Hebreos 11
11
Ri kub'ulib'al k'u'xaj ruk' ri Dios
1Ek'u ri kub'ulib'al k'u'xaj ruk' ri Dios ke'eloq e lik kaqajikib'a' uwach kaqak'ul ri qoye'em che Rire. Ruma ri kub'ulib'al qak'u'x, qakojom lik k'olik janipa ri kuq'alajisaj ri Dios chiqe, tob' wa' na kilitaj taj.
2Lik chom ri xtataj puwi ri kib'inik kisilab'ik ri qati'-qamam ojertan ruma ri kub'ulib'al kik'u'x ruk' ri Dios.
3Ruma ri kub'ulib'al qak'u'x, qeta'am ri Dios xch'awik y ruk' k'u ruch'a'tem xu'an ronoje ri k'olik,#Sal. 33:6, 9 ma ronoje ri kaqil wo'ora upeteb'em lo che ri na kilitaj ta uwach.
4Ri Abel, ruma ri kub'ulib'al uk'u'x, xuya chwach ri Dios jun qasa'n más utz chwa ruqasa'n ri Caín. Ruma la', ri Dios jusuk' xril rub'inik usilab'ik y xuk'ul k'u ruqasa'n. Tob' k'u kaminaq chi ri Abel, k'a kach'a't ne wo'ora quk' ruma ri kub'ulib'al uk'u'x.#Gn. 4:3-7
5Ri Enoc, ruma ri kub'ulib'al uk'u'x ruk' ri Dios, xk'am b'i chuk'aslikil chila' chikaj y na xrik'owib'ej ta ri kamik. Ek'u rucuerpo na xriqitaj taj, ma e ri Dios xuk'am b'i. Yey ri Enoc echiri' k'a k'o ne che ruwachulew, lik chom xilitaj rub'inik usilab'ik chwach ri Dios.#Gn. 5:24 6No'j e junoq na jinta kub'ulib'al uk'u'x ruk' ri Dios, ri' na kuk'ul ta k'ana uk'u'x ri Dios janipa ri ku'an chwach. Ma e junoq karaj kaqib' ruk' ri Dios, lik chirajawaxik kukojo ri Dios k'olik y kukojo Rire kuya rajil uk'axel chike ri ketzukuw re.
7Ri Noé, ruma ri kub'ulib'al uk'u'x ruk' ri Dios, xukojo echiri' xb'i'x che ruma ri Dios sa' taq ri katajin loq, tob' ne wa' k'amaja' ku'ana'. Xutaqej k'u ri xub'i'ij ri Dios che y xu'an ri nimalaj barco re keb'ukolob'ej rufamilia chupa. Yey ruma wa kub'ulib'al k'u'xaj xuk'utu, xq'alajin k'u ri kimak ri na kikojom ta utzij ri Dios y xpe k'u q'atb'al tzij pakiwi'. Ek'u ri' ri Noé ruma xkub'i' uk'u'x ruk' ri Dios, e xuk'ul ri utz kuya ri Dios chike ri e jusuk' chwach ruma ri kub'ulib'al kik'u'x ruk'.
8Ri Abraham, ruma ri kub'ulib'al uk'u'x, echiri' xsik'ix ruma ri Dios, xukoj tzij y xe'ek chupa ri luwar ub'i'tisim ri Dios che. Xel k'u b'i pa rutinamit, tob' na reta'am taj pa ke'ek wi. 9Ruma ri kub'ulib'al uk'u'x ruk' ri Dios, ri Abraham xe'jeqela pa ri luwar ub'i'tisim ri Dios che, tob' rire na aj ta chila'. Na xk'oji' ta chupa juna ja; xa xjeqi' xe' taq carpa, y jela' xki'an ri Isaac y ri Jacob, ma e ne jun rike xkik'ul ri ub'i'tisim lo ri Dios chike. 10Ek'u ri Abraham roye'em ri jun tinamit tz'aqom lo chi utz, yey wa tinamit e ri Dios xch'ob'ow re y xyakaw re.
11Rixoq Sara, ruma ri kub'ulib'al uk'u'x ruk' ri Dios, tob' lik nimalaj winaq chik y na utz tane kalanik, xya'taj che xalax jun ralab' ma xukojo ri Dios lik e ku'ana na janipa rub'i'tisim che. 12Jek'ula' ri Abraham, tob' ne xa naqaj chi k'o wi lo rukamik, xalax ruk'ajol. Yey taq ri ralk'o'al rire lik xek'iyar kiwach, xeb'u'ana lik e k'i pacha' ri kik'iyal ri ch'umil e k'o che ruwa kaj y pacha' ri sanyeb' k'o chuchi' ri mar, ri na utz taj kajilaxik.
