Exodo 16

Manaa jiyanishano Pueyaso tinishano jiyocuacaanuji

1Na nuhuaji, puetunu Israelcuajinio caneno pueyajanaari Elim jiyanishanojiniji quiaquiaari. Sin jiyanishano cariiquia jiyajinia tiuquiijioseeri. Cuno Sinni, cunoori Elimta Sinaii tuhuananu tajiniocoma. Sinjinia nojori tiuquiniu juucani, cunoori tari quiriquiaa segundo raca quince juuca nojori mashiniujiniji Egipto jiyajiniji. 2Naa cariiquia jiyajinia Israelcuajinio caneno pueya quishacaritij, puetunu nojorijianaari Moisees, tarajanu Aaroontaja cojiritiaquiaari juaaniu. 3Naa na sequetujuaari:

—¿Casaara Pueyaso cusojuanuyaquiquianu puetunu canaajanaa Egipto jiyajiniaja canaa quishacarini? Tii canaa quishacarijia, canaari shu capiquiucua miaquenuucua cajitiujia juhuajaniyani. Canaari na tooquiojuani. Quiarijia saniniuujia, Moisees, Aaroonnaa, ¿casaara niyara puetunu canaajanaa nia jaatiarucuaari canaa nia cusojuanuunura nio cariiquia jiyajinia canaa miaajenutani?

4Camarnu Pueyasoori jiyacari naa sequeree Moiseestej:

—Janiya jiya cajiniocuaji miaquesano tininiutianiya puetunu nio pueyarajanaani. Quiarijianij, nio cua sequesano nia tojiri: Pueya cuaara puetunu juucajanaa rerateera saa cuno juucaja na miaquetusocoriquiano. Janiyari naacua quiarijia nio pueya niatanutaniyani: canapueteja nojoririano cua sequesano tojijiaca cutarani, saniniuujia teyonu pojoritijia na rejetejacani. 5Nio nia niishirijuhuaj: naa puetunu juucajanaa nia reratejonu niaarano cua tinishano miaquesanotej, niocua sexto juucajinia socua queraatia reratere coteenu nia reratejosanojiniji.

6Naacuatej, Moisees, tarajanu Aaroonjaajanio, nojoriiri naa sequequiaari narta pueyatej:

—Quiarijia nio tenacarini, niaari niishiniutianiya Pueyasojuanaacuajaari cuno, Egipto jiyajiniji nia jaatiacanoni. 7Niaari tariqui niquiniutianiya Pueyaso shacantuuca cumaaca. Nojuajanaacuajaari nocuara nia rimiaaquenu tojiriucuaa. ¿Canapuetejaara canaani naa nia miaajenuta canaa nia juaaniuriatej?

8Moiseesri socua naa pacutequiaari narta pueya sequenutej:

—Pueyasoori nio tenacari pa niquitionutaniya shu pa miaquesocoriquiano. Tariquiicuaji saniniuujia, jiyocuacaanuji pa miasocoriquiano tininiutianiya queraatia casaa pueraari. Nojuajanaacuajaari nocuara nia rimiaaquenu tojiriucuaa. Niaari najuhuana canaa juayacujua. Naa nia juaashacari canaatej, majaari canaa nia juaaniu. ¡Niaari Pueyasojuanaa juaya!

9Na nuhuaji, Moiseesri naa tarajanu Aaroon sequereequij:

—Puetunu parta pueyajanaa quia numootere miji nojori rerejonura Pueyaso tacoji. Pueyasojuanaacuajaari nojori juaaquiosacari nojori rimiaaquenu tojiriucuaa. Nocuaji nojori cuaara quiarijia Pueyasojuanaa sequesano tojiiria.

10Aaroon numootejosacarijia puetunu narta pueyajanaa, nojori niquitiasacari cariiquia jiyajiniara, canashiyaquiji Pueyasojuanaari juhua shacantuuca cohuaja najaca muetaquiaari. 11Jiyacaritij, Pueyasoori Moiseescua pocuaree. Naa na sequereeri:

12—Janiyajanaari nio Israelcuajinio caneno pueya rimiaaquenu tojiquiaani. Quiarijianij, puetunu nojorijianaa naa quia numootere quiria: “Quiarijia nio tenacarijianij, niaari shu miaquenutaniya. Tariquiicuaji saniniuujia, niaari jiyocuacaanuji cua tinishano casaa tooquionutaniyacujua. Niaari naacua cua niishiniutianiya janiyajanaari nia Camarnuni, nia Pueyasotuhuaj.”

13Cuno tenacarijianij, juhua joojee niquishano nuhuacaari nojori suhuortucua shocua tamuetooquiaari. Tariquiicuaji saniniuujia, puetunu pueya suhuortucua shocuajanaani, shiijiaaca shushiquiaari cohuajata mariquiaa. 14Shushiquia joojequetasacari, miaquesano casaa juhua juhuariiniojua niquishano cohuajata jiya caco mariquiaa. 15Pueya jaara na niquiquiaari, tama nojorijaarijia naa sequetoojua: “¿Casaateja cunoni, naa niquishanoniquitij?” Naa sequetujuaari nojori niishiyaquiniuucua casaatenojoni. Naacuatej, Moiseesri naa nojori sequeree:

—Nioori nia miaquesocoriquiano, Pueyaso tinishano jiyocuacaanuji. 16Quiarijianij, nioori Pueyaso sequesano nia miishocoriquiano. Naa sequeyari: “Puetunu niajaniyajanaa cuaara rerateera saaja cuno juucaja nia miaquesocoriquiano nia panishano. Maninia naa nia miiritij. Niaacuajaari niishiya taa pueyate niajaniya tama nia suhuortujiniajaajani. Niquiriyatu pueyano miaquesocoriquiano cuaar quiiria querajaa suhuoco mishaja.”

