Éx 31
31
Lhawuk t'äne hin'ol tä ihanej m'ayhay tä yenwethä
(Éx 35.30—36.1)
1Lhawuk tahuyej Moisés wet yok:
2–Lhek yahinya, olham ottshupiye hin'o tä lhey Besalel, Urí lhäs wet lechäti lhey Hur, tä lham iyej wichi tä tälhe letes Judá. 3Oyäm tapoyejej lehusek häp t'awayhat yämthilek lehanyaj ihi, lhäy'e letäfwnhayaj, wet wuj tä ihanej m'ayhay tä yenwethä. 4Lham ihanhiyeja iwoyneje lhenek tä oro wok plata wok bronce tä itech'aynej m'ak at chik häpe. 5Wet yenlawethä tuntey tä isis wet itihichela'pe, häte tachumhiyela hal'ä wet yenhilhila m'ak at chik häpe. Wet ihanhiyejat iwoyneje lhenek at chik häpe. 6Wet elh tä oyen lech'otfwaya häpe Oholiab, lham häpe Ahisamac lhäs tä iyej wichi tä tälhe letes Dan. Wet nilhokej hin'ol tä lehusek ihi oy'isej lhip lehanyaj tä ow'enho, wet lhamenlak yenlhi nilhokej m'ayhay tä one'tek lhamel yenlhi: 7Häp owukwe, lhäy'e Arca tä Ot'amajchet tä olhämtes ihi, lhäy'e Op'altsenyajw'et tä i'pe, lhäy'e nilhokej m'ayhay tä ihi owukwe, 8lhäy'e mesa lhäy'e m'ayhay tä iyej, lhäy'e n'ochäkwhis tä oro tä ts'ilak lhäy'e m'ayhay tä iyej, lhäy'e altar tä incienso lew'et, 9lhäy'e elh altar tä itshäwet tä õ'wunho lew'et, lhäy'e m'ayhay tä iyej, lhäy'e inät lehi lhäy'e lew'et tä i'pe, 10lhäy'e n'ow'uy tä n'oyik, wok oyok, Aarón lew'uy lhäy'e leles lew'uyis tä lhamel taw'uyhihichepeja tä iwoye sacerdote lechumet tä ihi owukwe, 11lhäy'e aceite tä õ'tsäypejpe ot'amajchet, lhäy'e incienso tä lenij akäjche tä ihi ow'et lhip tä Ot'amajchet. Nilhokej m'ayhay tä oyämetso, hin'ol tä ottshupiye iwohiyet'ak lhamel nenalhi mälhyej m'ak tä one'tek iwoyneje.
Ifwala tä n'ot'elakw'et
12Lhawuk tahuyej Moisés wet yok:
13–Am is chik letahuyej Israel lhayis wet fwenho olhämetna, oyok, “Is chik let'amajayej häp ifwalas tä n'ot'elakw'et. Tsi häp täjtso lhatetnek tä in'amejen häpkhilek amel lehanej, pajla'tha nichäte ales tä lepes lheley, tä olham Dios ottshupi amehen. 14Amajayej ifwala tä n'ot'elakw'et tsi oyen t'amajcheta amejen. Elh chik yenla w'et m'ayeka ifwalatso, iwohiyet'ak õkniläna. Wet hin'o chik tachumhilhi ifwalatso, õ'sohiyeja tä iyej Israel lhayis. 15Chumlhi seis ifwalas. Mat ifwala siete häpe ifwala tä n'ot'elakw'et wet ot'amajchet t'at.#Éx 34.21; Lev 23.3 Elh chik tachumhilhi ifwala tä ot'amajchet, iwohiyet'ak õkniläna.”
16-17“Tä mälhyejtso, is chik Israel lhayis t'amajej wet yen häpeya m'ak tä nittäya tä y'awoyej lhamehen, pajla'tha nichäte wichi tä lepes lheley. Häp täja otetnek tä kalelhäj tä iyej Israel lhayis lhäy'e olham. Tsi seis ifwalas tä oyenlhihte pule lhäy'e honhat, wet ifwala siete oleyej tä otchumlhi wet olhay'up'at.”
Wichi n'okwiyej w'asetaj tä oro
(Deut 9.6-29)
18Tä Dios ileyej tä yämhoplhi Moisés tä i'pe chenaj Sinaí, hiw'enho tunte lhipey tä lham ilesaynej lefwuj häp lhämtes tä i'pe.
Currently Selected:
Éx 31: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