13Konoje wa' xekamik echiri' k'amaja' kakik'ul janipa rub'i'tisim lo ri Dios chike. Ruma k'u lik xkub'i' kik'u'x ruk' ri Dios, e pacha' xkil pan wa' y lik xeki'kot ruk' taq ri xkil apanoq. Y ruk' wa', xkiq'alajisaj rike na e ta aj wara che ruwachulew, xa eb'ik'owel. 14Yey ri kakiq'alajisaj wa', kakik'utu ketajin che utzukuxik jun kitinamit pa kejeqi' wi. 15We ta e la' k'a kakich'ob' raqan puwi ri tinamit pa xeb'el lo wi, ri' lik pakiq'ab' k'o wi ketzelej tanchi chila'. 16No'j rike e xkaj jun kitinamit lik junwi, wa' e ri jun chomilaj tinamit chila' chikaj. E uwari'che, ri Dios na kak'ix ta che kab'i'x che e Dios ke rike, ma uyijb'am chi jun kitinamit lik chom chila' chikaj.
17Ek'u ri Abraham, ruma ri kub'ulib'al uk'u'x ruk' ri Dios, echiri' xk'am upa, xuk'am b'i ruk'ajol Isaac re kukamisaj chwi raltar, tob' xew ne uk'ajol ri' yey puwi rire u'anom ri b'i'tisinik ri Dios echiri' jewa' xub'i'ij kanoq: 18«Xew che rak'ajol Isaac kakipeteb'ej wi lo rawalk'o'al»#Gn. 21:12 xcha'. 19Xuya k'u ranima' ruk'ajol ma lik reta'am ri Dios k'o uchuq'ab' re kuk'astajisaj lo ri Isaac chikixo'l ri ekaminaq, y echiri' ri Dios xuya tanchi che, e pacha' xuk'ul tanchi ruk'ajol chikixo'l ri ekaminaq.
20Ri Isaac, ruma ri kub'ulib'al uk'u'x ruk' ri Dios, echiri' xeb'u'an bendecir ri Jacob y ri Esaú, xujikib'a' uwach chom taq sipanik kuya ri Dios chike chwach apanoq.#Gn. 27:27-29, 39-40 21Jek'ula', ri Jacob ruma ri kub'ulib'al uk'u'x ruk' ri Dios, echiri' xa naqaj chi k'o wi rukamik, xeb'u'an kan bendecir ri keb' uk'ajol ri José, xutz'onoj chom taq sipanik re ri Dios pakiwi' chikijujunal y lik xuloq'nimaj uq'ij ri Dios e ri' yuxul chwi ruch'ami'y.#Gn. 48
22Ri José, ruma ri kub'ulib'al uk'u'x ruk' ri Dios, echiri' xa naqaj chi k'o wi rukamik, xuq'alajisaj k'o jun q'ij raj Israel keb'el b'i chupa ri tinamit Egipto cha' ketzelej tanchi pa ri luwar ub'i'tisim ri Dios chike. Y xtaqan k'u kanoq sa' ka'an che rub'aqil echiri' keb'el b'i, ma xraj kamuqi' rub'aqil chila'.#Gn. 50:24-25; Éx. 13:19
23Ruchu-uqaw ri Moisés, ruma ri kub'ulib'al kik'u'x ruk' ri Dios, xkewaj ri Moisés oxib' ik', ma xkilo lik chomilaj ak'a. Na xkixi'ij ta k'u kib' che ri taqanik re ri rey echiri' xutaq kikamisaxik konoje ri raltaq ko alab'o e aj Israel.#Éx. 1:22–2:2
24Ri Moisés, ruma ri kub'ulib'al uk'u'x ruk' ri Dios, echiri' xnimarik na xraj ta chik kab'i'x che e ralab' rumi'al ri faraón, ri rey re Egipto. 25Xucha' k'u ri kutij k'ax junam kuk' rutinamit ri Dios#11:24-25 Rumi'al ri rey re Egipto xuk'iyisaj ri Moisés y xu'an ralab' che. Ruma k'u wa' lik k'o uwach ri Moisés, pero echiri' xnimarik xuya kan wa' cha' e ku'an jun kuk' rutinamit ri Dios, tob' rike na jinta kiwach ma xa e aj chak pakiq'ab' ri tinamit Egipto. Éx. 2:10-12 chwa ri kak'oji' chupa ruqusil ri mak, ma wa' xa kik'owik. 26Ek'u ri b'eyomalil más k'o uwach chwach rire e ri kach'amixik pacha' x'an che ri Cristo, na e ta taq ri b'eyomalil re Egipto; ma runa'oj e k'o pan puwi ri rajil uk'axel kuya ri Dios che chwach apanoq. 27Ruma k'u ri kub'ulib'al uk'u'x ruk' ri Dios, xel b'i Egipto y na xuxi'ij ta k'ana rib' chwa ri royowal ri rey. Ek'u ri xu'ano e lik xuchuq'ub'ej rib' che ri ku'ano, ma e pacha' lik kutzutza' chi pan uwach ri Dios, tob' Rire na kilitaj ta uwach. 28Ruma k'u ri kub'ulib'al uk'u'x ruk' ri Dios, e xu'an ri xtaq che; xuyijb'a' ri nimaq'ij Pascua y xtaqan che kasoq' ukik'el b'exex che taq ruchi' ja cha' echiri' kik'ow ru ángel ri Dios, na kukamisaj ta kan ri nab'e kalk'o'al ri e aj Israel.#Éx. 12:21-30
