Matew 22

Tati adkünu dungu mafüwün kawiñ mew

(Luka 14.15-24)

1Jesus wiñome dunguy re adkünu dungu mew, fey feypi: 2“Ngünechen tañi longko ülmenngen kiñe longko ülmen reke feley kiñe wentru nielu kiñe kawiñ tañi fotüm ñi mafünngealu. 3Werküfi tañi pu werken tañi amuael engün femngechi ñi yemeafiel tati pu mangel, welu tüfey engün pilay tañi küpayael. 4Fey ka werküy kakelu werken. Fente küme yefaldunguyefi: ‘Feypiafimün tati pu mangel iñche tañi kom dewmaniewiyen ta iyael. Langümfalün tañi ellakechi motrinke kulliñ, ka itrokom pepikaley. Küpape engün tañi fotüm ñi mafün mew.’

5“Welu tati pu mangel müngeltulay engün. Kiñe tüfey engün amuy tañi pemeael tañi mapu, kangelu tripay tañi neosiameael, 6fey kakelu pu mangel nüfi ti longko ülmen ñi werken tañi kutrankayafiel ka ñi langümafiel kütu. 7Feymew tati longko ülmen rumeñma lladküy, fey werküfi tañi pu soltaw tañi langümafiel ta tiyechi pu langümchefe ka tañi lüpümüñmangeael engün tañi waria.

8“Feymew müten feypifi tañi pu werken: ‘Kom pepikaley tati mafünngealu, welu ta tiyechi pu mangel kisu engün pilay tañi küpayael engün. 9Amumün ta rüpü mew chew ñi doy miyawkemum ta che, fey mangelafimün ti mafün mew kom tamün peelchi pu che.’ 10Feymew tati longko ülmen tañi pu werken tripayey engün ta rüpü mew, ka mangelfi itrokom che tañi peel engün tati pu kümeke piwkengelu ka tati pu wesake piwkengelu. Fey tati ruka apoy ti mangelelchi pu che mew.

11“Feymew tati longko ülmen konpulu tañi peafiel tati pu mangel, inaduamfi ta kiñe wentru ñi tukunienon ta mafün mew tukukeelchi takuwün. 12Fey feypifi: ‘Weni, ¿chumngechi am konpaymi tüfa mew, fey tami tukunienon mafün mew tukukeelchi takuwün?’ Welu tati wentru dungulay.

13“Feymew tati longko ülmen feypifi tati pu poyechemekelu ta mesa mew: ‘Trarifimün. Trariñmangepe tañi namun ka tañi kuwü ka ütrüfentukünufimün ta wekun dumiñkülelu mew, chew tañi ngümayam ka kütrüram tañi foro’ 14pütrülelu am tati mangelel, welu pichiley tati dullinieel.”

Tati impuestu dungu

(Marku 12.13-17; Luka 20.20-26)

15Fey dew rupalu kom tüfachi dungu, tati pu farisew amuy engün tañi kintukadungumeafiel ta Jesus femngechi tañi welulkawelafiel chem dungu rume feypile. 16Feymew werküngey kiñeke tati kiñewkülelu kisu engün mew, ka Erode tañi küdawelkeetewchi pu che engün, tañi feypimeafiel:

—Kimeltufe, iñchiñ kimnieiñ eymi tami ayüken rüf dungu ka tami kimeltuken rüf mew Ngünechen tañi dungu. Ka kimnieiñ tami eluwkenon tami ngünenkayaetew tati pu che, inaduamüñmakenofilu am ta eymi tañi chumngechi mongen ñi nien tati pu che. 17Feypimuiñ may: ¿Chumngentufimi kay? ¿Kümey am tañi kullingeael impuestu ta Sesar, kam kümelay?

18Jesus kimüñmaeyew tañi wesa rakiduamkülen engün, fey feypieyew:

—Koyla ngünenngelu, ¿chumngelu anta kintukaduammupen?

19Pengelelmuchi ta kiñe moneda tañi kullingekemum ta impuestu.

Kisu engün ta pengelelfi kiñe denario,#22.19 denario: tati pu romache ñi pünekefelchi moneda pülata. 20fey Jesus ramtuy:

—¿Iney ñi ange am adentuley ka iney ñi üy wirintukuley ta tüfa mew?

21Fey llowdungungey:

—Tati emperador tañi üy ka tañi ange tatey ―pirkey engün.

Feymew feypi ta Jesus:

—Elufimün tati emperador kisu tañi koneltuleel, ka elufimün ñi koneltuleel ta Ngünechen.

22Fey ti pu che allkülu tüfachi dungu, afmatulewey engün. Fey elkünutufi ta Jesus, fey amutuy engün.

