San Lucas 22
22
Jelédegun áganiñu lubá Jesúsu
(Mt 26.1-5, 14-16; Mr 14.1-2, 10-11; Jn 11.45-53)
1Yaráfaali fédu le lidáani teigíniwa fein to magánatu ísi, fédu le jarítaguagüle juríu luágu meja dan le lásügürünbei láni Búngiu ánjeli áfaraguaña jígirama Ejíptona, máfaragun lumútiña jígirama Israélitagu. 2Ábati jáluajan jafádirigun juríu jáma arúfudajatiña lilúrudun Moisés ída lúba lan jáfaruni Jesúsu jilágubei, ibídiñounga joun gürígia, ladǘga janúfude jaweí.
3Ábati lagáñeiruni Máfia larítagun Júdas Iscarióte, le ában jádaangiñe láni Jesúsu dúusu apóstolugu, 4ába lídin adǘga darádu jáma jábutigu jafádiriñegu juríu jáma jábutigu tisúdaarana témpulu lun ledéregeruni Jesúsu joun. 5Ába jagúndaaragun, ába jaríñagun lun Júdas luágu jíchuguba lan seínsu lun, 6ába lañúurun darádu, ába lagúmeserun áluaja ída lúba lan gayára lan ledéregeruni joun dánme le úa jamá gürígia.
Lagúmujoún leígin Jesúsu jáma lánigu
(Mt 26.17-29; Mr 14.12-25; Jn 13.21-30; 1 Co 11.23-26)
7Ába lachǘlürün fédu le ídaanbei teigúa fein magánatu ísi, ñí lubei gíñe ladágarawagüdǘwa mudún le lánina fédu. 8Ába laríñagun Jesúsu lun Pédro lúma Juan.
—Jeíba aráanserei eígini le lánina fédu.
9Ába jálügüdüni.
—¿Jalíagi babúseera waráanseruni?
10Laríñaga joun.
—Dánme le jebélurun ubúrugun, jadúnraguba lúma ában wügǘri táu ában dináa láu dúna, jafálareime chülǘ tídoun múna to ñíjin lumúti lebélura. 11Jaríñagame lun tabúreme múna. “Laríñajare Maésturu. ¿Jigóun rúmu to ñí lubei gayára lan neígini eígini le lánina fédu jáu náni disípulugu?” 12Ábame larúfudun ában rúmu weíritu jun toúgiñegua múna, aráanseñu tíña, jaráansereime eígini ñi.
13Ába joúdin, ába jadáriruni sun cátei quei laríñaguni Jesúsu joun, ába jaráanseruni eígini lánina fédu ñi.
14Dan le lachǘlürünbei óra, ába lañúurun Jesúsu jáu láni disípulugu luágu dábula, 15ábati laríñagun joun.
—¡Oúnwenbun nabúseerun neígini eígini lánina fédu le júma lubáragiñe noúnwen! 16Ladǘga naríñajare jun luágu meígindügüya náali lan eígini lánina fédu le daríme lagúnfulirún laníchigu lídan larúeijan Búngiu.
17Ábati lanǘgün ában wéru táu diweín lújaburugu, ába leteíngiruni Búngiu, laríñaga.
—Barǘjumei le, fánreingua jumeí jídaangua, 18naríñajare jun luágu mátundügüyaadina lan diweín daríme liábin larúeijan Búngiu.
19Lárigiñe, ába lanǘgünun fein lújaburugu, ába leteíngiruni Búngiu tuágu, ába lagúbachagunun, ába líchugunun joun, aríñageina.
—Núgubu le, le lúnbei ledéregerún juágu. Lúmagiñe guetó, adǘga jumeí le, jarítaguagüleme nuágu.
20Ítara meme gíñe, lárigiñe jeígin, ába lanǘgüni wéru táu diweín, ába laríñagun.
—Niján níta le lúnbei láwiyurun lídaangiñe núgubu juágu, lun lañúurun iséri darádu.
21‘Niján wügǘri le lúnbei ledéregerunina wáma ya luágu dábula, 22luáguñadina ǘma le lúnbei nanǘgüni, áu le Wügǘri Garaǘwarügüti, áni ¡fugiábutia wügǘri le lúnbei lalúgurunina!
23Ábati jagúmeserun álügüdagua jádaangua cába lánfuna alúgurei.
Ladímurejoún luágu cába lan weírigutima
24Ába jasígenejan lánigu luágu cába lan jádaangiñe weírigutimá. 25Ába laríñagun Jesúsu joun.
