Hebreos 4

Ri uxlanem kuya ri Dios chiqe

1K'a waq'ij ora, ri Dios kub'i'tisij ri uxlanem kuya Rire. Ruma ri', lik chajij ib' alaq ma k'axtaj k'o junoq che alaq na kopon ta che wa uxlanem. 2Ma ri'oj lik qatom ri Utzilaj Tzij puwi ri uxlanem kuya ri Dios. Jenela' rutinamit ri Dios ojertan xkita puwi ri uxlanem ub'i'tisim ri Dios chike; pero na jinta xutiqoj ri xkito, ma na xkik'ul ta wa' ruk' kub'ulib'al k'u'xaj. 3No'j we ri'oj qakojom ri Utzilaj Tzij, kojok k'u ri' pa ri uxlanem kuya ri Dios. Ma jewa' xub'i'ij Rire pa Ruch'a'tem:

E uwari'che, ruma woyowal lik xinjikib'a' uwach wa':

“Rike na keb'ok ta k'ana pa ri uxlanem kanya Ri'in”#4:3 Ri na keb'ok ta pa ri uxlanem kuya ri Dios e taq ri na kakikoj ta utzij Rire. Sal. 95:10-11

xcha'. Yey chwi lo echiri' ri Dios xu'an ruwachulew, xuk'is u'anik ruchak. 4Ma chupa Ruch'a'tem ri Dios jewa' tz'ib'ital kan chwi ruwuq q'ij:

Chupa ruwuq q'ij ri Dios xuxlan che ri chak xu'ano. Gn. 2:2

5Kamb'i'ij tanchi k'u ri kub'i'ij ri Dios pa Ruch'a'tem puwi wa uxlanem: «Rike na keb'ok ta k'ana pa ri uxlanem kanya Ri'in» kacha'. 6Ma e taq ri nab'e xkita ri Utzilaj Tzij puwi ri uxlanem ub'i'tisim ri Dios chike, na xeb'ok ta pa ri luwar re uxlanem ruma xkipalajij utzij Rire. Yey e k'o ne ri k'amaja' keb'ok pa ri uxlanem kuya ri Dios. 7E uwari'che, ri Dios uq'atom uq'ijol echiri' kub'i'tisij tanchi wa uxlanem chike ri tikawex, yey wa' e “waq'ij ora”. Ma uk'iyal junab' ik'owinaq chik echiri' ri rey David jewa' xutz'ib'aj kan pa Ruch'a'tem ri Dios:

We kita ri'ix waq'ij ora

janipa ri kub'i'ij ri Dios chiwe,

mi'an ko che ri iwanima' Sal. 95:7-8

xcha'. 8We ta e la' ri Josué asu xuya ri uxlanem chike ri tinamit,#4:8 Ri Josué xuk'am kiwach rutinamit ri Dios echiri' xeb'ok chupa ri luwar ub'i'tisim ri Dios chike. Dt. 31:7; Jos. 22:4 ri Dios na uq'atom ta chi juna chik q'ij ri' re uxlanem chiqawach apanoq. 9No'j ruma wa', qeta'am k'a k'o jun uxlanem chike rutinamit ri Dios. 10Ma china ri kok pa ri uxlanem kuya ri Dios, kuxlan ri' che ruchak, jela' pacha' xuxlan ri Dios che ri chak xu'ano.

11Qachuq'ub'ej k'u qib' cha' kojok pa ri uxlanem kuya ri Dios, cha' jela' na jinta junoq chiqe ku'ana aj palajiy tzij y kuk'ulumaj k'ut jela' pacha' ri xkik'ulumaj ri na xkikoj ta utzij ri Dios ojertan. 12Ma Ruch'a'tem ri Dios lik k'aslik y lik k'o uchuq'ab'. E ne pacha' más k'o re' chwa juna espada ka'ib' uwi re', ri kopon k'a che taq rigonsiyil y kok k'a pa k'o wi taq ri sulus chupa ri b'aq. Jek'ula' Ruch'a'tem ri Dios kopon ne k'a chupa ruk'u'x y ri ranima' juna tikawex, yey kuq'alajisaj k'u runa'oj ri tikawex y taq ri rayib'al k'o chupa ri ranima'. 13Ronoje taq ri 'anatal ruma ri Dios, chwach Rire k'o wi. Ruma k'u ri', Rire karil ronoje y na jinta k'o ewatal chwach. Yey kopon ne ri q'ij echiri' kojopon chwach Rire cha' kuq'at tzij paqawi' ruma ri qa'anom.

Ri Jesús e Qajawal kach'aw paqawi' chwach ri Dios

14Ruma k'u la' e qachuq'ub'ej qib' che ri xqajikib'a' uwach echiri' xqakoj rub'i' ri Cristo y maqesaj qib' che wa'. Ma ri Jesús, Ruk'ajol ri Dios, e Qajawal; yey Rire okinaq chila' chikaj y kach'aw paqawi' chwach ri Dios. 15Yey ri Qajawal, ri kach'aw paqawi' chwach ri Dios, lik k'o k'axna'b'al uk'u'x chiqe, ma Rire lik kumaj usuk' ronoje ri kaqik'owib'ej ri'oj oj tikawex ruma lik k'ayew chiqe kaqach'ij uchuq'ab' ri mak. Ma Rire echiri' xu'an tikawex, lik xk'am upa che ronoje jela' pacha' ka'an chiqe ri'oj, no'j Rire xuch'ij uchuq'ab' wa' y na xmakun ta k'enoq. 16E uwari'che, muxi'ij rib' qak'u'x kojqib' chwach ri Dios, ri k'o unimal rutzil k'u'xaj ruk', cha' kaqak'ul kuyb'al qamak y kaqariq to'b'al qe echiri' kajawax chiqe.

Currently Selected:

Hebreos 4: acrN

Highlight

Copy