Soponi 2
2
Njesigənea̰ ɓar njékula dɔ deeje
1Seḭ ginkoji dəwje gə́ rɔ sí kul el lé
Maji kar sí ə̰jije ta meḛ sí’g ləm,
Tḛje meḛ sí ləm tɔ
2Kédé ɓa gə mba kar godndu gə́ wɔji dɔ sí aw lée’g béréré ɓəi ləm
Kar ndəa neelé dəs to gə́ tisa kó gə́ dəs ɓəi ləm,
Kédé ɓa kar oŋg lə Njesigənea̰ gə́ to asəna gə kɔr pər bèe lé ɔm dɔ sí’g ɓəi ləma,
Kédé ɓa gə mba kar ndɔ oŋg lə Njesigənea̰ lé teḛ dɔ sí’g ɓəi ləm tɔ.
3Seḭ njékula dɔ síje lai gə́ dɔ naŋg neelé
Maji kar sí saŋgje Njesigənea̰,
Seḭ lai gə́ raje né gə́ ndukunje ləa wɔji lé!
Maji kar sí ndolèje goo meekarabasur ləm,
Gə saŋgje loo kula dɔ sí ləm tɔ.
Banelə Njesigənea̰ a kya̰ sí ndɔ oŋg’d ləa.
Njesigənea̰ tɔji jia ar ginkoji dəwje gə raŋg
4Mbata Gajaje lé d’a kuba dee kya̰ dee ləm,
Ɓee gə́ Askalo̰ a tel to dɔdilaloo ləm,
Asdodje lé d’a tuba dee loo gə́ kàr aar daŋdɔ ya ləma,
Ekro̰je kara d’a tɔs dee ɓɔgədɔ ɓɔgədɔ tɔr dee ləm tɔ .
5Meeko̰ a koso dɔ dəwje lai gə́ d’isi ta baa-boo-kad’g
Gə́ to ginkojije gə́ Keret.
Seḭ Kana̰je gə́ dɔ naŋg gə́ Pilisti lé
Njesigənea̰ pata ɔs sí ne rəw!
Yeḛ pana:
N’a tuji sí pugudu kar dəwje godo mee ɓee’g neelé.
6Ta baa-boo-kadje lai lé d’a tel to loo-ko̰-mu ləm,
Gə loo-si njékulbadje ləma,
Gə loo-kaar koso-nékulje ləm tɔ.
7Ta baa-boo-kadje neelé d’a to mbata ges gel-bɔje lə Juda gə́ nai,
Lée neelé ɓa d’a kul rɔ dee keneŋ:
Loondul ndá d’a kwa rɔ dee mee kəije’g lə Askalo̰:
Mbata Njesigənea̰, Ala lə dee lé
Mée a kwəi dɔ dee’g el
Ndá yeḛ a kɔr dee ɓee-ɓər’g lə dee tel ree sə dee.
8Neḛ n’oo ta tajikilje lə Moabje ləm,
Gə nérɔkulje lə Amo̰je ləm tɔ
Loo gə́ dee d’ula ne sul dɔ koso-dəwje’g lə neḛ ləm,
D’unda ne dɔ dee tar gə kəsta
Naji ne sə dee rəw-nimje ləm tɔ .
9Gelee gə́ nee ɓa Njesigənea̰ gə́ njeboo-néje,
Ala lə Israɛlje lé pa ne bèe pana:
Neḛ n’to njesikəmba ya!
Moab a tel to kasəna gə Sɔdɔm ləm,
Amo̰je kara d’a tel to kasəna gə Gɔmɔr ləm tɔ.
D’a to loo gə́ kun-pɔrɔrɔje d’a taa loo keneŋ pəl-pəl ləm,
D’a to kasəna gə puna kad ləma,
D’a to dɔdilaloo ya saar gə no̰ ləm tɔ.
Ges koso-dəwje lə neḛ
D’a taa néje lə dee ləm,
Ges ginkoji dəwje lə neḛ kara
D’a kiŋga ɓee lə dee gə́ né ka̰ dee-deḛ ya ləm tɔ .
10Néje neelé a teḛ dɔ dee’g
Mbata beelé lə dee,
Mbata dee d’ula sul dɔ koso-dəwje’g lə Njesigənea̰ gə́ njeboo-néje lé
D’unda ne dɔ dee tar.
11Njesigənea̰ a to ɓəl kədm-kədm kəm dee’g
Mbata yeḛ a tuji magəje lai gə́ dɔ naŋg nee pugudu-pugudu ya,
Yee ɓa nana kara a kunda barmba nea̰’g mee ɓee’g ləa ləm,
Gə dɔgoré-looje’g lə ginkoji dəwje gə raŋg ləm tɔ.
12Seḭ Etiopije kara
N’a kar sí wəije yoo-kiambas tɔ .
13Yeḛ a kula jia par gə́ dɔgel ndá
Yeḛ a tuji Asirije ləm,
Yeḛ a kar ɓee gə́ Ninibə tel to nduba piu-piu ləma,
Naŋg ləa a tudu kurum-kurum asəna gə dɔdilaloo bèe ləm tɔ .
14Koso-nékulje d’a to keneŋ gə daje lai gə́ gə gel dee gel dee,
Dogoro dee gə nduru d’a si mbuna mburṵ gaji kagje gə́ tar,
Ndu no̰ lə dee a ɓar kəmbolèje’g,
Nétujiloo a to loo-kandə-kəi’g
Mbata kag-Sɛdrə gə́ d’o̰ ne kaar kəije lə dee lé
D’a tusu ŋgəw-ŋgəw.
15Aa ooje, yee ɓa gə́ ɓee-boo gə́ dəwje gə́ keneŋ d’isi dan rɔlel’g
Nda ne meḛ dee kaḭ dɔ rɔ dee’g
Ra né meḛ dee’g pana:
Neḛ ya ɓó né gə́ raŋg godo, to neḛ ya!
Ɗi togə́bè wa. Yee tuji pugudu ŋga.
Yee tel to loo-to daje gə́ wala!
Deḛ lai gə́ dəs mbɔree’g lé
D’a kur kɔl piu jeŋ ne ji dee.
Currently Selected:
Soponi 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.