Daniel 6

Daniel jatasaanu raama juurunu sareya cari

1Tari Dariio quishacari camarnu Babilonia jiyajinia, nojuajaari jiyacari niishiriojoree ciento veinte pueya saquiriojonu. Cuno pojoriiri quiquiaari jiyaniijianucuara na jiyatesocoriquiano tiquiyocua na jiitiasano jiyacajinia. 2Dariiori socua jiuujianraca pueya jiyatequiaari camarucua cuno 120 jiyaniijianucua nacasunaa quiriquiano. Janiyari niquiriyatu cuno jiuujianraca camarucua pueyajinijinio quiriquiaani. Canaari naa camarucuara jiyatesaaquiaarini, tiquiyocua jiyacajinia jiyaniijianucuara jiyatesano nacasuriquianoni. Cuno jiuujianraca camarucuani, canaari naacua niishiquiaarini cuno 120 jiyaniijianucuatee seetanujuanaa maninia miya na poonijiosano, naacuatej, maja camarnu Dariioocuara sesa na miishano saquiriojotaaquishaanura. 3Janiya saniniuujia, janiyari cuarta camarucuajiniji socua camarnu maniniu quijiani. Naa niishijia cua quiniuucuatej, Dariioori cua jiyatenu paniquiaari camarnujuanaa cua quiniuria. 4Naa niishijia cua quiniuucuatej, cuarta camarucuaari, puetunu jiyaniijianucuarano jiyatesano pueyajanaari cua paracaaniu coteequiaari. Naacuatej nojoriiri roojotooquiaari camarnujuanaa Dariio saquiriojotatunura cucuara juucua. Cucuara saquiriojotatunu paniriquiaari maja maninia cua miiniu quiriquiaa camarnujuanaa seeratasano canaa miishocoriquiano. Puetunu cua poonijiosanojuanaa maninia miijia cua quiniuucua, cucuara saquiriojotanu panijiacaari maja quenaaja na jiitiatunu quijia casaa na tonujutunura cucuara. 5Cuno pojori cua cojiniaani, cua paraajaniuhuaj, nojoriiri jiyanohua niishiriojonuuquiaari casaa na saquiriojotatunutaniya cucuarani. Naacuatej, nojoriiri socua naa sequetooquiaaritij: “Majaari pa naata quiniutianiya Danielcuara saquiriojotanu casaa, nocuara pa najiquitiniuria camarnujuanaa. Paacuajaari niishiyani nojuajaari pueyaracaanu mojoquetaquiaa na Pueyaso na secojonura. Naa na miijionu pa tarinitiri.”

6Naacuatej, cuno camarucua puetunu jiyaniijianucuajuhuaj, tama nojorijiaarijia numootejotooquiaari nojori quianura camarnu Dariioocua tii nojori pocoojonura. Tari puetunu nio pojorijianaa quishacari camarnu Dariiocua, naa na sequetureeri:

—Canaa camarnunaa, quiaari rishiriquianojuhuanajaj. 7Canaa quia jiitiasano jiyaca cojuanaara jiyaniijianucuara quia jiyatesano pueyani, tama canaajaarijia rerejorucuaani canaa pocoojonura canaa niishiriojosanojiniji. Puetunu canaajanaari naa niishiriojorucuaa nio miiniuni: Quiarijia puetunu quia jiitiasano pueyajanaa quia numootejotere puetunu nojorijianaa cuaara nio naajio tojitiaara seetanujuanaa. Puetunu pueyajanaa cuaara tarinitiaara treinta juuca tama na pueyasora na jiyatesano casaajaaja secojonu, narta pueyanojaajanio. Canaa camarnunaa, pueya cuaara saaja quia secojotuura cutara. Saniniuujia, cante nio sequesano rejeteyanijia, cuno cuaara jatasaaria juurunu sareya cari na raama. 8Naacuatej, camarnunaa, cuno quia naajio cuaara tojishano quiiria. Quiajaniyajanaacua quia sesa naajiore cuno naajiojinia, maja tii sequesano jatanishaanura quenaaja taa quia supuetanaa Medo Persa camarucua niishiquiaari miiniucuajani.

