Éx 5

Moisés lhäy'e Aarón yämhoplhi Egipto kaniyat

1Tä Moisés ileyej tä yämhoplhi wichi, lham lhäy'e Aarón yikhen tä ihoye Egipto kaniyat. Wet ifwenho tä yok:

–Häp Israel lhayis Lewuk Dios yok, “Ch'anlhaye oka wichi tä ihoye ts'anis, yämthilek iwo lakäjyaja kanhi tä iwujyenn'o.”

2Matkat niyat yok:

–¡Ohäpkhit'a Israel lhayis lewuk dios kawo yämthilek owoye lhämet wet owahintshi laka wichi! ¡Tek ontäfwelej diostso, wet tek owahnhitshila Israel lhayis chik fwetaj yikhen!

3Moisés lhäy'e Aarón lhamel yok:

–Hebreo lhayis Lewuk Dios ihonaj n'oyehen. Tä mälhyejtso, ch'anlha n'oyehen wet oyikhen tä onukwe ts'anis pajla'tha tres ifwalas chik oyikhen. Wet lhip chik onchätho, olänhihena itshätäy tä owunhomche tä oyen n'okhayajayej olhamel oka Diostso. Tsi chik nimälhyayejtso, elat ilän n'oyejen äytes tä n'ot'inhayaj wok lefwajnhat.

4-5Matkat Egipto kaniyat tahuyej lhamel wet yok:

–Moisés lhäy'e am Aarón, ¿chipte tä kawoya letamseka wichi tä tachumwethä? Athana tä nech'e wujpey Israel lhayis tä ihi Egipto, ¿hä lene'tek lhamel ileyej lechumtes? ¡Is chik lhamel tujlhache tä tachumwethä!

6Wet ifwalatso niyat ifwenho capataz lhayis, lhäy'e Israel lhayis tä itetshan n'ochumtes, wet yok:

7–Athana is chik lewos ileyej tä ihäne hup wichi tä yenlhi adobes. Mat is chik lhamel t'at wichi tä yenlhi adobes tä t'ukwe hup yämthilek ikasoyej iyhät. 8Mat häte isit'ak t'ayhchä adobes tä lhamel yenlhi. Is chik w'awulho t'at m'ak tä pajche yenlhipej. ¡Lhamel tek t'uhläk tachumwethä, häp tä tamenej tä yok, “Ch'anlha n'oyehen tä oyikhen yämthilek olänhen itshätäy wet owunhomche tä oyen n'okhayajayej oka Dios”! 9Tälhe ifwalana äm äytajche lechumet, häpkhilek hip'ethatlä n'olhämtes tä kamatachehen.

10Wet capataz lhayis, lhäy'e Israel lhayis tä itetshan n'ochumtes, lhamel ihoye wichi wet ifwenho tä yok:

–Niyat ne'tek hupwos ileyej tä ichäj amehen hup. 11Is chik amel t'at tä let'ukwe. Mat niyat tek t'uhläk tatäy tefwajni adobes, t'uhläk w'awulho t'at tä lhenlhipej.

12Wet Israel lhayis ilunpe Egipto, ihoyehen yachuyajw'etes tä t'ukwe trigo t'ähes wok pinu w'ole yämthilek ikasoyej iyhät. 13Nilhokej ifwalas niyat laka capataz lhayis inityenej wichi yämthilek nittäya elh adobes tä yenlhi, hiw'awlhathi t'at tä lewos ihäne hup häp lhamel. 14Wet wuj tä capataz lhayis itasinwethä Israel lhayis tä itetshan n'ochumtes, wet yok:

–¿Chipte tä adobes tä wichi yenlhi honahaji wet ifwalana kamaj tek w'awulho tä yenlhipej?

15Wet Israel lhayis tä itetshan n'ochumtes ihoye Egipto kaniyat wet yok:

–Ika niyat, ¿chipte tä lene'tek õ'woyej n'oyehen täjtso? 16Tä nem õ'hän n'oyehen hup, mat õne'tek olhamel oyenlhi t'at adobes. Wet õ'tasinwethä olhamel tä ohäpehen akawos. ¡Ika niyat, aka capataz lhayis t'at tä iwoye täjtso!

17Mat niyat nichulho lhamel wet yok:

–¡Ahäpehen wichi tä nit'uyahläk tachumwethä! ¡Matche tä len'etäjej achumet! ¡Häp tä tamenej tä lhok, “Ch'anlha n'oyehen tä oyikhen yämthilek olänhen itshätäy wet owunhomche tä oyen n'okhayajayej oka Dios”! 18¡Mähen, chumwethä! Tek õhw'enla amhohen hup, mat isit'ak nem wuj adobes tä wichi yenlhi.

19Tä Israel lhayis tä itetshan n'ochumtes iläte niyat lhämettso, hiw'en tä matche tä atha len'äyij. 20Wet tä lhamel yikch'oye niyat, hiw'en Moisés lhäy'e Aarón tä inihihlä lhamel. 21Wet tahuyej tä yok:

–¡Is chik Lhawuk itetshan m'ak tä lewoyaye wet aitasin! ¡Tsi amel tä letamenej tä niyat lhäy'e leniyatfwas lhäy'e lhip tä fwitsaj n'oyehen! ¡Amel t'at tä letamenej tä lewäk ihi lhamel wet t'uhläk ilänhen olhamel!

Moisés yäm äytajejche lhämet Lhawuk

22Tä mälhyejtso, Moisés tahuyej Lhawuk wet yok:

–Iwuk, ¿chipte tä letiyej m'ak tä ni'isa häp Israel lhayis? ¿Wet chipte tä lechen n'oye lhamel? 23Tälhe ifwalanaj ohoye niyat tä ofwenho ämet, wet lham lhäy'e lhip m'ak tä ni'isa tä iwoyeje aka wichi. Wet am tek wo m'ak chik lewoye yämthilek lefwayhthen.

Currently Selected:

Éx 5: WCHB

Highlight

Copy