Mark 9
9
1Yeḛ ula dee tɔɓəi pana: Ma m’ula sí təsərə, njé gə́ na̰je gə́ d’aar neelé d’a kwəi el nja saar njena d’a koo ɓeeko̰ lə Ala gə́ a ree gə siŋgamoŋ lé gə kəm dee ya.
Rɔ Jeju tel ɓəd dɔ mbal’g
Mat 17.1-13, Lug 9.28-36
2Ndɔ misa̰ gogo, Jeju ɔr Piɛrə gə Jak gə Ja̰ njɔl sa sə dee rəa aw sə dee dɔ mbal gə́ ŋgal léŋgé-léŋgé’g. Rea tel to ɓəd kəm dee’g. 3Kubu ləa tel ndá ndogó jol-jol ɓó njerakubu karee ndá gə́ rara kara dɔ naŋg nee a ra karee ndá oso gée’g godo. 4Eli gə Moyis teḛ kəm dee’g wai-wai d’aar d’wɔji ta gə Jeju. 5Piɛrə un ta ula Jeju pana: Mbai, loo gə́ nee maji kar sí j’isi keneŋ ɓəi, ar sí n’la kəi-kubuje munda j’wa kára gə́ kaḭ, kára gə́ ka̰ Moyis, kára gə́ ka̰ Eli tɔ.
6Tɔgərɔ ya, yeḛ gər ta gə́ kəm pa lé el mbata ɓəl unda dee badə gaŋg dee. 7Yen ŋga mum ree liriri dəb dɔ dee’g rigim, tɔɓəi ndu dəw ɓar mee mum’g wəl pana: Yeḛ gə́ aar neelé to gə́ ŋgonəm gə́ m’undá dan kəm’g ya. Maji kar sí ooje ta təa’g ya#2Pi 1.17-18.
8Léegəneeya njékwakiláje lé d’aa loo kori-kori, nɛ Jeju nja gə karee ba aar ɓa d’ée ɓó d’oo dəw gə́ raŋg səa el.
9Loo gə́ d’ḭ dɔ mbal’g d’isi risi gə́ naŋg ndá Jeju ndəji dee bər-bər mba kar né gə́ deḛ d’oo lé d’a kula dəw gə́ raŋg taree kára kara el saar as kar Ŋgon-dəw a kunda ne loo teḛ ne dan njé gə́ d’wəi’g.
10D’wa ta neelé meḛ dee’g bururu, dəji na̰ pana: See kunda loo teḛ dan njé gə́ d’wəi’g lé see to gə́ ta ɗi ɓa bèe wa.
11Njékwakiláje dəjee pana: Gelee ban ɓa njéndaji-maktubje pana: Eli ɓa a ree kédé lé wa#Mar 3.23, Mat 11.14.
12Yeḛ ila dee keneŋ pana: Eli a ree kédé ya ndá yeḛ a gɔl néje lai kunda dee gə lée-lée. Ŋga see gelee ban ɓa deḛ ndaŋg ta mee maktub’g d’wɔji ne dɔ Ŋgon-dəw pana: Lé riri kara néurti a rəa yaa̰ ləm, d’a kḛjee ne bəḭ-bəḭ ləm tɔ wa. 13Ma m’ula sí təsərə, Eli lé ree mba̰ ya, nɛ deḛ ra səa né to gə́ meḛ dee ndigi gə goo ta gə́ ndaŋg mee maktub’g d’wɔji ne dəa lé tɔ.
Jeju aji ŋgon gə́ ndil gə́ yèr ula kəmee ndòo
Mat 17.14-21, Lug 9.37-43a
14Loo gə́ deḛ tel ree rɔ njékwakiláje’g lé ndá deḛ d’oo boo-dəwje gə́ bula digi-digi gugu dɔ dee sub ləm, njéndaji-maktubje d’aar keneŋ maḭ sə dee ta ləm tɔ. 15Boo-dəwje neelé d’un kəm dee ɓèd d’ila dɔ Jeju’g ndá kaar dee wa dee paḭ-paḭ, ar dee buŋga na̰ gə́ rəa’g gə mba rəa lapia. 16Yeḛ dəji dee pana: See ta ɗi ɓa aarje maḭje sə dee wa.