Tati ramtun wiñomongetun mew

(Marku 12.18-27; Luka 20.27-40)

23Feychi mew müten, kiñeke pu sadusew amuy engün ñi pemeafiel ta Jesus. Tati pu sadusew feypikey ñi ngenon tañi wiñomongetuael tati pu layelu, feymew ta nütramkalngepuy ta tüfachi dungu:

24—Kimeltufe, Moyse feypi kiñe wentru lale fey ñi nienon fotüm, tañi peñi feley tañi kureyeafiel tañi elelchi lantu domo, femngechi ñi nieael fotüm tañi lachi peñi.#22.24 Deuteronomio 25.5. 25Fey mülekefuy may iñchiñ mew regle peñiwen. Tati wünen peñi kurengey, fey lay. Fotümngenolu am, elelfi tañi lantu domo tañi peñi inapalu kisu mew. 26Ka femngechi femi tati inan wentru, fey ka femngechi tati kangelu inan wentru, ka femngechi kom kureyefi engün ti domo. Tati rüftu inan kütu femi. 27Feymew ka femngechi larpuy tati domo. 28Fey mülefule wiñomongetun, ¿chuchi müngell am tati regle pu wentru kureyetuafi tati domo, dew kom kureyekefulu engün am?

29Feymew llowdunguy ta Jesus, feypilen mew:

—Welulkakeymün, tamün kimnon mew tati wirin dungu ka Ngünechen tañi pepiluwün. 30Feychi wiñomongetule ti pu la, ngewelayay ta kureyewün ka elungewelayay rume ta domo ñi fütangeael. Ngünechen tañi#22.30 Kiñeke kuyfi wirin mew ngelay: “Ngünechen tañi”. wenu mapu müleyechi pu werken püllü reke ta feletuay engün. 31Ka tati pu la tañi wiñomongetuken, ¿adümlaymün anta eymün Ngünechen tañi feypin: 32‘Iñche ta Abraam, Isaak ka Jakob tañi Ngünechen’?#22.32 Exodo 3.6. ¡Fey Ngünechen tati pu lalelu tañi Ngünechen no, welu may tati pu mongelelu tañi Ngünechen!

33Allkülu engün tüfachi dungu, tati pu che rume afmatulewey femngechi ñi kimeltun mew ta Jesus.

Tati doy fütra werkün dungu

(Marku 12.28-34; Luka 10.25-28)

34Tati pu farisew, kimlu engün Jesus tañi ñüküfkünufiel tati pu sadusew, trawüluwi. 35Fey kiñe tati kimeltukelu ta Moyse tañi ley dungu, re ngünen mew, ramtufi ta Jesus:

36—Kimeltufe, kom tati ley dungu mew, ¿chuchi werkün dungu am doy kümey?

37Fey feypieyew ta Jesus:

“Piwkeyefinge tami Ñidol Ngünechen

kom tami piwke mew,

kom tami mongen mew,

ka kom tami kimün mew.”#22.37 Deuteronomio 6.5.

38Fey tüfa tati wünen werkün dungu ka doy falilu kom werkün dungu mew. 39Fey tati inalechi werkün dungu ka tüfa famngechi feypiley:

“Piwkeyefinge tami chafche chumngechi piwkeyeniewimi ta eymi.”#22.39 Levitiko 19.18.

40Fey tüfachi epu werkün dungu mew ta newentuwküley ta kom tati ley dungu tañi kimeltukeel tati pu pelon wentru.

¿Iney anta werküeyew tati Cristo?

(Marku 12.35-37; Luka 20.41-44)

41Petu tañi trawüluwkülen tati pu farisew, 42Jesus ta ramtufi ti pu farisew:

—¿Chem rakiduamküleymün am tati Cristo mew? ¿Iney am ñi tuwünchengey?

Llowdungungey:

—David tañi tuwünche.

43Feymew Jesus feypifi:

—¿Fey David, dungulu ti Küme Püllü ñi pepiluwün mew, chumngelu am Ñidol pifi kisu ñi yomelchengele? David am ta feypilu:

44‘Ta Ñidol Ngünechen feypifi iñche tañi Ñidol:

Anüpange iñche tañi man ad püle,#22.44 man ad püle: elungelu püramyen ka pepiluwün; fente küme wewfili wüla tami pu kayñe: miñche namun pin ürke.

wewfili wüla tami pu kayñe.’#22.44 Salmo 110.1.

45Fey ¿tati Cristo David ñi tuwünngele, chumngelu am David ta Ñidol pifi tati Cristo?

46Iney rume ta llowdungulaeyew kiñe dungu no rume, fey feychi antü mew ta fentekünuy ñi ramtumekeael engün, ka femngechi iney no rume doy ramtuwelay chem dungu no rume.

Currently Selected:

Matew 22: arn

Highlight

Copy