Gén 11
11
Hup tä wuj tä atojphä tä ihi Babel
1Ifwalas p'antetso nilhokej wichi tä i'pe honhat tefwajni lhämet. 2Tä lhamel yikch'oye p'ante honhat tä tumej hichä, lhamel hiw'en p'ante honhat tä w'awulhchä tä ihi Sinar, wet häp tä yen lew'eta.
3Ifwala elh p'ante lhamel yämwethä wet yok:
–Huwa, n'enlhi ladrillos wet n'ap'o.
Tä mälhyejtso, lhamel yenlhi wet häp tä ichumyenlhi, wet lhamel tachuma alquitrán, häp honhat lhits'i tä ichalaj, wet häp tä hip'ajtejwek ladrillos. 4Wet lhamel yok:
–Huwa, n'enlhi hupuy, lhäy'e häp hup tä lhäy'e lhip tä atojphä pajla'tha nichäte pule, häpkhilek n'ahäpe wichi tä letoyaj ihi wet tek n'ahäpe iyhäj tä w'et lha'pehen honhat.
5Mat Lhawuk inuhchä, wet itetshan hupuy lhäy'e häp hup tä atojphä tä wichi yenlhi. 6Wet yok:
–Wichina weihalhahchä wet tefwajni lhamel lhämet. Häp tä athahit'a tä lhamel yenlhi lechumetna. Tä mälhyejtso, m'ak at chik häpek lhamel t'uhläk yenlhi, athahit'ala. 7Huwa, n'anuyejchä wet n'awelanthiche lhämtes, häpkhilek elh weihalhapej nemhit iläte elh lhämet.
8Wet mälhyej p'antetso tä Lhawuk ifwtsatkatpehen honhat wichi, wet lhamel ileyej tä yenlhi hupuy. 9Wet häp honhattso häp p'ante tä ihi tä Lhawuk iwelanthiche wichi lhämtes, wet ifwtsatkatpehen honhat lhamel. Häp tä tamenej tä hupuytso lhey Babel, tä yiwitej n'olhämet tä yok, Owelanthi.
Sem leles lhäy'e lechetsos
(1~Crón 1.24-27)
10Häp tähesna Sem lechetsos. Nekchämis täkwfwas p'ante tä tajyäme tä pelhay itäyhthen wichi, Sem hiw'en p'ante cien nekchämis, wet häp tä nech'e iche p'ante lhäs tä lhey Arfaxad. 11Tä tajyäme nekchämistso, hiw'en quinientos (500) nekchämis iyhäj, wet iwo leles iyhäja tä hin'ol lhäy'e tä atsinhay.
12Tä Arfaxad hiw'en p'ante treinta y cinco nekchämis, wet nech'e iche lhäs tä lhey Sélah. 13Tä tajyäme nekchämistso, Arfaxad hiw'en cuatrocientos tres (403) nekchämis iyhäj, wet iwo leles iyhäja tä hin'ol lhäy'e tä atsinhay.
14Tä Sélah hiw'en p'ante treinta nekchämis, wet nech'e iche lhäs tä lhey Heber. 15Tä tajyäme nekchämistso, Sélah hiw'en cuatrocientos tres (403) nekchämis iyhäj, wet iwo leles iyhäja tä hin'ol lhäy'e tä atsinhay.
16Tä Heber hiw'en p'ante treinta y cuatro nekchämis, wet nech'e iche lhäs tä lhey Peleg. 17Tä tajyäme nekchämistso, Heber hiw'en cuatrocientos treinta (430) nekchämis iyhäj, wet iwo leles iyhäja tä hin'ol lhäy'e tä atsinhay.
18Tä Peleg hiw'en p'ante treinta nekchämis, wet nech'e iche lhäs tä lhey Reú. 19Tä tajyäme nekchämistso, Peleg hiw'en doscientos nueve (209) nekchämis iyhäj, wet iwo leles iyhäja tä hin'ol lhäy'e tä atsinhay.
20Tä Reú hiw'en p'ante treinta y dos nekchämis, wet nech'e iche lhäs tä lhey Serug. 21Tä tajyäme nekchämistso, Reú hiw'en doscientos siete (207) nekchämis iyhäj, wet iwo leles iyhäja tä hin'ol lhäy'e tä atsinhay.
22Tä Serug hiw'en p'ante treinta nekchämis, wet nech'e iche lhäs tä lhey Nacor. 23Tä tajyäme nekchämistso, Serug hiw'en doscientos (200) nekchämis iyhäj, wet iwo leles iyhäja tä hin'ol lhäy'e tä atsinhay.
24Tä Nacor hiw'en p'ante veintinueve nekchämis, wet nech'e iche lhäs tä lhey Taré. 25Tä tajyäme nekchämistso, Nacor hiw'en ciento diecinueve (119) nekchämis iyhäj, wet iwo leles iyhäja tä hin'ol lhäy'e tä atsinhay.
26Tä iche p'ante Taré leles tä lheyis Abram, Nacor lhäy'e Harán, lham hiw'en setenta (70) nekchämis.
Taré leles p'ante
27Häp tähesna Taré leles: Abram, Nacor, Harán. Wet Harán häp tä Lot lajcha. 28Wet tä kamaj n'ila Taré, wet lhäs Harán y'il p'ante tä ihi lew'et tä lhey Ur tä ihi Caldeo lhayis kahonhat.
29Abram tawhayey p'ante wet iyej atsinha tä lhey Sarai. Wet lech'inij Nacor häte tawhayey wet iyej lewaklani tä lhey Milca, tä häpe Harán lhäse wet Isca lechita. 30Wet Sarai lajit lelesa tsi sufwnaj t'at.
31Wet Taré yikch'oye p'ante häp Ur tä ihi Caldeo lhayis kahonhat wet ihoye honhat tä Canaán, lham lhäy'e lhäs Abram, lhäy'e letiche Sarai, lhäy'e lecheyäs Lot. Matkat tä lhamel nichäte p'ante hupuy tä Harán, lhamel ihi t'at. 32Wet häp p'ante tä Taré ihi tä y'il tä hiw'en p'ante doscientos cinco (205) nekchämis.
Currently Selected:
Gén 11: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.