Éx 14
14
Israel lhayis nichäte Lewomekchät
1Lhawuk tahuyej Moisés wet yok:
2–Fwenho Israel lhayis, Is chik yäpilche len'äyij wet iwo lakasthawetawhäye lhip tä lhey Pi-hahirot. Häp Migdol tumej lhip elh wet lewomekitaj tumej lhip elh, wet tek atofwehlä häp lhip tä lhey Tafwojnhi Wuk. Is chik lhamel ihi tä iwo lakasthawetahi tä iwhäye lewomekitaj lhip tä oyämetso, 3häpkhilek Egipto kaniyat yenek lhamel nhanayej ihi lhip tä lhamel ihoye wet nowayek inukwe ts'anis. 4Wet olham ot'unthila lehusek wet ihänla amel. Mat chik olänla lham lhäy'e laka nifwotaj, owujyaj tälhiyela täjtso chik wichi iti n'oyej, wet Egipto lheley ihanhiyeja tä olham ohäpe Dios tä matche.
Israel lhayis iwoye t'at Lhawuk lhämettso.
Egipto laka nifwotaj ihän Israel lhayis
5Wet õ'wo silätaye Egipto kaniyat tä Israel lhayis tajyäme tä yikhen. Tä mälhyejtso, lham lhäy'e leniyatfwas lhamel iwo elha letichunhayaj wet yok:
–¿Chipte tä y'awahintshinaj Israel lhayis tä yikhen wet nemhit lhachumyenhay ihi?
6Wet niyat ne'tek lakawos iwaklhat lehi kaletaj tä laka'tshayajcha. Tä wak'alh, yik, lhäy'e laka nifwotaj. 7Wet ichäj nilhokej kaletas tä n'oka'tshayajchal tä ihi Egipto, wet hip'ajtej seiscientos kaletas tä lhäy'e lhip tä iläfwenhen. Kaletajpej sip'äl kaniyat t'at tä yikchufwi. 8Wet Lhawuk hit'unhat niyat lehusek yämthilek ihän Israel lhayis tä lhamel pajche lhaikhajyenhen tä yikhen.
9Wet Egipto lheley lhäy'e imälhewek laka nifwotaj, iyhäj ihiche kaletas, iyhäj iche'pe yel'atas, wet lhamel ihän Israel lhayis wet ifwit tä ihi lhip tä iwhäye lewomekitaj lhip tä atott'aye Pi-hahirot tä tatayhlä lhip tä lhey Tafwojnhi Wuk. 10Tä Israel lhayis hiw'enlä Egipto kaniyat lhäy'e laka nifwotaj tä atott'aye lhamel, wuj tä lenowayhyaj ihi wet t'änch'oye Lhawuk yämthilek tach'ote. 11Wet lhamel tahuyej Moisés wet yok:
–¿Atsi m'ak tä lewoyej n'oyehen? ¿Chipte tä letonphä olhamel tä oihi Egipto? ¿Hä newache n'op'itseyhayw'etes tä ihi Egipto tä letonphä olhamel yämthilek op'itseyhay ihi ts'anisna? 12Olhamel ofwelnaj amho tä oyok, “Ch'anlha n'oyehen tä Egipto lheley ichumyenwethä olhamel.” Tej tä yen n'oyehen lakawos, is t'at. ¡Mat chik op'itseyhay ihi ts'anisna, häp tä isit'a!
13Mat Moisés nichulho lhamel wet yok:
–Yej nowayhen wet yej lhak'alwethä. Tetshan m'ak tä Lhawuk iwohiyela ifwalana tä aifwayhthen. Tsi ifwalana lepes tä lew'en Egipto lheley tä aihän. 14Woyay atamsekisa, tsi Lhawuk lhamlak iwo ka'tshayaja atapehen.
