Santiago 1

Ri Santiago kuya pan rutzil kiwach rutinamit ri Dios

1Ri'in in Santiago, in aj chak re ri Dios y re ri Qanimajawal Jesucristo. Kanya pan rutzil wach ralaq alaq ri kab'lajuj tinamit re Israel, ri alaq kichom b'i che ronoje ruwachulew.

Qach'ija uchuq'ab' ri k'axk'ob'ik

2Alaq nu hermanos, lik ki'kota alaq echiri' kik'ow alaq chupa taq uk'iyal uwach k'axk'ob'ik. 3Ma eta'am chi alaq we kach'ij alaq ri k'amb'al upa ri kub'ulib'al k'u'x alaq ruk' ri Dios, wa' kuk'am lo unimal k'u'xaj che alaq. 4Lik k'ola k'u unimal k'u'x alaq pa saqil wi cha' jela' kak'oji' alaq jusuk' y kakowir alaq chi utz, jek'uri'la' na jinta chi k'o kajawax che ri b'inik silab'ik alaq chwach ri Dios.

5We k'o k'u junoq che alaq kajawax saqil una'oj, chutz'onoj che ri Dios y wa' kaya'taj lo che, ma ri Dios na kuxu'yaj ta ri katz'onox che y na kuk'aq tane b'i kiq'ij ri tikawex k'o kakitz'onoj che. 6Yey we junoq k'o karaj kutz'onoj che ri Dios, lik chirajawaxik che, kakub'i' uk'u'x ruk' ri Dios y na keb' ta upa ri kub'ulib'al uk'u'x. Ma e ri xa keb' upa ri kub'ulib'al uk'u'x, ri' na tikil ta chi utz; e pacha' ri urepeb'al uwi ri mar xa kak'am b'i jewa' y jeri' ruma ri tew. 7Ek'u junoq jewa' u'anom, much'ob'o we k'o kuk'ul che ri Qajawal. 8Ma ri tikawex xa keb' upa che ri kuch'ob'o, ri' na jinta ukowil che taq ri ku'ano.

9E juna hermano lik na il ta ko uwach, lik ki'kota che ri yakb'al uq'ij kuya ri Dios. 10Yey ri hermano b'eyom lik ki'kota che we kak'aq b'i uq'ij ruma u'anom ch'uti'n che rib' chwach ri Dios. Ma ruk'aslem che ruwachulew xa e pacha' rukotz'i'jal raq'es, na kakowin taj. 11Ma echiri' kel lo ri q'ij yey ruk'atanil kaqa'wik, raq'es kachaqijik y rukotz'i'jal kapuqik y kasach uwach ruchomalil. Jek'uri'la' kuk'ulumaj ri b'eyom, ma tob' lik kachakunik, echiri' kakamik, ronoje rub'eyomalil kakanaj kanoq.

12Nim uq'ij ralaxik ri tikawex kuch'ij uchuq'ab' ri k'amb'al upa, ma echiri' uch'ijom chi uchuq'ab' wa', kuk'ul ri sipanik re ri k'aslemal ub'i'tisim lo ri Dios chike ri k'ax kena'w re Rire.

Qach'ija uchuq'ab' ri mak

13Echiri' k'o junoq kuna'o k'o kaminow uwach pa mak, mub'i'ij e ri Dios ri ka'anaw wa' che. Ma ri Dios na kacha ta k'ana uk'u'x che ri mak yey na kumin tane junoq chupa. 14Ma echiri' k'o junoq kuna'o k'o kaminow uwach pa mak, ri' e rurayib'al ri kak'amaw b'i re chupa. 15Ek'u taq rurayib'al kuk'am b'i pa mak, yey wa' wa mak kuk'am lo kamik. 16Alaq nu hermanos ri lik k'ax kanna' alaq, kamb'i'ij k'u che alaq: Masokotaj k'ana alaq. 17Ma ronoje chomilaj sipanik y ri utz kaya'taj chiqe, ruk' ri Dios petinaq wi. Rire e 'anayom re taq ri kawon che ruwa kaj. Yey taq wa' xa kajalk'atitaj uwach, no'j ri Dios na kajalk'atitaj ta uwach y ri q'ijsaq re Rire na kok ta q'equ'm chwach. 18Lik ruk' k'u Rire xalax wi kuya k'ak' qak'aslemal ruma ri Q'ijsaq re Ruch'a'tem, cha' jela' e koju'ana ri nab'e ralk'o'al oj ya'tal puq'ab' ri Cristo.

Qa'ana janipa ri kub'i'ij Ruch'a'tem ri Dios

19Alaq nu hermanos ri k'ax kanna' alaq, mik'ow chik'u'x alaq wa': Lik chirajawaxik che alaq kaya xikin alaq che ri kakib'i'ij ri jujun chik, no'j lik ch'ob'o na alaq raqan chi utz sa' ri kab'i'ij alaq, yey mu'an ne ri lik xa ch'itil alaq che ri oyowal. 20Ma e junoq aj oyowal na ku'an ta ri jusuk' chwach ri Dios. 21Ruma k'u la', ya'a kan alaq ronoje ri na chom ta uwach y ronoje ruk'iyal mak. E lik k'ulu alaq ruk' uch'uti'nal k'u'x alaq Ruch'a'tem ri Dios tikil chi chupa ri anima' alaq, ma wa' kukolob'ej alaq. 22E lik 'ana alaq janipa ri kub'i'ij Ruch'a'tem ri Dios y na xew ta alaq tanel re; ma we xa alaq tanel re, kasok ib' alaq we kach'ob' alaq ruma wa' kakolob'etaj alaq. 23Ma e junoq xa tanel re Ruch'a'tem ri Dios y na ku'an ta janipa ri kub'i'ij, e pacha' junoq karil rupalaj chupa juna spej. 24Yey echiri' xril b'i rupalaj, ke'ek y xa pa joq'otaj kumesk'utaj sa' ri katzu'nik. 25No'j ri lik uya'om rib' che utaqexik ri saqil Utzij Upixab' ri Dios, ri kojresaj puq'ab' ri mak, yey xaqi e ku'an wa' y na kasach ta chuk'u'x ri kub'i'ij ri Tzij Pixab' ma e 'anal re janipa ri kub'i'ij wa', ri Dios kuto' che janipa ri ku'ano.

26We k'o junoq kuch'ob'o pa saqil wi e kuloq'nimaj uq'ij ri Dios, pero na kuq'atej ta ri raq' che molot y k'axlaj ch'a'tem, ri' utukel kusok rib' yey ronoje ri ku'ano re kuloq'nimaj ri Dios, na jinta uchak. 27Ma ri saqil uloq'nimaxik uq'ij ri Qaqaw Dios e ri keqato' ri nib'a'ib' y ri malka'nib' chupa taq ri k'ax e k'o wi, yey e ri kaqachajij qib' cha' na kojtzaq ta chupa ri ch'ulilaj mak re ruwachulew.

Currently Selected:

Santiago 1: acrN

Highlight

Copy