1~Tes 1
1
Pablo ichene len'okhayaj häp Dios leles
1Amtena ipuhfwas tä Dios aleles tä lheyayhi hupuy tä Tesalónica.#Ap.Lh 17.1-10,13 Olham Pablo, lhäy'e Silvano,#1.1 Silvano häpe hin'o tä õyen lheya Silas tä ihi Apóstoles Lhenhay 15.22–18.5. lhäy'e Timoteo, olhamel ochen amehen olhämetna, häp amel tä lep'akayej t'at Dios Lhajcha lhäy'e Lhawuk Jesucristo.
Is che Dios lep'altsenyaj lhäy'e atamsek i'amejen.
Häpet lechayaj tä Tesalónica lheley iwoye
2Tä olhamel owopej ot'alhyaja, oyenpej tichunhayaja nilhokej amel wet owopej graciasayej Dios atapehen. 3Tsi tä lewo achayaja, wuj achumyajay tä isen tä tälhe. Wet tä ahumnhayaj ihi, wuj tä alhachaje achumtes tä lewoye. Wet tä kalelhäj aniwhayaj tä letiyej Lhawuk Jesucristo, matche tä alekhajyenhen tä leteläytej m'ak at che häpe. Tä oihi tä Dios Lhajcha tatache, olehiyejt'a tä otichunche m'ayhay tä isenna tä i'amejen.
4Ipuhfwas, Dios wuj tä aihumnhen, wet olhamel ohanej tä lham tatshupi amehen. 5Tsi tä olhamel ohänte amehen Dios Silätyaj tä Is, ts'ilakhit'a olhämtes, mat häte Espíritu tä Dios T'amajchet lakhajyhayaj tä hap'akej, wet kalelhäj tä häpe m'ak tä matche. Wet amel lehanej t'at m'ak tä olhamel owoye tä oihte amejen, tsi owopej yiyach'oye amejen m'ak tä häpkhilek aisej. 6Wet letenay m'ak tä olhamel owoye, lhäy'e m'ak tä Lhawuk iwoye, tsi tä letachumtehlä Dios lhämtes, tej tä leteläytej atayhfwas laka'tshayajay tä iti amejen,#Ap.Lh 17.5-9 mat akäjyaj ihi, tsi akäjyajna tälhe t'at Espíritu tä Dios T'amajchet. 7Wet tä nilhokej Dios leles tä ihi honhates tä Macedonia lhäy'e Acaya hiw'en m'ak tä lewoyetso, lhamel ihanej tä is che mälhyejtso m'ak tä lhamel iwoye. 8Tsi amel t'at tä letamenej tä Lhawuk lhämet lhäy'e lhip tä t'aytshi, hätet iwoye chinaj lepak tä wuj tä y'ajpe honhat. Wet ts'ilakhit'a Macedonia lheley lhäy'e Acaya lheley tä itoyen ameje achayaj tä letiyej Dios, mat häte wichi tä ihi nilhokej honhates. Tä mälhyejtso, laha ihihit'a che olhamel oyen lhämeta, tsi lhamel pajche ihanej t'at. 9Wet lhamel tä yämepej täjte olhamel oho amehen, lhamel yäme tä wuj tä is tä amel letachumlä olhamel, lhäy'e tä lewom acheyälis, wet nech'e lehänlhi häp Dios tä n'ilataj lhäy'e tä matche, wet len'okwiyej. 10Häte lhamel yen at lhämeta tä amel leniwhihlä Lhäs che tapinla tä tälh puleye, häp Jesús tä Dios inuhatphä tä tälho n'op'itseyhay. Häpe t'at lham tä n'aifwayhtej Dios lewäk tä tatay alhoho.
Currently Selected:
1~Tes 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
