Geenesis 24

Secaja pohuatasano

(Geen 24.1-57)

[Abraham tariucua jiyanohua saaquiano quiriquiaa. Tamonu juuca nojuajaari nocua na seru piiquiaari, nooj, socua saaquiano puetunu na seyajinijiniojuanaatej. Na sequereeri Haraan tiacajinia na quianura na tarajanuucua tii na pajenura neyanu Isaac niquiorano. Maja cutaraari Abraham paniniu quijia Isaac caminiuria Canaan jiyajinijinio taatu. Naacuatej na seruuri Abraham tarajanu Nahor tiacajinia quiaquiaari. Isaac niquiorano Rebeca maseree na que Betuelri, na nanu Labaanjuhuaj.]

58Jiyacaritij Rebecaari piishaaree na niniuria na que, na nanu na tojiniuria. Na tiuquishacari, nojoriiri Rebeca nequesotaree:

—¿Quiaate nio pueyanota quianu paniya?

Niyacoori riucuaree:

—Jaa. Quianutaniyanijia.

59Abraham seruuri jiyacari cartesaaree, na cojiniaataja nojori quiojonuhuara. Naacuatej Rebeca nanu, na que na nucuaari na carteturee na quianura Abraham seruta, cuno seru pueyatanio. Pueyaracaanu Rebeca cojuana na seruuri nera cartesaareejuhuaj.

60Na nuhuajiria, Rebecaari naa maniniuhuaqueetasaaree maninia rupaajiniatej: Naa sequesaareeri: “Sanaanaa, quiaa cuaara quiiria serojosoo pueyapue supuetana. Quiocuajinio caneno pueya cuaara na paraa miaquejoriquia na tiacacajiniji, cuno tiacaca na cuaara na paraa miaquejoriquia na tiacacajiniji, cuno tiacaca na jiyatesocoriquiano nojoriria saniniuujia.”

61Jiyacaritij Rebecaari quiaquee. Nera pueraquenaa socua maajipohuari nata quiaareejuhuaj. Camello nijinia cajitiuyareeri. Nojoriiri Abraham seru nuhuajiyaree. Naacuatej Abraham seruuri shuquiriaatia quiariquiohua Rebeca na riniuucua.

62Abraham seru camueenujusacari, Isaacri Neegueb jiyanishano jiyajinia quijia. Quera na seru tiuquitiasacariuhua Rebeca nocua, Isaacri jiyacari shusha tiuquiriquiohua cuarijiniji. Nioori cuari sesa quijia: “Quijiajuhuanajaari cua niquijia.” 63Tenacari Isaacri cari rucuanejoriquiaa. Jiyacari camellohua niquirii nocua canujuucuatiuyanoori. 64Rebecaari mariyataa nocuaji niquiriquiaajuhuaj. Pueyano niquirii nocua catecanoyanoori. Nojuajaari Isaac quiriquiaa. Naa Rebeca niquishacaritij, Rebecaari camello nijiniji roseree. 65Abraham seru nequesotareeri:

—¿Canteja cuno pueyanoni, cuno pocua neteya cunocojini?

Seruuri na riucuaree:

—Nojuacuajaari cua camarnu, Abraham niyanu. Rebecaari nocuaji mishiquioree na jiquioco toqueta. Naa miijiacaari cuno jiyajinia niyacoojori na camishacari. 66Na coquetoosacari, seruuri Isaac pohuataree puetunu na miishanojanaa. 67Na nuhuaji, Isaacri Rebeca jaatucuree na nucua noquiyaraco suhuortujiniaacora. Isaacri tii na camiquiaari. Jiyacartij Rebecaari Isaac niyacaaquiaari. Isaacri jiyanohua neco panijia. Naacuatej Isaacri noojia cumanijiaree na nucua nuhuaji na taraajenucujusacari.

Currently Selected:

Geenesis 24: arl

Highlight

Copy