Éx 33

Lhawuk ne'tek Israel lhayis tujlhache len'äyij

1Lhawuk tahuyej Moisés wet yok:

–Mäh äy'e wichinaj letonphä tä ihi honhat tä Egipto wet mäch'oye täja. Hoye honhatte ofwenho Abraham, Isaac lhäy'e Jacob tä oyohtek, “Ow'enhihola ales tä lepes lheley.”#Gén 12.7; 26.3; 28.13 2Ochenla oka ángel wet ipäynhila ame n'äyij. Wet oyokwesichephäla Canaán lhayis tä ihi, lhäy'e Amorreo lhayis, lhäy'e Het lhayis, lhäy'e Ferez lhayis, lhäy'e Hiv lhayis, lhäy'e Jebús lhayis. 3Hoyaye honhat tä t'os lhäy'e akäyek hätet iwoye inät, iläfwelchehen tä ihi. Mat olham oyikhit'ala amchehen, tsi ahäpehen wichi tä lehusey t'unhen wet elat otäyhat amel chik lhehi n'äyij.

4Tä wichi iläte Lhawuk lhämtes tä äyteschehen, wuj tä yen lefwitajayaja. Wet niwohit elh lhamel chik ithat lhamej m'ayhay tä oro tä häpe lhamsilis wok lech'ote lhele. 5Tsi Lhawuk ifwenho Moisés tä yok:

–Fwenho olhämet Israel lhayis, oyok, “Amel ahäpe wichi tä lehusey t'unhen. Chik oyik amchehen, pitajit'ala han'äyij wet oaitäyhthen. Athana tiyayej kanhi m'ayhay tä isis tä alesilatyenejwethä, wet otetshanhila m'ak chik owoyej amehen.”

6Tä mälhyejtso, Israel lhayis yikch'oye Horeb wet lhamel ileyej m'ayhay tä isis tä yen lesilatyaja.

Lhawuk lakasthawet

7Wet Moisés tachuma carpa wet itontehlä wichi lew'et. Wet Moisés yok:

–Lhey Lhawuk lakasthawet.

Chik iche elh chik t'uhläk tay'ätshaneje m'ak tä is alhoho häp Lhawuk, ihoye t'at häp lakasthawettso tä ihi lhip tä atofwehlä häp wichi lew'et. 8Wet chik Moisés ihoye häp Lhawuk lakasthawettso, wet nilhokej wichi nechephä wet takasthiche lewukwey lepelis, wet lhamel iyahinche t'at Moisés pajtha tiyäjchufwi Lhawuk lakasthawet. 9Häpet tä Moisés tiyäjchufwi, wet pule inuhchä wet ihi lepe, wet Lhawuk tahuyej Moisés. 10Wet tä wichi hiw'en tä pule takasit tä ihi lepe, nilhokej lhamel lakamchetey itihiche honhat tä ihiche lewukwey lepelis wet n'okwiyej häp Lhawuk. 11Wet Dios yämhoplhipej Moisés, hätet iwoye hin'o chik yämhoplhi lakalay'i. Tä ileyej, Moisés tapilepej wichi lew'et. Mat häp hin'o mamse tä lech'otfwa tä lhey Josué, Nun lhäs, lham ihanhiyejt'a chik yikch'oye tä ichufwi häp Lhawuk lakasthawet.

Lhawuk ipäyne lewujyaj häp Moisés

12Moisés tahuyej Lhawuk wet yok:

–Am lene'tek oyikchufwi häp wichina, mat lefwenhit'a n'oho chik ihichela elh chik iwo ot'unfwaya. Häte lefwel n'oho tä wuj tä let'ekha n'oye wet a'akäjlhi n'oyej. 13Tä mälhyejtso, chik matche täjtso, olhaip'altsen ame, fwel n'oho m'ak tä lewohiyela häpkhilek ot'ekha ame wet nittäya n'oyej tä a'akäjlhi n'oyej. Tsi lehanej t'at tä wichina aka wichi t'at.

14Lhawuk nichulho Moisés wet yok:

–Olham t'at tä owohla unfwaya, häpkhilek atamsek ihi.

15Mat Moisés yok:

–Chik am kanekache olhamel, yej chen n'ohen tä oikana. 16Tsi chik kanekache olhamel, wichi iyhäj yohlak, “Mathichet'a tä lhamel lewuk dios akäjejlhi lhamel lhäy'e laka niyat Moisés.” Tä mälhyejtso, tajlhamat chik lenekche olhamel, wet lhamel hiw'enla tä olhamel tek ohäte iwoye lhamel.

17Tä Lhawuk iläte Moisés lhämettso, wet nichulho wet yok:

–Owohiyela ämettso, tsi ot'ekha ame wet okäjlhi amej.

18Moisés lhaip'altsene wet yok:

–Wahin n'oyej chik ottey hiw'en awujyaj tä isi.

19Lhawuk nichulho Moisés wet yok:

–Opäynhila ame imälhewek o'isyaj, wet olhaiwohla olheya tä ihi tä letatache. Ohäpe Dios tä matche wet äp n'ilataj, wet elh tä otch'ote otch'ote t'at, wet elh tä op'altsen op'altsen t'at. 20Mat ofwel amho, tek attey hiw'enlan'o, tsi elh chik hiw'enn'o y'inhila. 21Lhek yahin, iche lew'et tä i'owhäye. Kasitpe tuntetsi, 22wet tä in'oyej owujyaj tä isi, chik onu lhipche oy'uythila amche häp tunte tä chowej, wet op'ohiyeja atape otkwech'o pajla'tha otfway amej. 23Wet otihiyeja kanhi otkwech'o tä op'oyej atape, wet lew'enla ochäyi. Mat tek lew'enla otte'pe.

Currently Selected:

Éx 33: WCHB

Highlight

Copy