17Dəw kára mbuna boo-dəwje’g neelé ndigi təa’g pana: Mbai, ma m’ree gə ŋgonəm rɔi’g mbata ndil gə́ njegwɔskudu gə njembikudu rəa yaa̰. 18Loo gə́ rara gə́ ndil gə́ yèr lé wá ilá keneŋ kara aree sɔ ŋgaŋgee pəgərə-pəgərə ləm, ar əm uba təa’g ndugu-ndugu ləma, ar darəa tudu mə̰dərə-mə̰dərə ləm tɔ. Bèe ɓa m’ra ndòo rɔ njékwakilaije’g gə mba kar dee tuba ndil gə́ yèr neelé ndá lée dum dee təs.
19Yen ŋga Jeju tel ila dee keneŋ pana: Seḭ ginkoji dəwje gə́ njéndɔjitaje, see m’a nai sə sí ndɔm ka̰da tɔɓəi wa. See ndɔ gə́ ra ɓa m’a kəw rɔm kila məəm dɔ sí’g ɓəi wa. Waje ŋgon lé gə́ rɔm’g nee.
20D’wa ŋgon lé gə́ rəa’g tɔ. Léegəneeya gə́ ŋgon lé un kəmee oo Jeju ndá ndil gə́ yèr lé wá ilá naŋg birig aree nduburu naŋg gururu-gururu ləm, ar əm uba təa’g ndugu-ndugu ləm tɔ. 21Jeju dəji bɔ ŋgonje lé pana: See né gə́ rəa neelé see rəa as ndɔ ka̰da ɓasinè wa.
Bɔ ŋgonje lé tel ilá keneŋ pana: Un kudee loo gə́ yeḛ nai ne ŋgon ya ɓəi rəa saar teḛ ɓasinè. 22Ndil gə́ yèr lé unee ilá per’d ləm, gə dan mán’g gə mba karee udu ləm tɔ, as gɔl bula ya ɓasinè ŋga. Nɛ ɓó lé i askəm ra né ndá ra né la ne sə sí oo ne kəm to ndòo lə sí ya kɔgərɔ kari.
23Jeju ilá keneŋ pana: I pana: See m’askəm ra wa pa bèe. Yeḛ gə́ rara ɓa gə́ ɔm mée dɔm’g jəb-jəb ndá né gə́ njedumee godo.
24Léegəneeya bɔ ŋgonje lé ula təa no̰’g wəl pana: M’ɔm meḛ dɔi’g ya! Ree la səm gə mba mee-mbɔrè ləm ya kari.
25Loo gə́ Jeju oo boo-dəwje gə́ d’ula ménénḛ́ gə́ dəa’g neelé ndá yeḛ ndaŋg ndil gə́ yèr neelé paḭ, ulá pana: I ndil gə́ yèr gə́ njegwɔskudu ləm, gə njembikudu ləm tɔ lé ma nja m’pa gə ndum m’ulai, teḛ mee ŋgon’g gə́ raga ndá i a tel kandə mée’g gogo el saar ya.
26Yen ŋga ndil gə́ yèr neelé wa ŋgon lé mbiree mba̰-mba̰, ra né wəl ɓa unda loo teḛ mée’g ɓəi. Ŋgon lé to sel asəna gə dəw gə́ wəi bèe, ar njé gə́ na̰je pana: Yeḛ wəi mba̰. 27Nɛ Jeju un jia sèn, unee uree tar, aree aar tar njoroŋ.
28Loo gə́ Jeju rəm aw kəi ndá njékwakiláje nja doŋgɔ doi d’un ta dəjee pana: See gelee ban ɓa jeḛ j’askəm tuba ndil gə́ yèr neelé el wa.
29Jeju tel ila dee keneŋ pana: Tamaji gə́ ra ɓa ndil gə́ yèr gə́ togə́bè lé a kunda ne loo mee dəw’g teḛ ya.
