Hebreos 6

1E uwari'che chojk'iy chwach ri Dios, na xew ta ke'ek qana'oj chwi lo ri nab'e k'utunik puwi ri Cristo; wa' e k'utunik puwi ri roq'otaxik taq kan ri na jinta kutiqoj ma xew kuk'am lo kamik, k'utunik puwi ri kub'ulib'al k'u'xaj chwach ri Dios, 2k'utunik puwi ri bautismo, k'utunik puwi taq ri kak'ul che ri Dios echiri' raj wach re riglesia kakiya ri kiq'ab' puwi junoq,#Hch. 8:17; 19:6 k'utunik puwi ri k'astajib'al ke ri ekaminaq y k'utunik puwi ri q'atb'al tzij ku'an ri Dios pakiwi ri tikawex pa ri k'isb'al q'ij yey ri kub'i'ij Rire na jinta utaqexik e ku'ano.#6:2 Kopon ri q'ij echiri' ri Dios kub'i'ij china chike kaya'i' wi ri k'aslemal na jinta utaqexik y china taq ri keya' pa ri kamik na jinta utaqexik. Ap. 20:11-15 3Kojk'iy k'u ri' xew we ri Dios kuya qak'iyib'al.

4Ma we e k'o ri xkikoj ri Q'ijsaq julajoq, lik xeki'kot ruk' ri sipanik re chila' chikaj, e jun kuk' ri xkik'ul ri Santowilaj Ruxlab'ixel ri Dios, 5lik xuk'ul kik'u'x ri Utzilaj Tzij re ri Dios y xkina' ne ruchuq'ab' ri Dios ri lik kaq'alajisax pa saqil wi chiqawach apanoq; 6yey we rike kakesaj kib' chirij ri Cristo, ri' na kaya'taj ta chi chike kakitzelej kitzij y ketzelej tanchi pa ri Q'ijsaq. Ma e pacha' ketajin tanchi che ukamisaxik Ruk'ajol ri Dios chwa ri cruz y kakik'ixb'esaj Rire chiwachil ruma ri kaki'ano.

7Ma ri k'o kik'iyib'al chwach ri Dios e jela' pacha' rulew echiri' kutz'ub'aj chi utz ri jab' katzaqik. We xel k'u lo ri' ri tiko'n, ri rutzil uk'u'x ri Dios kak'oji' puwi wu'lew, ma xuya ri kajawax chike ri xetikow re. 8No'j we chwa rulew xew kel lo k'iix y tzakam, ri' na jinta k'ana uchak chwach ri Dios. Ruma k'u ri', kaq'at tzij puwi' y chiqawach apanoq kaporox uwach.

Lik jikil uwach rub'i'tisim ri Dios chiqe

9Hermanos ri lik k'ax kanna' alaq, tob' k'u jewa' ub'i'xikil kan'an che alaq, nujikib'am nuk'u'x na esam ta ib' alaq chirij ri Cristo y k'o alaq pa ri b'e re kolob'etajik. 10Ri Dios lik jusuk' ma na kumesk'utaj ta ri chomilaj chak 'anom alaq pa rub'i' y ri rutzil k'u'xaj k'utum alaq chike ri kikojom rub'i', ma lik xenimaj alaq y k'a katajin ne alaq che u'anik wa' wo'ora. 11Yey ri kaqaj ri'oj e chijujunal alaq chuq'ub'ej ib' alaq che u'anik ri utz wo'ora y k'a echiri' kopon na ruq'ijol kak'ul alaq janipa ri oye'em alaq che ri Dios. 12Mu'an ne alaq xepu, e 'ana alaq ri utz jela' pacha' ri kaki'an janipa ri lik kub'ul kik'u'x ruk' ri Dios y na kapax ta kik'u'x che ri k'axk'ob'ik yey ruma k'u wa' kakik'ul ri ub'i'tisim lo ri Dios chike.

13Ma echiri' ri Dios xu'an rub'i'tisinik che ri Abraham, xujikib'a' uwach wa' chupa rub'i' Rire ma na jinta chi junoq más k'o uwach chwa Rire. 14Jewa' xub'i'ij che:

Paqatzij wi lik katin'an bendecir

y kank'iyarisaj kiwach rawalk'o'al Gn. 22:16-17

xcha'.

15Ri Abraham lik naj xroye'ej wa' ruk' unimal uk'u'x y jek'ula' xuk'ul rub'i'tisim ri Dios che.

16Paqatzij wi ri tikawex echiri' k'o kakijikib'a' uwach, kaki'an pub'i' junoq más k'o uwach chikiwa rike; y jek'ula' ri' kak'is ronoje ch'a'oj puwi ri xkijikib'a' uwach. 17Jek'ula', ri Dios lik xraj xuq'alajisaj pa saqil wi na kujalk'atij ta ri xub'i'ij kan chike ri kakik'ul rub'i'tisim; e uwari'che lik xujikib'a' uwach Ruch'a'tem. 18Ruk' k'u wa b'i'tisinik xujikib'a' uwach, lik q'alaj na kajalk'atix ta rub'i'tisim ri Dios, ma Rire na ku'an ta raq'ub'al. E uwari'che ri'oj ri qariqom ruto'b'al ri Dios, lik nimarinaq qak'u'x kaqa'an qe che ri b'i'tisim kan chiqe. 19Ruma k'u kub'ul pan qak'u'x che wa b'i'tisim kanoq, oj tikil chi utz y jikil uwach ri qanima',#6:19 Pa ri ch'a'tem griego kub'i'ij e ri kub'ul pan qak'u'x che e jun “ancla”. Wa' e jun nimalaj ch'ich' pacha' ansuelo tzayal che ri barco. Echiri' katz'ir chupa ri ya', kamuqutaj pa ri sanyeb' re kutak'ab'a' ri barco. ma lik kub'ul qak'u'x ruk' ri Jun okinaq k'a chila' chikaj chirij ri telón chupa ri Luwar lik Santo.#Heb. 9:3-12 20Wa' e ri Jesús, ri xok chila' quma ri'oj; y jek'ula' xujaq pan ri qab'e cha' kojopon ruk' ri Dios. Jek'ula', ri Jesús xu'ana Qajawal na jinta utaqexik kach'aw paqawi' chwach ri Dios; xu'ana k'u ri' pacha' ri Melquisedec.#Sal. 110:4

Currently Selected:

Hebreos 6: acrN

Highlight

Copy