Hebreos 7

Ri Jesús y ri Melquisedec

1Wa' wa Melquisedec e rey re ri tinamit Salem y aj chakunel chwach ri Dios Qajawxel echiri' ri Abraham tzelejinaq lo pa ri ch'a'oj pa xuch'ij wi kichuq'ab' jujun reyes. Ek'u ri Melquisedec xu'k'ulu pan ri Abraham y xutz'onoj ri rutzil uk'u'x ri Dios puwi'. 2Tek'uchiri' ri Abraham xresaj rudiezmo che ri xu'ch'aka lo pa ch'a'oj y xuya che ri Melquisedec. Ri b'i'aj Melquisedec ke'elawi: “Rey Jusuk'” yey ri jun chik ub'i' e “Rey re Salem”, wa' ke'elawi: “Rey re Utzil Chomal”.#Gn. 14:17-20 3Na jinta xeta'max pakiwi ruchu-uqaw o pakiwi ri ratz-uchaq' ri Melquisedec; y na jinta ne xeta'max puwi ri jeqeb'al re o ri k'isb'al re ruk'aslem. Na jinta k'u utaqexik rire e aj chakunel chwach ri Dios jela' pacha' Ruk'ajol ri Dios.

4Ch'ob'o pe alaq puwi runimal uwach ri Melquisedec, ma ri qamam Abraham xresaj ne rudiezmo che ri xu'ch'aka lo pa ch'a'oj y xuya che. 5Paqatzij wi, ri e aj chakunel pa Rocho Dios keb'el lo chikixo'l ri e ralk'o'al kan ri Leví. Ek'u ri taqanik utz'ib'am kan ri Moisés kub'i'ij xew rike k'o pakiq'ab' kakik'ul chike ri tinamit ri diezmo che ronoje ri k'o kuk', tob' ri keqasanik e ralk'o'al kan ri Abraham jela' pacha' ri kek'uluw re wa'. 6No'j ri Melquisedec tob' na e ta kuk'il ri ralk'o'al kan ri Leví, xuk'am rudiezmo ri Abraham, y xutz'onoj ri rutzil uk'u'x ri Dios puwi ri Abraham, ri jun x'an ri b'i'tisinik che ruma ri Dios. 7K'o k'u más uwach ri Melquisedec chwa ri Abraham ma qonoje qeta'am we k'o junoq kutz'onoj ri rutzil uk'u'x ri Dios puwi jun chik, ri' más k'o uwach chwa ri kak'uluw re wa'. 8Ri ralk'o'al ri Leví, ri kek'uluw re ri diezmo pa ri Rocho Dios, rike e tikawex xa kekamik; no'j ri Melquisedec kab'i'x che pacha' e jun k'a k'aslik. 9Pa ri taqanik re ri Moisés, e ri ralk'o'al kan ri Leví ri taqal chike kek'uluw re ri diezmo. Na ruk' ta k'u ri', echiri' ri Abraham xuya rudiezmo che ri Melquisedec, e pacha' e ri Leví xuya rudiezmo che; 10ma tob' ri Leví k'amaja' ne kalaxik, e junam ruk' k'o chi ruk' rumam Abraham echiri' xe'k'ul pan ruma ri Melquisedec. 11Chike ri e ralk'o'al ri Leví xya' wi ri keb'u'an e aj chakunel pa Rocho Dios.#7:11 Ri kichak raj chakunel pa Rocho Dios e kakik'ut ri Tzij Pixab' re ri Dios chikiwach ri tinamit, kech'aw chwach ri Dios pakiwi ri tinamit, kekikamisaj rawaj chwi raltar y kakik'ul taq ri qasa'n. We ta e la' kasuk'upitaj ri tikawex kuma rike, ¿sa' k'u kutiqoj ri' kayaktaj jun chik aj chakunel chwach ri Dios pacha' ri Melquisedec, yey na e ta pacha' ri Aarón,#7:11 Ri Aarón e nab'e kajawal raj chakunel pa Rocho Dios echiri' ri Dios xuya Rutzij Upixab' che ri Moisés. ri jun ralk'o'al kan ri Leví? 12Ma we ta k'o junoq kak'oji' aj chakunel pa Rocho Dios yey na e ta kuk'il ri e ralk'o'al kan ri Leví, ri' lik chirajawaxik wi kajalk'atix ri taqanik tz'ib'ital kan ruma ri Moisés puwi china ri taqal che ku'an aj chakunel pa Rocho Dios. 13Ek'u ri Qanimajawal, ri Jun kach'a't Ruch'a'tem ri Dios puwi',#Heb. 7:17 Rire na e ta kuk'il ri e ralk'o'al kan ri Leví pa kipeteb'em wi ri keniman chwach ri altar re ri Dios. Ma Rire e kuk'il ri ralk'o'al kan ri Judá, yey na jinta junoq chike rike xu'an aj chakunel pa Rocho Dios. 14Ma lik q'alaj ri Qanimajawal e jun chike ri e ralk'o'al kan ri Judá y pakiwi rike na jinta ne xuch'a'tib'ej kan ri Moisés puwi ri chak pa Rocho Dios. 15Y wa' más kaq'alajinik we kaqamaj usuk', ri Jun xkojik re kach'aw pakiwi ri tikawex, e pacha' ri Melquisedec. 16Ma ri Jesús na xu'an ta aj chakunel pa Rocho Dios jela' pacha' ri kub'i'ij ri taqanik re ri Tzij Pixab'; ma chupa wa' kaq'alajin wi xew ri e ralk'o'al kan ri Leví kekojik e aj chakunel pa Rocho Dios, no'j Rire xkojik ruma ruchuq'ab' ruk'aslemal na jinta kasachaw uwach. 17Ma jewa' kub'i'ij ri Dios chwi Rire:

