Santiago 2

Maqa'an ri xa kojcha'w chikixo'l ri tikawex

1Alaq nu hermanos, ri kojom alaq rub'i' ri Qanimajawal Jesucristo, ri Jun lik nim uq'ij, lik na taqal ta che alaq xa kacha'w alaq chikixo'l ri tikawex. 2Ma we e la' molom ib' alaq chupa rub'i' ri Cristo y kok b'i junoq chixo'l alaq ukojom mapaq'ab' re oro y ukojom chomilaj uq'u' y kok k'u b'i juna nib'a' ukojom uq'u' q'e'l k'ojtalik, 3yey we ralaq e lik kok alaq il che uk'ulik chi utz ri ukojom chomilaj uq'u' y kab'i'ij alaq che: «Choka la, tz'ula la wara»; no'j che ri nib'a' kab'i'ij alaq: «Chat-tak'ala ri'at chiri' o chat-tz'ula pulew»; 4¿na ruk' ta neb'a wa' kacha'w alaq chiwach alaq y ku'ana k'u alaq aj q'atal tzij ruk' na'oj na jusuk' taj?

5Hermanos ri lik k'ax kanna' alaq, ta k'u alaq wa': E ri nib'a'ib' che ruwachulew ri echa'om lo ruma ri Dios cha' keb'eyomar che ri kub'ulib'al kik'u'x y cha' kek'oji' puq'ab' Rire ma e ub'i'tisim wa' chike ri k'ax kena'w re Rire. 6Pero ralaq e k'aqom b'i alaq kiq'ij ri nib'a'ib'. ¿Na e ta neb'a ri b'eyomab' ri kaki'an k'ax che alaq ma na kaki'an ta ri usuk' che alaq? ¿Yey na e ta neb'a rike ri kakik'am b'i alaq pa q'atb'al tzij? 7¿Na kech'a'tib'en ta neb'a rike chirij ri chomilaj ub'i' ri Qanimajawal, ri xkuxtax pawi' alaq?#2:7 “Ri xkuxtax pawi' alaq”: Wa' e ke'elawi rike xkik'ul ri bautismo pa rub'i' ri Qanimajawal Jesucristo.

8Lik utz we paqatzij wi ka'an alaq ruk'u'xib'al ri taqanik tz'ib'ital kan chupa Rutzij Upixab' ri Dios, ri kub'i'ij: «K'ax chana'a rawatz-achaq' jela' pacha' ri k'ax kana' awib' ri'at.»#Lv. 19:18 9No'j we xa kacha'w alaq chikixo'l ri tikawex, kamakun alaq yey ri Tzij Pixab' re ri Dios kuq'at tzij pawi' alaq ruma alaq aj palajiy tzij. 10Ma we k'o junoq kunimaj ronoje ri Tzij Pixab' yey kajaljob' k'u puwi xa juna tzij re ri Dios, ri' kamakun chirij ronoje Rutzij Upixab' ri Dios, ma wa' xa jun u'anom. 11Ma ri Dios e xb'i'n re wa': «Matmakun chirij ri k'ulanikil»#Éx. 20:14 y je tanchi wa' xub'i'ij: «Matkamisanik.»#Éx. 20:13 Jek'ula', we junoq na kamakun ta chirij ri k'ulanikil pero kamisanel, ri' kape ri q'atb'al tzij puwi' ruma xupalajij Rutzij Upixab' ri Dios.

12Mik'ow k'u chik'u'x alaq, kopon na ri q'ij kaq'at tzij pawi' alaq e chirij Rutzij Upixab' ri Dios, ri kesaw qe'oj puq'ab' ri mak. Ruma k'u ri', chajij ib' alaq che ronoje ri kab'i'ij alaq y ka'an alaq. 13Ma e junoq na kuk'ut ta ri relej uk'u'x chike ri jujun chik, jek'ula' ku'an ri Dios che rire, na kuk'ut ta ri relej uk'u'x che echiri' kuq'at tzij puwi';#Mt. 6:14-15; 18:23-35 no'j ri jun kuk'ut ri relej uk'u'x chike ri jujun chik, ri' kel pan chi utz che ronoje chupa ruq'ijol ri q'atb'al tzij.