9Naacuatej, camarnu Dariiori na sesa naajioquiaari cuno pojori naajiojinia, cuno naajio jiitianura cumaaca. 10Janiya jaara niishiquiaari cua paraari tari camarnu Dariio naajioteree na sesa nojori naajiojinia, janiyari cua tiajinia quiaarohuani. Janiyari cua sohuacamara tiuquiquiaarini. Jiyacari janiyari cua sohuaca tacuhua ritareeni. Cuno na tacuhuari jiyareta Jerusaleen tiacaacuara canetaja quijia. Janiyari jiyacari mojoquetareeni Pueyaso cua secojonura, na timitianurajaniuhuaj. Janiyari naa secojonu jiitiquiaarijuhuanani tariquiicuaji, panacari, pananu tiuquishacarinio. 11Jiyacaritij, cua paraari cucua tiuquitiamaa cua tiaco. Saaja cua riuriatatusee Pueyaso secojiyanoori, na maniniuhuaqueetaanojuhuaj. 12Naacuatej, cuno pojoriiri ritia quiacuhua camarnuta na pocoojonuhuara nojori naajionuutasanojiniji. Nocua na tiuquitiasacari, naa na sequetureeri:

—Canaa camarnunaa, ¿majatee puetunu pueyajanaa quia numootejonu quiriucuaacuaja, naajiojinia sequesano nojori tojiniuria? Cuno naajiojiniani, tii sequeyacuajaari, cante cuno treinta juucajinia na pueyasora na jiyatesano secojiyani, narta pueyano maaraja, naa miijia cuaara juurunu sareya cari jatasaaria na raama. ¿Majatee naa na sequesaanu quiriucuaaquij?

Camarnu Dariiori cuno pojori riucuaree:

—Taaquiriirinij, naacuaaquiniatejaj. Cuno naajiojiniani, tii sequeyajaariuhuaj cuno naajio cuaara quiiria seetanujuanaa taa cua supuetanaa Medo Persa camarucua niishiquiaari miiniucuajani. Jatanishoo tojetaarucuajanaa.

13Cuno pojoriiri socua naa saquiriojotariquiaa cucuaratej:

—Camarnu Dariionaa, cuno Daniel, Judeea jiyajiniji jaashanoni, nojuajaari quia rerequeteya. Majaari quenaaja na tojiniu naajiojinia quia sequesano. Canaajanaari na niquiriucuaa tariquiicuaji, panacari, pananu tiuquishacari na Pueyaso secojiyanoni.

14Camarnu Dariio jaara tojiquiaari naa cuno pojori sequesanotej, jiyanohua tacaariiri. Nojuajaari cucuaji saniniujiurii tacunu juucua. Nojuajaari juucua puetunu cuno juucajanaa saniniujiurii taa na jataniniutianiyacuaa na naajioni. Pananuuri naa na tacaashacari na tiuquitiamaajaa. 15Jiyacari cua paracaajiaca pueyari socua tiuquitiaquiaariuhua camarnu Dariiocua. Naa na sequetureeri:

—Camarnunaa, quiaacuajaari maninia niishiya taa quia Medo Persa supuetanaa camarucua niishiquiaari miiniucuajani. Naacuatej majaari quia naata quia naajiojinia quia sequesano jataniniu.

16Jiyacaritij, camarnu Dariiori socua na pueya sequereequij, janiya cuaara nocua nitiasaaria juurunu sareya cari jatasocoriquiano. Juurunu sareya cari cua jataaquishacarijia, camarnu Dariiori naa cua sequereequij:

—Cuno Pueyaso, quiaa pueyaracaanu na tojiquiaani, nojuaja cuaara quia cojuaara.

17Juurunu sareya cari raama cua jatasaanu nuhuajitij, puereetuuca saajiata na mishiquioturohuarinioj. Naa na miitiuniu nuhuaji janiyatej, camarnu Dariiori marauta na sesa naajiotajata rupanacuree juurunu sareyacua mishiquioojia saajia. Naajuhuaj, socua tojishano jiyaniijianucuara na jiyatesano sesacata na rupanacureejaariuhuaj. Camarnu Dariiori naa miiquiaaritij, seetanu na sequesanojanaa tohuatenura taa na supuetanaa Medo Persa taucuaca niishiquiaari miiniucuajanij, naajuhuaj, maja quiria cuno nojori naajio jatanishaanurajuhuaj. 18Naa na miiniu nuhuajitij, camarnu Dariiori na tiaco quiacuhua. Cuno tenacarijianij, majaari na miaquenu quirii. Cuno niucuajuhuaj, camarnu Dariiori maja na paniniu quirii na jaaquejotasaanura, na timitishaanurajuhuaj taa na jiitiquiaari miiniucuajani. Naacuatej, nojuajaari puetunu cuno niucuajanaa suteree, jiyanohua na tacaaniuucua. 19Jaara juhuaquequiaari, camarnu Dariiori ritia netemaa juurunu sareya mishiquiishaquiria. 20Catecaji naa cucua nacaree na taraajenutaari:

—Quijiajuhuanaja Pueyasojuanaa seru Danielnaa, cuno quia Pueyasoni, quiaa saaja na panishano miiquiaa pueyaracaanuni, ¿nojuajatee juurunu sareyacuaji quia cojuaree?

21Janiyari na riucuareeni:

—Cua camarnunaa, pueyaracaanu rishijiarano quia jiyateriquiani. 22Cua Pueyasoori na seru jiyarorucuaa cucuani. Nio juurunu sareya rupaa seecujutareeri maja na sanura janiya. Pueyasocuajaari niishiya janiyari sesa miyaquijiani. Naajuhuaj cua camarnunaa, majaari sesa cua miiniu quiriucuaa quiajaniya.

23Camarnu Dariiori jiyanohua timirii na tojishacari janiya. Jiyacari na pueya sequereeri janiya cuaara ritia jaashaaria raamaji. Cua jaashaanu nuhuaji, majaari quenaaja rashuyashi quiniu quiriquiaa cua cuaqueyajinia cua tiuuniuucua Pueyasoocua seetanujuanaa. 24Na nuhuaji, camarnu Dariiori na pueya jiyaramiquiquiaari cucuara saquiriojotanaa nojori quioonura puetunu necocohuatajanaa, puetunu necohuajaajanio. Puetunu nojorijianaari raama juurunu sareya cari quejoosaaquiaari. Raama na cuteyaquishacarijia, juurunu sareyari jiyocuacaanujua na niojoquiaari. Jiyareta sureesaaquiaariiri.

25Jiyacaritij, camarnu Dariiori puetunu jiyacajiniajanaa na jiitiasano pueyacua jiyaramiquiquiaari na naajio. Na naajio naajiotequiaari puetunu tamaatia na jiitiasano pueya rupaacajiniajanaari. Na naajiojinia naa nojori sequequiaariiri:

—Puetunu cua jiitiasano pueyajanaanaa, janiyari nia panitiaa maninia quiniuni. Puetunu nia poonijiosanojuanaa cuaara maninia quiiria, juhuajaniya shuquiriaatia nia quiniuria. 26Puetunu jiyacajiniajanaa cua jiitiasano pueya nia quiniuucua, janiyari nia numooteyani. Nio niaarano cua sequesano nia tojiri:

“Jiyocuacaanu quijia Daniel Pueyaso tojijiaca nia quiri. Cuno Pueyasoori quijiajuhuanajaj. Naa pueyaracaanu quiriquianojuhuanaari. Camarnujuanaa na quiniuucua, naa Camarnu na quiniuuri quiriquianojuhuanajaj. Na cumaacaari puequeyaquiriquianojuhuaj. 27Nojuajaari nocua tiuujiacaacuaji tacuna cocuaatia miyanojiniji; na jaajiajaariuhuaj. Nojuajaari nocuaji jiuujiatesano casaa miijia jiya cajiniocua, mijiriajaajanio. Nojuajaari Daniel cojuarucuaa juurunu sareyacuaji maja na sasaanura.”

28Naacuatej, Dariio quishacarijia puetunu Babilonia jiyajinia quijiaca camarnujuanaa, janiyari jiyacari tojishano camarnu quijiajaniuhuaj. Janiyari naa camarnu quiquiaarijaniuhuaj Ciro jiyanishano tahue quishacari camarnu Dariio niti. Camarnu Ciro quiniuucua Persia jiyajinijinio, nojuajaari Babilonia jiya sesa jataniquiaari Persiara.

Currently Selected:

Daniel 6: arl

Highlight

Copy