—Lídan arúeijani lánina uboú le, agúmadijatiña já buri lurúeitena fulásu, camá jamuga labúreme jagía, já buri lábutigu fulásu, aríñawagúati jawágu luágu wügǘriña jamá ja gadǘgatiña fuleísei joun gürígia. 26Ánjein lídan narúeijan, mítaraanti, lubáragiñe líra, le weírigutimaabei le tímatimaati jídan lúnti lanáangun lúngua quei le ǘnabutimaabei, le agúmadijabei, lúnti ítara lan quei le esériwijabei. 27¿Cági weírigutimaabei, le añúurubei eíga luágu dábula, ódi le esériwijabei? ¿Ma le añúurubei luágu dábula? Áni áu, ítara níña jídan quei le esériwijabei.
28‘Jugúya úarabañája núma lídan noúchawagun, 29ligía níchugunbadün lun jarúeijan quei líchugunina Núguchi lun narúeijan. 30Jeígiba, gurá jugúyame luágu nidábulan yágüta siélu lídan narúeijan, ñurú jugúyame luágu buri lála urúei lun jagúseragüdüniña jadǘgawagun dúusu lirájüñü Israél.
Laríñaguni Jesúsu luágu leyéedaguba lan Pédro láu
(Mt 26.31-35; Mr 14.27-31; Jn 13.36-38)
31Aríñagati gíñe Wabúreme Jesúsu.
—Simón, Simón, amúriajaali Máfia ǘma lúma Búngiu lun gayáraabei lan loúchagunün quei lawánijoún türígu, 32ibíja lumúti, áni ayúmuraguaadina buágu lun Búngiu lun meféridirun báani bafíñen nuágu lídaanme óra ligía. Áni dánme le bagíribudun nun, rúba dǘgüdaguaü joun bíbirigu.
33Laríñaga Simón lun.
—Nabúreme, aráansetina lun nídin búma furísunrugun, o lun lan noúnwen búma.
34Laríñaga Jesúsu lun.
—Pédro, ugúñe méme, beyéedaguba náu ǘrüwa weíyaasu lubáragiñe layúgurujan gáyu, baríñaguba luágu ibídiñe nan bun.
Layárafadun lórate oúchawaguni
35Ábati laríñagun Jesúsu joun.
—Dan le noúnajanbalün maságüteiga, ni láu lágei seínsu, ni geídi, ¿ñíñein funági jemégeirun?
Ába jaríñagun.
—Uá Maésturu, memégeiruntiwa ni cáta.
36Ábati laríñagun joun.
—Ánjeinti guetó, le gaságüteti, barǘloun, barǘ ligíame lágei seínsu, le mefeínteti, alúguraloún labíte lun lagáñijan lefeínte, ladǘga wuríbati dan le. 37Naríñajare jun luágu lagúnfuliruba lan le taríñagubei Lerérun Búngiu nuágu. “Ába jabájüdüni jádan wuríbatiña.” Sun le bürǘwañubei nuágu lagúnfuliruña guetó.
38Ábati jaríñagun.
—Wabúreme, nuján bián efeín ya.
Ába laríñagun joun.
—Buíti.
Layúmuragun Jesúsu Getsemaní
(Mt 26.36-46; Mr 14.32-42)
39Ábati láfuridun Jesúsu, ába lídin luágun wǘbü le Olívos quei ligáburiñaja, ába joúdin láni disípulugu lúma. 40Dan le jachǘlürün lídan fulásu ligía, ába laríñagun joun.
—Jayúmuragua, meféridirun jumámugei jafíñen nuágu.
41Ába ladísedun Jesúsu jaweí murúsunraü, ába lájuduragun ayúmuragua lun Búngiu, 42laríñaga.
—Núguchi, ánjabu busén, séfu bána lueí oúnwenbun asúfuriruni le lúnbei nasúfurirun, madügǘwalá le nabúseerubei, le la babúseerubei adügǘwa.
43Ábati liábin ában ánjeli siélugiñe lun líchugun érei lun. 44Dan létima laweíridun ligárigu, ligíatima layúmuragun láu érei, lédedejati lísüga lueí camá jamuga oúnwenbun lédedejan jítaü, múarugun.
45Dan le lásaarun lídaangiñe layúmuragun, ába ladáriruniña disípulugu arúmuga, larúmagüdün íruni. 46Ábati laríñagun joun.
—¿Ca uágu jarúmuga? Sarájuma, jayúmuragua, meféridirun jumámugei jafíñen nuágu.
Janǘgüni Jesúsu adáüra
(Mt 26.47-56; Mr 14.43-50; Jn 18.2-11)
47Ñígili Jesúsu adímureja, ligía jayábin sarágu gürígia, Júdas, le ában jádaangiñe dúusu disípulugu, jabá jabá. Aba layárafadun lun Jesúsu lun lachúuruni. 48Ábati laríñagun Jesúsu lun.
—Júdas, ¿láu ában chúuti balúgurana, áu le Wügǘri Garaǘwarügüti?