Israel lhayis yistho Lewomekchät
15Lhawuk tahuyej Moisés wet yok:
–¿Chipte tä let'än och'oye? Fwenho Israel lhayis, is chik tujlhache lew'ekyaj. 16Wet am, tiphä atsut, piyenpe lewomekitaj yämthilek lhaich'esaj inät, wet tamchäy wet Israel lhayis inukwe. 17Wet olham ot'unthila lehusek häp Egipto lheley häpkhilek lhamel ihän amel. Wet olham olänla laka niyat, lhäy'e laka nifwotaj, lhäy'e hin'ol tä takhajayhen tä iche'pe yel'atas, wet owasthihichela kaletas tä laka'tshayajchal. 18Wet nilhokej Egipto lheley ihanhiyeja tä ohäpe Dios tä matche, wet owujyaj tälhiyela täjtso chik wichi iti n'oyej.
19Wet nech'e Dios laka ángel lhäy'e pule tä ichunlä Israel lhayis, yikch'oye tä ihi wet iho w'echehi lhamel. 20Tä mälhyejtso, nech'e puletso lhaitumtejlä Egipto kaniyat kanifwotaj. Wet honatsi i'pe lhamel, mat ihutunpe Israel lhayis. Häp tä tamenej tä honatsi imälhewek tä niyat lhäy'e laka nifwotaj isakanhiyet'a Israel lhayis.
21Wet Moisés ipiyenpe takwey häp lewomekitaj. Wet Lhawuk ichene yafwthi tä äytaji tä tälhche tä ifwala tälhche, wet imälhewek honatsi tä yafwuthi. Wet inät lhaich'esaj wet nech'e tamchäy t'at. 22Wet Israel lhayis inukwe, tiyäjche t'at lechowej inät tä hätet iwoye chenhas.#Heb 11.29 23Wet Egipto kanifwotaj ihän lhamel, wet kaletas tä niyat laka'tshayajchal, lhäy'e laka sip'äl tä iche'pe yel'atas, lhamel tiyäjo lewomekitaj wet inukwe tä tamchäy, pajtha nichätho lechowej. 24Wet tä kamaj fwala tojchä, Lhawuk tä ihi pule tä y'uho iyahin Egipto kanifwotaj wet ithatpe lewit'äyhyaj. 25Wet nemhit ilunhiche laka kaletas käläy, wet häp tä iläfwenhit'a. Wet lhamel yok:
–¡Mäh n'ekch'oye Israel lhayis! ¡Lhamel lewuk dios tä iwo ka'tshayaja'pe lhamel wet tatayhlä n'amel!
26Matkat Lhawuk tahuyej Moisés wet yok:
–Piyenpe akwey lewomekitaj, wet inät yäpinhilawek wet hip'ohla'pe Egipto lheley, lhäy'e laka kaletas, lhäy'e iyhäj tä iche'pe yel'atas.
27Wet Moisés ipiyenpe takwey lewomek wet inät yäpilwek. Tä Egipto lheley fwetaj yikhen, inät hip'o'pe lhamel. Mälhyejtso tä Lhawuk hich'ahthen lhamel. Tä nech'e fwala inät ihi lew'et mälhyet lham. 28Wet tä inät yäpnho lew'et, hip'o'pe kaletas, lhäy'e hin'ol tä takhajayhen tä iche'pe yel'atas, lhäy'e nilhok nifwotaj tä tiyäjo lewomekitaj tä lhamel fwetaj ihän Israel lhayis. Y'inhen nilhokej Egipto kaniyat kasip'äl. 29Mat häp Israel lhayis inukwe t'at tä tamchäy tä lhamel yistho lewomekitaj. Inukwe lechowej inät tä hätet iwoye chenhas, lhip tumej lefwomkat wet lhip tumej lets'amkat.
30Ifwalatso Lhawuk ifwayhtej Israel lhayis häp Egipto lheley tä t'uhläk yachajo tä yen kwenkaya. Wet Israel lhayis hiw'ene lep'itseyhay tä ihi lewomekitaj lhip. 31Wet tä Israel lhayis hiw'en Lhawuk lakhajyhayaj tä wuj tä iwoye tä tatayhlä Egipto lheley, lhamel itiyej lenowayhyaj wet t'ekhaye, lhäy'e lakawo Moisés.
Currently Selected:
Éx 14: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
