Marcos 4
4
Ri k'amb'al na'oj puwi ri awanel
(Mt. 13:1-9; Lc. 8:4-8)
1Ri Jesús xujeq tanchi kak'utun chuchi' ri mar y lik e k'i ri tikawex xemolotaj chiri' pa k'o wi Rire. Ruma k'u ri' xok chupa jun barco k'o chwi ri mar, xtz'uyi' chupa y konoje ri tikawex e k'o pana chuchi' la mar. 2Xujeq k'u kak'utun chikiwach ruk' uk'iyal taq k'amb'al na'oj, yey jun che taq ruk'utunik e wa':
3«¡Chitape'! K'o jun awanel xel b'i cha' ke'awanoq. 4Ek'uchiri' katajin che ujopopexik rija',#4:4 E rojertan chila' Israel echiri' kaki'an rawanik re ri trigo xa kakijopopej rija' pulew, tek'uchiri' kakich'uq uwi' ruk' ulew. k'o xtzaq kan chuchi' ri b'e. Xek'un k'u lo tz'ikin, y xo'lkitija b'i.
5»K'o ija' xtzaq kan pa taq ab'aj; yey ruma na jinta uk'iyal ulew chuxe', xel tan lo rija'. 6Ek'uchiri' xel lo ri q'ij, xk'atik; yey ruma na jinta ratz'ayaq, xchaqijik.
7»K'o ija' xtzaq kan pa taq k'iix. Echiri' ri k'iix xk'iyik, rija' xjiq' kan chuxe'; ruma k'u ri', na jinta reqa'n xuya'o.
8»No'j k'o ija' xtzaq kan pa chomilaj ulew. Ek'u ri' wa' xel loq, xk'iyik y lik xu'an reqa'n. K'o jujun raqan xuya treinta, jujun chik xuya sesenta y k'o ne xuya jun ciento» xcha'.
9Ek'uchiri', ri Jesús xub'i'ij tanchi chike: «China k'u ri k'o utanib'al che utayik, ¡chuta k'u ri'!» xcha'.
Sa' ruchak taq ri k'amb'al na'oj
(Mt. 13:10-17; Lc. 8:9-10)
10Echiri' ri Jesús xkanaj kan utukel, ri e k'o chunaqaj y ri kab'lajuj utijo'n xeqib' ruk', xkitz'onoj k'u che sa' ke'elawi wa k'amb'al na'oj xuya chike. 11Ek'u ri Jesús xub'i'ij chike:
«Chiwe ri'ix ya'talik kaq'alajisax runa'oj ri Dios chwi rutaqanik. No'j chike taq ri winaq na e jinta chupa rutaqanik, xa ruk' taq k'amb'al na'oj kab'i'x ronoje chike. 12Ma tob' rike ketzu'nik, e junam ruk' na ketzu'n taj; tob' ketanik, e junam ruk' na ketan taj y e ri' na jinta k'o kakimaj usuk'. Na kakaj ta k'u ri' kakitzelej kitzij cha' jela' kakuytaj kimak»#Is. 6:9-10 xcha'.
Ri Jesús kuq'alajisaj ri k'amb'al na'oj puwi ri awanel
(Mt. 13:18-23; Lc. 8:11-15)
13Ek'uchiri', xutz'onoj chike:
«¿Na kimaj ta kami usuk' ri' wa k'amb'al na'oj? ¿Sa' k'u u'anik ri' kimaj usuk' ronoje taq ri k'amb'al na'oj kank'ut chiwach?
14»Ri awanel e pacha' ri katikow Ruch'a'tem ri Dios.
15»E k'o k'u jujun tikawex e pacha' rija' xtzaq kan chuchi' ri b'e; wa' xtik Ruch'a'tem ri Dios pa kanima' y kakita ne ri'. Pero kak'un k'u lo ri Satanás y kumaj b'i ri Ch'a'tem xtiki' pa kanima'.
16»E k'o jujun chik e pacha' rija' xtzaq kan pa taq ab'aj. Wa' e ri kakita Ruch'a'tem ri Dios y na jampatana kakik'ul ruk' ki'kotemal. 17Pero ruma na e tikil ta chi utz, na kekowin taj. Ma echiri' kak'un lo ri k'amb'al kipa o keternab'ex ruk' k'ax ruma kik'ulum Ruch'a'tem ri Dios, kepajtaj k'u ri'.
18»E k'o jujun chik e pacha' rija' xtzaq kan pa taq k'iix. Wa' e ri ketaw Ruch'a'tem ri Dios. 19Pero rub'is kik'u'x chwi taq ri kajawax chike, ruk' ri sokoso'nik re ri b'eyomalil y ri kirayib'al che taq ronoje ri k'olik; ronoje k'u wa' e kusach uwach Ruch'a'tem ri Dios k'o pa kanima'. Ruma taq k'u ri' wa' na jinta k'ana kijiq'ob'alil kilitaj che ri kib'inik.
20»E k'o k'u jujun e jela' pacha' rija' xtzaq pa chomilaj ulew. Wa' e ri kakita Ruch'a'tem ri Dios, kakik'ul chi utz y lik k'o kijiq'ob'alil kilitaj che ri kib'inik. E jela' pacha' rija' lik xu'an reqa'n; k'o jujun raqan xuya treinta, jujun chik xuya sesenta y k'o ne xuya jun ciento» xcha'.
