Marcos 16

Ruk'astajib'al ri Jesús

(Mt. 28:1-10; Lc. 24:1-12; Jn. 20:1-10)

1Echiri' xik'ow ri q'ij re uxlanib'al, ri María ri aj Magdala, ri Salomé y ri María ruchu ri Jacobo, xkiloq' kunab'al lik ki' ruxlab' re kakib'al rucuerpo ri Jesús chupa. 2Ek'u ri nab'e q'ij re ri semana lik anim k'a e ri' kel lo ri q'ij, xeb'ek pa muqutal wi ri Jesús. 3Kakib'i'ij k'u chikiwach: «¿China kesan rab'aj chiqe k'o chuchi' ri muqub'al?» kecha'.

4Pero k'ate xkilo, rab'aj esam chik, yey wa' lik nim. 5Ek'uchiri' xeb'ok b'i chupa ri muqub'al, xkil jun ala tz'ul pa uwikiq'ab' chike, ukojom jun k'ul saq lik naj raqan. Yey rike lik xkixi'ij kib' che. 6Ek'u rire xub'i'ij chike:

—Mixi'ij iwib'. Ri'ix e kitzukuj ri Jesús ri aj Nazaret, ri xkamisax chwa cruz; Rire na jinta chi wara, ma k'astajinaq chub'i. Chiwila wa luwar pa xya'i' wi rucuerpo. 7Ek'u ri'ix jix, ji'b'i'ij chike rutijo'n y che ri Pedro: “Rire ke'ek Galilea, kanab'ej b'i chiwach; chila' k'u ri' ki'wila wi uwach, jela' pacha' ri ub'i'im chi lo chiwe” —xcha'.

8Ek'u rixoqib' xeb'el b'i chuchi' ri muqub'al lik keb'irb'otik ruma b'enaq kina'oj puwi ri xkilo; yey na jinta ne k'ana k'o xkitzijoj wi ruma kixi'im kib'.

Ri Jesús kuk'ut uwach chwach ri María ri aj Magdala

(Jn. 20:11-18)

9Ek'uchiri' k'astajinaq chi lo ri Jesús, anim tan che ri nab'e q'ij re ri semana, nab'e xuk'ut uwach chwach ri María ri aj Magdala, ri e resam b'i wuqub' itzel uxlab'ixel che. 10Rire xe'ek k'ut cha' ku'tzijoj ruk'astajib'al ri Jesús chike ri xeterej chirij yey xeb'u'riqa k'u ri' lik keb'isonik y keb'oq'ik. 11Yey rike echiri' xkito k'astajinaq chi lo ri Jesús y xilitaj uwach ruma ri María, na xkikoj taj.

Ri Jesús kuk'ut uwach chikiwach ka'ib' utijo'n

(Lc. 24:13-35)

12Tek'uchiri', ri Jesús xuk'ut uwach chikiwach ka'ib' chike rutijo'n, no'j junwi u'anikil xu'an wa' echiri' rike e ri' keb'inik keb'ek pa juyub'. 13Ek'u wa ka'ib' xetzelejik, xe'kitzijoj chike ri jujun chik tijo'n; yey wa' na xkoj tane chwikiq'ab'.

Ri taqanik xuya kan ri Jesús

(Mt. 28:16-20; Lc. 24:36-49; Jn. 20:19-23)

14K'isb'al chi k'u re, ri Jesús xuk'ut uwach chikiwach ri junlajuj utijo'n echiri' rike etz'ul chwa mexa, yey xuch'a'b'ej kipa ruma na kub'ul ta kik'u'x ruk' y ruma u'anom lik ko ri kanima', ma na xkikoj ta ke ri xeb'ilow re ri Jesús k'astajinaq chik. 15Xub'i'ij k'u chike:

—Jix che ronoje ruwachulew y chitzijoj ri Utzilaj Tzij chike konoje ri tikawex. 16Ek'u ri kekojow re y kakik'ul ri bautismo, kekolob'etajik. No'j k'u ri na kekojow ta re, kaq'at na tzij pakiwi'. 17Yey chike ri kekojow re, kilitaj k'utub'al re ruchuq'ab' ri Dios. Pa ri nub'i' keb'ekesaj b'i itzel uxlab'ixel, kech'a't pa jujun chik k'ak' ch'a'tem, 18kakichap taq ne kumatz pakiq'ab'. Yey we k'o ri xkitijo y na kina'b'em taj kamisab'al ke, na jinta k'o ku'an chike. Kakiya ri kiq'ab' pakiwi taq ri yewa'ib', y wa' kekunutajik —xcha'.

Ri Jesús katzelej chila' chikaj

(Lc. 24:50-53)

19Ek'u ri Qanimajawal echiri' ch'a'tinaq chi kuk', xk'ul pana chila' chikaj y xtz'uyi' puwikiq'ab' ri Dios. 20E taq k'u rutijo'n xeb'el b'i che utzijoxik ri Utzilaj Tzij pa taq ronoje luwar. Yey ri Qanimajawal xeb'uto'o, xuya chike kakik'ut ruchuq'ab' ri Dios cha' ruk' wa' kujikib'a' uwach ri Utzilaj Tzij. Amén.

Currently Selected:

Marcos 16: acrN

Highlight

Copy