Éx 19
19
Israel lhayis nichäte chenaj tä Sinaí
1Nech'e tres iwel'as tälhe ifwala tä Israel lhayis yikch'oye Egipto, wet lhamel nech'e nichäte p'ante ts'anis tä Sinaí. 2Lhamel pajche yikch'oye p'ante lhip tä lhey Refidim. Wet tä nichäte p'ante ts'anis tä Sinaí, wet lhamel iwo kasthawetahi, ihi lhip tä tatayhlä chenaj tä Sinaí. 3Wet Moisés yik tä ihoye Dios tä i'pe chenaj. Wet Lhawuk t'äne wet yok:
–Fwenho wichi olhämtesna, häp Jacob leles Israel lhayis, oyok, 4“Amel lew'enay naji m'ak tä owoyeje Egipto lheley, wet ohän amehen lhip tä oihina, tet iwoyek afwenche tä aihän kana. 5Tä mälhyejtso, chik letach'ahuyay n'oye wet lewoye olhämet, ahäpkhihena oka wichi tä lhamya tä lheyayej wichi iyhäj,#Deut 7.6; 26.18; Tit 2.14 tsi Olewuk imälhewek honhat. 6Ahäpkhihena oka sacerdotes tä iwujyenn'o, wet ahäpkhihena wichi tä lhayen t'amajcheta n'oyej.”#1~Ped 2.9
Dios ne'tek Moisés ifwenho Israel lhayis nilhokej tähestso. 7Wet Moisés ihoye lhamel wet t'äne hin'ol tä thänhäy, wet ifwenho m'ak tä Lhawuk ne'tek lhamel iwoye. 8Wet nilhokej Israel lhayis tä nichulhwek wet yok:
–Olhamel owohiyela nilhokej m'ak tä Lhawuk ne'tek owoye.
Tä mälhyejtso, Moisés ifwenho Lhawuk häp wichi lhämtesna. 9Wet Lhawuk tahuyej wet yok:
–Tetshan, ohohla ame tä oihi pule tä wuj. Wet wichi ilätla n'oye chik oyämlhi amho, häpkhilek lhamel tek ikachu ame.
Lhawuk ne'tek wichi lhayen t'amajchetesayej
Wet nech'e Moisés yäme wichi lhämet tä ifwenho Lhawuk. 10Wet Lhawuk tahuyej wet yok:
–Mäh waklhat wichi ifwalana lhäy'e chik fwala, häpkhilek häpe wichi tä ot'amajchet wet lhaihut n'oye yämthilek n'okwi n'oyej. Is chik ilejen lew'uyis 11wet lhaiwaklhathen. Wet chik tres ifwalas lhamel hiw'enlan'o tä onuhlahchä wet oi'pe chenajna Sinaí. 12Mat isit'ak wichi lhaitott'ayne chenaj. Fwenho lhamel, is chik t'amaj lhamejen wet isit'ak lhamel iho'pe wok lhayämte. Tsi elh chik lhaitott'aynhiyela, letes ihi wet õ'län. 13Mat isit'ak elh chik häpek ilänej takwey, mat is chik õ'thatejlhi tuntey wok õtiyäjejlhi lothay. Hin'o wok itshäwet, is chik õ'län t'at.#Heb 12.18-20 Chik pitsaje n'ofwol tä tson'ataj ch'u, häp tä nech'e is chik wichi iho'pe chenaj lhip tä tumchä.
14Tä mälhyejtso, Moisés inuhchä tä tälhpe chenaj, wet iwaklhat wichi yämthilek häpe Lhawuk t'amajchetes wet lhaihute yämthilek n'okwiyej. Wet wichi ilejen lew'uyis, 15wet Moisés ifwenho lhamel wet yok:
–Awaklhathen ifwalana lhäy'e chik fwala, häpkhilek awak'alhen chik lew'echehi. Wet yej alet'ajej atsinha.
Lhawuk inuhchä tä tälh puleye wet i'pe chenaj lhip tä tumphä
16Wet tä tres ifwalas tä nech'e fwala, iche lep wet lepak tä tum puleye äytajiy, hätet iwoye pelhay tä t'ajanlhi, wet iche pule tä wuj tä i'pe chenaj. Wet pitsaje n'ofwol trompeta lepak tä äytaji tä tumho, wet nilhokej wichi ichettiyejchehen lenowayhyaj. 17Wet Moisés ne'tek nilhokej wichi tälhomche lew'etes wet ihoye chenaj yämthilek lhaitott'ayne Dios. Wet lhamel takasthen tä iwhäye chenaj. 18Wet wuj tutsaj tä hip'o'pe chenaj, tsi Lhawuk tumho itäj tä inuhchä wet i'pe chenaj. Tutsaj tä tälho hätet iwoye tä tälhche n'onhonthi, wet iche honhat w'ahu tä äytaji tä ihi chenaj. 19Wet lhäy'e lhip tä äytaji trompeta lepak, wet Lhawuk lepak hätet iwoye pelhay tä y'ip tä nichulho häp Moisés tä tahuyej. 20Tä Lhawuk inuhchä tä tälh puleye, i'pe chenaj lhip tä tumphä, wet ne'tek Moisés ihoye lhip tä lham ihitso. Moisés ihoye 21wet Lhawuk tahuyej tä yok:
–Nuhchä wet fwenho wichi, isit'ak lhayämte chenaj wet t'uhläk hiw'enn'o. Chik iwoye täjtso, y'inhihena. 22Häte sacerdotes tä lhaitott'ayen n'oye, chunkat is chik lhayen t'amajchetesa n'oyej häpkhilek n'am soyej lew'atshancheyaj.
23Moisés nichulho Lhawuk wet yok:
–Wichi tek lhaitott'aynhiyela chenajna Sinaí. Tsi pajchenaj lene'tek olhamel oyäm kalelhäj lhip tä lepes tä is chik wichi ihi wet oyen t'amajcheta.
24Lhawuk yok:
–Mäh nuhchä, wet chik letapil äy'ela Aarón. Mat häp sacerdotes lhäy'e wichi, isit'ak lhamel inu w'echehi häp lhip tä lepes wet t'uhläk iho n'oye. Tsi chik iwoye täjtso, osohiyeja lew'atshancheyaj.
25Tä mälhyejtso, Moisés inuhchä tä tälhpe chenaj wet ifwenho nilhokej tähestso häp Israel lhayis.
Currently Selected:
Éx 19: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