Ri kub'ulib'al qak'u'x ruk' ri Dios kaq'alajin uwach ruk' ri kaqa'ano

14Alaq nu hermanos, ¿sa' kutiqoj che junoq we kub'i'ij lik k'o kub'ulib'al uk'u'x yey na jinta k'utub'al re wa'? ¿Kuriq nawi ri kolob'etajik xew ruma kub'i'ij k'o kub'ulib'al uk'u'x? 15Ma we e la' k'o juna hermano achi o ixoq na jinta uq'u' re ujalb'al yey k'ayew che kuriq ri kutij ri jujun q'ij, 16yey we k'o k'u junoq che alaq jewa' kub'i'ij che: «Chawanib'ej ko chi utzil chomal, chapisa awib' chi utz y chatwo'q chi utz» kacha', pero na kuya ta k'u b'i che janipa ri kajawax che, ¿sa' k'u kutiqoj ri' ri xub'i'ij b'i che? 17Jek'uri'la' ri kub'ulib'al k'u'xaj, we na jinta k'utub'al re, na jinta kutiqoj.#2:17 “Na jinta kutiqoj”: Pa ri ch'a'tem griego kub'i'ij “kaminaq”.

18Laj k'o junoq jewa' kub'i'ij: «Rilal k'o kub'ulib'al k'u'x la ruk' ri Dios; ek'u ri'in e kank'ut ri utz kan'ano. ¿Kariq nawi la kaq'alajisaj la chinuwach ri'in ri kub'ulib'al k'u'x la we na jinta k'utub'al re? ¡Na kariq ta la! No'j ri'in utz kanq'alajisaj ri kub'ulib'al nuk'u'x chiwach la ruk' taq ri kan'ano.» 19Rilal lik kakoj la xa jun ri Dios k'olik, yey wa' lik qatzij. Pero wa' na e ta ke'eloq k'o kub'ulib'al k'u'x la ruk' ri Dios, ma e taq ne ri itzel uxlab'ixel kakikojo xa jun ri Dios k'olik y ruk' xi'in ib' keb'irb'ot chwach. 20Masach na'oj la puwi'; cheta'maj la na jinta uchak ri kub'ulib'al k'u'xaj we na jinta k'utub'al re wa'. 21¿Sa' ri x'anaw jusuk' che ri qamam Abraham? ¿Na e ta neb'a ri kub'ulib'al uk'u'x xuk'utu echiri' xukoj utzij ri Dios y xuya k'u ruk'ajol Isaac chwi ri altar? 22Ruma k'u wa', kil alaq wa': Ri kub'ulib'al uk'u'x ri Abraham e xq'alajinik echiri' xukoj utzij ri Dios. Jek'ula', ri kub'ulib'al uk'u'x xtz'aqat uwach ruk' taq ri xu'ano. 23Yey Ruch'a'tem ri Dios kuq'alajisaj wa' echiri' kub'i'ij: «Ri Abraham lik xkub'i' uk'u'x ruk' ri Dios y ruma k'u ri', x'ani' jusuk' che.»#Gn. 15:6 Y xb'i'x k'u che: «Rire e ramigo ri Dios.»#Is. 41:8; 2 Cr. 20:7

24Lik k'u kil alaq ri': Ri tikawex na ku'an ta jusuk' xew ruma kub'i'ij k'o kub'ulib'al uk'u'x ruk' ri Dios, ma ri lik chirajawaxik e kuk'ut wa' ruk' ri ku'ano. 25Ma ri Rahab, ri jun ixoq na chom ta rub'inik usilab'ik, x'an jusuk' che chwach ri Dios ruma xeb'uk'ul chirocho ri e k'ak'alenel e aj Israel etaqom b'i chupa la' la tinamit y ruma xeb'uto'o cha' keb'ek pa jun chik b'e.#2:25 Ri Rahab xeburewaj ri e k'ak'alenel e aj Israel ruma xkub'i' uk'u'x ruk' ri Dios re Israel. Jos. 2:1-21

26Jun k'amb'al na'oj puwi ri ximb'i'ij e wa': E junoq we na kuxlab' ta chik, ri' kaminaq chik; jek'ula' ri' ri kub'ulib'al k'u'xaj, we na jinta k'utub'al re, e pacha' kaminaq chik.

Currently Selected:

Santiago 2: acrN

Highlight

Copy