Ri k'amb'al na'oj puwi ri candil
(Lc. 8:16-18)
21Ri Jesús xub'i'ij tanchi chike:
«¿K'o neb'a junoq kutzij juna aq' y kuch'uq uwi' ruk' juna mulul re pajb'al o kuju' chuxe' ruwarab'al? ¿Na re ta neb'a kuya lo chupa ruk'olib'al chikaj? 22Ma kopon ri q'ij echiri' janipa ri na q'alajisam taj, kaq'alajisax na; yey janipa ri ewatalik, keta'maxik. 23China k'u ri k'o utanib'al che utayik, ¡chuta k'u ri'!» xcha'.
24Jewa' xub'i'ij tanchi chike:
«Lik chita chi utz janipa ri kamb'i'ij chiwe, ma “ruk' ri pajb'al kixpajan wi ri'ix, ruk' tanchi wa pajb'al ka'an pajanik chiwe.” Ek'u ri Dios kuya na chiwe lik kimaj usuk' ri kamb'i'ij, we lik e kita ri nutzij. 25Ma china ri kuk'ul chi utz janipa ri kak'ut chwach, ri' kak'ut ne más chwach y jek'ula' kumaj más. Yey china ri na kuk'ul ta ri kak'ut chwach, ri' kamaj ne che janipa ri kuch'ob'o umajom chi usuk'» xcha ri Jesús.
Ri k'amb'al na'oj puwi ruk'iyib'al rija'
26Xub'i'ij tanchi ri Jesús chike:
«Rutaqanik ri Dios e jela' pacha' juna achi kutik rija' pulew. 27Rachi chaq'ab' ke'waroq y paq'ij kawa'lij tanchik; yey na kumaj ta usuk' su'anik kel lo rija' y kak'iyik. 28Ma rulew utukel ku'an rib' che uk'iyisaxik ri tiko'n. Nab'e na e kel lo ri raqan ri tiko'n, teran k'u lo rutzik'; tek'uchiri', kawachinik. 29Ek'uchiri' ya xri'job'ik, katzaq b'i ri jos che ma e ri' xopon ruq'ijol molonik» xcha'.
Ri k'amb'al na'oj puwi rija' re moxtasa
(Mt. 13:31-32; Lc. 13:18-19)
30Xub'i'ij tanchi ri Jesús:
«¿Sa' ruk' kaqajunimaj wi rutaqanik ri Dios, o sa' juna k'amb'al na'oj kuq'alajisaj wa'? 31E pacha' rija' re moxtasa echiri' katik pulew. Ma e ija' wa' más ch'uti'n chwa taq rija' k'o che ruwachulew, 32pero echiri' tikital chik, we xk'iyik más kanimar chwa taq ri tiko'n k'o pa ri werta. Kel k'u lo nimaq taq uq'ab' y kek'un lo ri tz'ikin kexik'ik' che ruwa kaj y kejeqi' chuxe' rumu'j» xcha'.
Su'b'e ri Jesús kak'utun ruk' taq k'amb'al na'oj
(Mt. 13:34-35)
33Ruk' uk'iyal taq k'amb'al na'oj pacha' taq wa', xk'utun ri Jesús puwi Ruch'a'tem ri Dios, e chirij ri kakimaj usuk' ri winaq. 34Y na jinta k'o xuk'utu we na ruk' ta k'amb'al na'oj xu'ano; no'j chike rutijo'n xuq'alajisaj ronoje echiri' e k'o kitukel.
Ri Jesús kuq'atej ri kaqjiq' chwi ri mar
(Mt. 8:23-27; Lc. 8:22-25)
35Chupa k'u la' la jun q'ij echiri' xok raq'ab', ri Jesús xub'i'ij chike rutijo'n:
—Jo', chojq'ax ch'aqa ya' —xcha chike.
36Echiri' eb'uch'a'b'em chi kan ruk'iyal winaq, rutijo'n xkik'am b'i ri Jesús e la' chupa ri barco pa tz'ul wi Rire, yey e k'o chi jujun barcos ekachb'ilam b'i.
37Xpe k'u jun nimalaj kaqjiq' chwi ri mar. Ek'u ri ya' kuroj rib' che ri barco; y wa' xujeq kanoj che ya', ya laj kamuqutajik. 38Ek'u ri Jesús k'o pa ri barco puk'isb'al re chirij, kawar chwi jun ch'akat.
Rutijo'n xe'kik'osoj y jewa' xkib'i'ij che:
—¡Qajawal! ¿Na kok ta kami la il chiqe? ¡Ma ya kojkamik! —xecha'.
39Ek'u ri Jesús xyaktajik, xuq'atej ri kaqjiq' y jewa' xub'i'ij che ri ya':
—¡Chat-tanaloq! ¡Chatkub'uloq! —xcha che. Ri kaqjiq' xtani'ik y ri ya' xyeni'ik.
40Tek'uchiri', xub'i'ij chike rutijo'n:
—¿Su'chak lik kixi'ij iwib'? ¿Su'b'e na kub'ul ta ik'u'x wuk'? —xcha chike.
41Ewi xok lo jun xi'in ib' kuk' y xkib'i'ij chikiwach:
—¿Sa' ruwach wa' wa'chi? ¡Ma tob' ne e ri kaqjiq' y ri ya' kakikoj utzij! —xecha'.
Currently Selected:
Marcos 4: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