Ri'at na jinta utaqexik katk'oji'ik at waj chak,

ri katch'aw pakiwi ri tikawex chinuwach Ri'in

jela' pacha' ri Melquisedec#Gn. 14:17-20 Sal. 110:4

kacha'.

18Ek'u ri taqanik pakiwi raj chakunel pa Rocho Dios na jinta chi kutiqoj, ma wa' na jinta ukowil y na jinta uchuq'ab' re keb'ukolob'ej ri tikawex. 19Ma na jinta junoq ku'ana jusuk' ruma ri taqanik. Yey wo'ora k'o ri más kub'ul pan qak'u'x che, y ruma k'u ri' wa', utz kojqib' ruk' ri Dios.

20Echiri' ri Dios xuya che ri Jesús kach'aw pakiwi ri tikawex chwach Rire, e lik xujikib'a' uwach ri xu'ano. 21Ma ri jujun chik aj chakunel pa Rocho Dios xa e kojotalik y na jinta k'o xjikib'ax uwach chike. No'j chwi ri Jesús lik k'o jikib'am uwach, ma chupa Ruch'a'tem ri Dios, jewa' kub'i'ij:

Ri Dios lik xujikib'a' uwach ri xub'i'ij,

y na kujek' ta k'ana rib' che wa' wa xub'i'ij:

“Ri'at na jinta utaqexik katk'oji'ik at waj chak,

ri katch'aw pakiwi ri tikawex chinuwach Ri'in

jela' pacha' ri Melquisedec.”#Gn. 14:17-20 Sal. 110:4

22E uwari'che, ri Qanimajawal Jesucristo e xjikib'an uwach jun Tzij más k'o uwach chwa ri nab'e.

23E taq ri jujun chik e aj chakunel pa Rocho Dios na kekowin taj, ma xa kekamik yey pakik'axel rike kekanaj kan jujun chik. Ruma la' lik xeb'u'ana e k'i. 24No'j ri Jesús ruma na jinta utaqexik ruk'aslemal, na jinta k'u utaqexik ri chak ku'ano re kach'aw paqawi' chwach ri Dios. 25Ruma k'u wa' na jinta utaqexik ri kolob'etajik kuya ri Jesús chike ri keqib' ruk' ri Dios ruma Rire. Yey ruma na jinta utaqexik ruk'aslemal, k'o puq'ab' xaqi kach'aw lo pakiwi' chwach ri Dios.

26E Rire ri Qajawal lik kajawax chiqe kach'aw paqawi' chwach ri Dios, ma xuk'ut jun b'inik lik jusuk', na jinta k'ana raq'ub'al xu'ano, na jinta k'ana umak, na xu'an tane re kuk' raj makib' y wo'ora yaktal uq'ij chila' chikaj chwi ronoje taq ri u'anom ri Dios. 27Na kajawax ta k'u che Rire ku'an pacha' ri xki'an ri jujun chik kajawal raj chakunel pa Rocho Dios. Ma rike ri jujun q'ij, nab'e na kakiya puwi raltar ri awaj ekamisam ruma ri kimak rike, y k'a tek'uchiri', kakiya ri awaj ekamisam ruma ri kimak ri tinamit. No'j ri Jesús xa julaj xuya rib' pa k'axk'ob'ik kuma konoje ri winaq. 28Ek'u ri taqanik re ojertan kataqan che kakoj kajawal raj chakunel pa Rocho Dios. Yey taq wa kajawal xa e achijab' y ruma ri' na kakich'ij ta u'anik ronoje Rutzij Upixab' ri Dios. No'j wo'ora ri Dios xujikib'a' uwach, Ruk'ajol e Qajawal kach'aw lo paqawi' yey na jinta k'u utaqexik xew Rire ku'an chi jusuk' y tz'aqat janipa ri uya'om ri Dios puq'ab'.

Currently Selected:

Hebreos 7: acrN

Highlight

Copy