49Játi lúmabaña Jesúsu, dan le jaríjinbalin cába lan asúsereda, ába jaríñagun lun.
—Wabúreme, ¿ageíndagua wamáña táu efeín?
50Ába lánchuguni ában jádaangiñe lánigu Jesúsu larígei lumúsun fádiri íñutimaati, le loúnwenren. 51Ába laríñagun Jesúsu.
—Ígira jumáña, buídurügaali.
Ábati lagúruruni Jesúsu larígei músu ligía, ába lareídagun. 52Ába laríñagun joun jábutigu fádirigu, joun wügǘriña weírigutiña lídan jafíñen juríu, lúma joun jábutigu tisúdaarana témpulu, ja ñǘbinbaña anǘgei.
—¿Jiábin nuágu táu efeín lúma wéwe camá jamuga jíwerutina? 53Dan lé meja júma nan témpulurugu ságü wéyu, magúrugubeitün nuágu, wel, niján jidáani lun jadǘgüni jugúndan náu, óraali lun lagúmadijan le labúremebei lubúriga.
Laríñagun Pédro luágu ibídiñe lan Jesúsu lun
(Mt 26.57-58, 69-75; Mr 14.53-54, 66-72; Jn 18.12-18, 25-27)
54Ábati járügüdüni Jesúsu, ába janǘgüni lúbiñoun fádiri le íñutimaabei, ábati lafálaruni Pédro dísegiñe. 55Ába jáfuragun wátu ñi lamídaangua baríeru, ába jañúurun geyégu láu, ába gíñe lañúurun Pédro jádan. 56Queíti taríjini ában músu ñun larǘgürügü wátu, ába teréderun aríaguei, ába taríñagun.
—Lúmañein buga gíñe Jesúsu gürígia le.
57Ába leyéedagun Pédro, laríñaga.
—Ibídiñeti wügǘri ligía nun.
58Murúsun lueígiñe, ábaya laríjini ában, ába laríñagun.
—Jánigu gíñe amǘrü.
Ába laríñagun Pédro.
—Máma jánigu áu.
59Queí buri ában óra lárigiñe, ábaya laríñagun ában.
—Inárüni luágu lúmañajañein lan wügǘri le ladǘga Galiléana gíñe.
60Ábati laríñagun Pédro.
—Ibídiñeti nun ca lan uágu badímureja.
Lídan meme óra ligía, dan le nijángua lan Pédro adímureja, ába layúgurujan ában gáyu. 61Ába ladígiragun Wabúreme Jesúsu aríja luágun Pédro, ába larítagun Pédro luágu lé buga laríñagubei Jesúsu lun. “Lubáragiñe layúgurujan gáyu ugúñe, beyéedaguba náu ǘrüwa weíyaasu.” 62Ábati láfuridun Pédro, ába layájun láu igárigu.
Jéjerajan láu Jesúsu
(Mt 26.67-68; Mr 14.65)
63Ja wügǘriña ja oúnigirubalin Jesúsu, ába jéjerajan láu, bei jameí. 64Ába jagǘraguni lágu, ába jagáyuajan ligíbuagun, aríñageina jagía.
—¡Bugúya le profétabei, aríñagabeígia ca lan agáyuajabei buágu!
65Ába buri jaríñagun sarágu ámu cátei anábei.
Jesúsu ligíbugiñe líñun-ágei lúrudu
(Mt 26.59-66; Mr 14.55-64; Jn 18.19-24)
66Dan le larúgadunbei, ába joúndaragun wügǘriña weírigutiña lídan jafíñen juríu, jábutigu jafádirigun juríu, jáma arúfudajatiña lilúrudun Moisés, ába janǘgüni Jesúsu ligíbugiñoún jadámurin le líñun-ágei lúrudu. Ába jaríñagun lun ñi.
67—Aríñagabeí woun, ¿amǘrüsan Crístubei le lúnbei lasálbaruniña gürígia?
Ába laríñagun joun.
—Ánjana aríñaga jun luágu ánja lan, mafíñebadün nun, 68ánjaün nálügüdagua, moúnabun jubádina, mígiragüdün jumáname. 69Naríñaga ában cátei jun. lúmagiñe guetó, nañúuruba, áu le Wügǘri Garaǘwarügüti, lueígiñe loúnwenren Búngiu le Súnti Gabáfuti.
70Ábati jálügüdüni súngubei.
—¿Amǘrü lubeíti Liraǘbei Búngiu?
Ába laríñagun Jesúsu joun.
—Ánja, áu, quei jaríñaguni jugúya guánarügü.
71Ábati jaríñagun.
—Mabúseerunjadiwa geféen jamá ámu woun, agáamba wamáali lídaangiñe guánarügü liyúma.
Currently Selected:
San Lucas 22: cab
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
