Gén 13
13
Lot yikch'oye lewithok Abram
1Abram yikch'oye Egipto, lhäy'e lech'efwa Sarai, lhäy'e nilhokej m'ak tä iyej, wet yäple ts'anis tä Négueb. Wet lewakla Lot yikche t'at. 2Abram häpe hin'o tä wuj lakäywet tä hiw'en, oro, plata, lhäy'e wujpey leläy. 3Tä paj, äp yikch'oye Négueb wet yikhen, yiwalh t'at lew'ekyaj, wet tiyäje Betel, pajtha nichäte honhat tä pajche lew'et tä Betel tumej lhip elh wet N'owastsek tumej lhip elh, 4häp honhat tä ihi p'ante tä Abram yenlhi altar. Wet tä nichäte, lham nech'e t'änch'oye Lhawuk wet n'okwiyej.
5Lot häte lham häpe hin'o tä wuj lakäywet, hätet iwoye lewithok Abram. Wuj tson'atas tä hiw'en, lhäy'e kayla lhayis, w'asetas, lhäy'e wichi tä iyej. 6Mat häp honhat tä lhamel ihi w'awulhiyejt'a leläy tä wujpey, lew'et ihihit'a. Wet häp tä nemhit is tä iwek lhamel, Abram lhäy'e Lot, 7tsi lakawos tä t'uyehen leläy tataypejwek. Häte fwalastso Canaán lhayis lhäy'e Ferez lhayis kamaj ihi t'at honhat.
8Tä mälhyejtso, Abram tahuyej lewakla Lot wet yok:
–N'ahäpehen hin'ol tä lhalepuhfwas t'at. Isit'ak iche n'olhäkleyhyaj chik in'amejen wok lhakawos chik tachumpej. 9Tä mälhyejtso, yahinpe honhat wet tshupyene lhip tä lehumin. Olhaip'altsen ame, is chik alew'enhat. Chik letumej tafwojhiye, olham otumhiyeja tä tapinhiye. Wok am chik letumej tapinhiye, wet olham otumhiyeja tä tafwojhiye.
10Tä mälhyejtso, Lot iyahinpe honhat wet hiw'enche lhip tä ifwache tewok tä Jordán, lhäy'e lhip tä is wet wuj inät tä ihi, pajtha nichäte hupuy tä Zoar. Matche tä isilataj honhattso, hätet iwoye yachuyajw'et tä Edén p'ante wok honhat tä Egipto. (Häp tä mälhyej p'antetso tä kamaj Lhawuk nitäyhata hupuy tä Sodoma lhäy'e Gomorra.)
11Tä mälhyejtso, Lot itshupyenej lhame nilhokej honhattso tä ifwache tewok Jordán yämthilek yen lew'eta, wet yikch'oye honhat tä lhamel ihi wet tumej hichä. Wet häp tä tettso, Lot nemhit iyej lewithok Abram. 12Abram imälhehi Canaán wet Lot ihoye hupuy lhayis tä ihi honhat tä iwhäye Sodoma. 13Häp Sodoma häpe t'at hupuy tä wuj tä ni'isa wichi tä ihi. Lhamel iwoye lakeyis tä lhäy'e lhip tä ni'isa tä Lhawuk y'ulhan.
14Tä tajyäme Lot tä yik, Lhawuk tahuyej Abram wet yok:
–Tä lhekana, lhek yahne lhip tä tafwojhiye, lhäy'e tä tapinhiye, lhäy'e tä tumej hichä, lhäy'e tä tumej kaphä. 15Olham ow'enla amho nilhokej honhates tä lew'enena, pajla'tha tiyäj'attsiy tä alewuk lhäy'e ales tä lepes lheley. 16Oyämla wujpey ales, hätehlat iwoye holo tä nehit katsik ihanej chik iwo t'ufwahtesa. 17Mäh lunche imälhewek honhat tä pitaj lhäy'e tä tsajo, tsi olham ow'enla amho.
18Tä mälhyejtso, Abram yik, inachuhen lewukwey tä tsänt'ähes wet ihoye honhat lhip tä hal'ätas ihi tä lewuk hin'o tä lhey Mamre, wet häp tä yen lew'eta. Häp lhiptso tott'aho hupuy tä lhey Hebrón, wet tä ihi Abram yenlhi altar yämthilek iwujyen Lhawuk.
Currently Selected:
Gén 13: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