17Pueyari naa miitiuquiaari taa Pueyaso sequequiaari nojori miiniuriacuajani. Noojiaqueyari queraatia reratequiaari, naajuhuaj tamasacaari secaja reratequiaariijia. 18Naacuatej, cante queraatia reratequiaarini, maninia na miatuquiaariiri, puequemaquiaajanaari. Naajuhuaj, teyonu pojoriti secaja reratequiaarinijia, maninia na tootiuquiaarijariuhuaj. Puetunu pueyajanaari naa reratetujua saaja cuno juucaja nojori miaquesocoriquiano.

19Na nuhuaji Moiseesri naa sequequiaari pueyatej:

—Majaari nia miaquesano juuraacuaca cojiritiaconu tariquiria.

20Saniniuujia noojiaqueyari maja na tojitiuniu quijia Moisees sequesano. Saaja nojori miaquesano juuraacuaca cajiritiacoquiaari tariquiriaari. Naa nojori racatasanoori porohuashiquiaari, mocuaatia jaanureeri. Moiseesri na sequesano tojiyashijiaca juaarii.

21Naacuatej, tariquiicuaji pueyari saaja cuno juucaja na miaquesocoriquiano reratetujua. Pananu jaara jaquiaari, nasa na jaratasacari, cuno casaari mohuaqueja pananucari. 22Jaara juhuaquequiaari viernes juuca, Israelcuajinio caneno pueyari cuatro suhuoco mishaja reratequiaari cuno manaajiniji puetunu niquiriyatu pueyanorajanaa. Jiyaniijianucua niquishacari naa narta pueya miishanotej, Moisees pohuatanuucua quiojoquiaariiri. 23Moiseesri narta pueya jiyaniijianucua na jiyatesano pueya riucuaree maninia saaja. Naa nojori sequereeri:

—Taaquiriirinij, pueyacuaja maninia miya. Pueyasojuanaacuaja naa sequerucuaa naa na pueya miiniuriatej. Maniniacuaja nojori miishano. Tariquiicuajaari saabado, samaatenu juuca, Pueyaso timitianu juuca. Pueyasojuanaacuajaari Seeptimo juucajinia samaatequiaari casaa puetunu nia majeetejosocoriquiano casaajanaa nio juucara. Naajuhuaj, nia capijiore puetunu nia panishano quiarijiara. Niocua maninia nia curosano cajitijiotare tariquiaria.

24Nojoriiri naa miiquiaari taa Moisees sequequiaari nojori miiniuriacuajani. Cureeconu racatatuquiaari tariquiriaari. Saniniuujia majaari na moqueconu quiquiaari. Majaari na porohuashiniu quiriijiuhuaj.

27Saniniuujia noojiaqueya pueyari saabado juuca quiojoquiaari na suhuortucuajiniji na miaquesocoriquiano reratenuucua. Majaari manaa na riuriatatunu quiquiaari. 28Naacuatej, Pueyasoori naa sequeree na Israel pueyatej:

—¿Niaateeri nia miishocoriquiano cua sequesano rejeteya saajaruhua, nia racatasocoriquiano cua sequesanotej?

30Naacuatej, Israelcuajinio caneno pueyari seeptimo juuca samaatequiaari puetunu semaanajiniajanaa.

31Israelcuajinio caneno pueyari jiyocuacaanuji Pueyaso tinishano casaa jiyaniquiquiaari manaa. Cuno, manaa jiyanishanoniqui, juhua rujuaura sohuajajau mojoriquishano quijiaari samiyatujinia tacarojotasano.

32Na nuhuaji, Moiseesri naa caminiujiuquiaari Pueyaso sequesano nojuaja narta pueyaratej:

—Nioori Pueyasojuanaa sequesano niaarano: “Querajaa suhuoco mishaja nia taquitiare cuno manaajiniji nia racatasocoriquiano. Cuno cuaara quiiria niaacuajinio caneriquiano pueya niquishocoriquiano, casaa cua miatequiaari niajaniyani cariiquia jiyacumaji nia shocotejosacari queraatia marijiani cua mashiquiniu nuhuaji niajaniya Egipto jiyajiniji.”

33Tamacari Moiseesri naa sequeree tarajanu Aaroontej:

—Querajaa suhuocorau mishaja quia taquitiare cuno manaajiniji. Quiocua patacojinia na mishinirinioj. Quiaari na nuhuaji Pueyaso Quishaquijianaa niatareequinioj. Cuaara tii racateera pueyaracaanura, niaacuajinio caneriquiano pueya niishishocoriquiano pueyaracaanu.

34Aaroonri manaa niataquiaari cojee tacoji Pueyaso Quishaquijianaa tii na quiniuria pueyaracaanu taa Pueyaso sequequiaari Moiseescuajani.

35Puetunu Israelcuajinio caneno pueyajanaari cuarenta marijia miatuquiaari manaa. Nojoriiri saa cunoocuaja naataquiaari cuaara tiuquitiushiiquiaari nojori jiyarano Canaan jiyajiniajaatijiaj.

Currently Selected:

Exodo 16: arl

Highlight

Copy