'ante Filisteo lhayis kahonhat.

Currently Selected:

Gén 21: WCHB

Highlight

Copy