29Ri tinamit Israel, ruma ri kub'ulib'al kik'u'x ruk' ri Dios, xeb'ik'ow chupa ri mar Rojo echiri' wa' xjaqataj upa y e la' pa chaqi'j ulew xeb'ik'owik. No'j echiri' raj Egipto xkijeq keb'ik'ow chupa ri mar, ri ya' xuk'ul tanchi rib' y jela' xejiq' kan chupa.#Éx. 14:21–15:21
30Raj Israel, ruma ri kub'ulib'al kik'u'x ruk' ri Dios, xeb'in chirij ri tinamit Jericó wuqub' q'ij, y tek'uchiri' xwuluwub' lo ri tapia re ri tinamit.#Jos. 6:12-21
31Ri Rahab e jun ixoq retz'ab'em uwa uq'ij kuk' achijab'; na ruk' ta k'u ri', ruma xkub'i' uk'u'x ruk' ri Dios, na xkam ta kuk' ri e aj palajiy tzij e aj Jericó, ma rire xeb'uk'ul chi utzil chomal ri e k'ak'alenel e aj Israel y xeb'uto'o.#Jos. 2:1-21; 6:22-25
32¿Sa' chi más kamb'i'ij? Ma na ku'an ta wa jun q'ij kinch'a't chwi ri kub'ulib'al kik'u'x ri Gedeón, ri Barác, ri Sansón, ri Jefté, ri David, ri Samuel y ri q'alajisanelab'. 33Ruma ri kub'ulib'al kik'u'x ruk' ri Dios, e k'o ri xkich'ij uchuq'ab' uk'iyal tinamit, xetaqan k'u pakiwi' chi jusuk' y lik xkiriq ri to'b'al re ri Dios b'i'tisim lo chike. E k'o ne ri xkitz'apij ruwake' ri koj cha' na ketij ta kuma. 34E k'o ne ri xek'aq chupa ri aq' y na xek'at taj. E k'o ri xekolob'etaj chwach ri kamik ruk' espada. E k'o ri xya'i' kichuq'ab' echiri' na jinta kichuq'ab', lik xnimar ri kichuq'ab' pa ch'a'oj y ruma k'u ri', ri soldados e aj naj xeb'animaj b'i. 35E k'o ne ixoqib' xkik'ul ri kalk'o'al e k'astajinaq tanchi lo chikixo'l ri ekaminaq.
No'j e k'o jujun chik tikawex, ruma ri na xkaj taj kakoq'otaj ri Dios, e xkicha' ri na xetzoqpix ta chub'i y ruk' k'u unimal k'axk'olil xekamik, ma e xkicha' ri jun chomilaj k'astajib'al re k'aslemal na jinta utaqexik. 36E k'o jujun chik lik xech'amixik, xjich' kipa, xeya'i' pa karena y xeya' pa cárcel. 37E k'o ri lik xk'am taq kipa, e k'o ri xekamisax pa ab'aj, e k'o ri xq'ati' kipa ruk' sierra, e k'o ri xekamisax ruk' espada. E k'o ri lik xesutinik kikojom kiq'u' xa re utz'u'mal b'exex o kaprux, x'an nib'a' chike, lik xpaxir k'u kik'u'x y lik x'an k'ax chike. 38Rike xeb'in pa taq luwar katz'intz'otik, xeb'in pa taq juyub', xejeqi' che ruwachulew xe' taq pek y pa taq jul. E taq k'u wa' wa winaq re ruwachulew na taqal tane chike kek'oji' wa nimaq e aj chak re ri Dios chikixo'lib'al.
39Tob' konoje wa' lik xkik'ut ri kub'ulib'al kik'u'x ruk' ri Dios, na jinta k'u junoq chike xuk'ul wara che ruwachulew ronoje rub'i'tisim lo ri Dios chike. 40Ma ojertan ri Dios uch'ob'om chi lo ri más chom#11:40 “Ri más chom”: Wa' e ke'elawi ri kolob'etajik kuya ri Cristo. ku'ana' cha' kutz'aqatisaj lo ri karaj ku'an quk' ri'oj junam kuk' rike.
Currently Selected:
Hebreos 11: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