Jeju pata kwəi ləa gə ta kunda loo teḛ loo-yoo’g ləa ɓəi
Mat 17.22-23, Lug 9.43b-45
30Deḛ d’ḭ keneŋ d’unda mee ɓee gə́ Galile dana gaŋg. Jeju ndigi kar dəw kára kara gər loo-kabee el. 31Mbata yeḛ ndoo njékwakiláje lé ula dee pana: D’a kwa Ŋgon-dəw lé kulá ji dəwje’g, d’a tɔlee ya ndá ndɔ munda gogo lé yeḛ a kunda loo teḛ dan njé gə́ d’wəi’g.
32Nɛ njékwakiláje gər ta gə́ yeḛ pa lé el tɔɓəi deḛ ɓəl, d’oo loo kila ɗigi kaaree’g dəjee taree el tɔ.
See na̰ ɓa to dəw gə́ boi ur dɔ mareeje’g wa
Mat 18.1-5, Lug 9.46-48
33Loo gə́ deḛ teḛ Kapernawum lé d’andə d’aw mee kəi’g mba̰ ndá Jeju dəji dee pana: See ri ɓa seḭ maḭje ne na̰ ta rəbee lé wa.
34Nɛ d’isi dɔ na̰’g jim-jim mbata loo gə́ d’isi d’aw rəbə lé deḛ maḭ na̰ ta dɔ dəw gə́ a to boi kur dɔ dee’g lai#Lug 22.24. 35Yen ŋga, yeḛ rəm si naŋg ɓar deḛ gə́ dɔg-gir-dee-joo lé gə́ rəa’g, ula dee pana: Ɓó lé dəw ndigi to ŋgaw ta dee kédé ndá yeḛ a to gə́ rudu lə deḛ lai ləm, a tel rəa gə́ kura lə deḛ lai ləm tɔ#Mat 20.26-27, 23.11, Mar 10.43-44, Lug 22.26.
36Tɔɓəi yeḛ un ŋgon gə́ nai gɔ ɓəl bèe, uree tar dan dee’g, unee uree kag jia’g ula dee ne pana: 37Nana ɓa gə́ wa ŋgon gə́ nai gɔ gə́ togə́bè gə́ rəa’g gə rim-ma ndá ma nja kara wam gə́ rəa’g kən tɔ. Tɔɓəi nana ɓa gə́ wam gə́ rəa’g ndá to ma ɓa wam gə́ rəa’g kən el nɛ to yeḛ gə́ njekulam lé ya ɓa wá gə́ rəa’g kən mba̰ tɔ#Mat 10.40, Lug 10.16, Ja̰ 13.20.
Yeḛ gə́ ɔs sí rəw el ndá yeḛ to ka̰ sí ya
Lug 9.49-50
38Ja̰ ulá pana: Mbai, jeḛ j’oo dəw kára gə́ ɓar rii ɓa tuba ne ndilje gə́ yèr, ndá jeḛ j’ɔgee dɔ’g mbata yeḛ un rəw goo síjeḛ’g el.
39Jeju tel ilá keneŋ pana: Maji kar sí ɔgeeje dɔ nérea’g lé el, mbata dəw gə́ rara ɓa ra né némɔri gə rim ndá yeḛ a kaskəm kḭ gə́ lée’g ɓar rim yèr bèe el. 40Dəw gə́ ɔs sí rəw el ndá to gə́ ka̰ síjeḛ ya kən#Mar 12.30, Lug 11.23. 41Tɔgərɔ ya, nana ɓa gə́ ar sí mán mee ŋgo-dɔ-mán gə rim mbata seḭ toje ka̰ Kristi lé ndá njea neelé a lal nékoga-dɔ-jia pai godo#Mat 10.42.
Kaiya to né gə́ to ɓəl ya
Mat 18.6-9, Lug 17.1-2
42Nɛ nana ɓa gə́ sula ŋgon gə́ nai gɔ mbuna ŋgan mareeje gə́ d’ɔm meḛ dee dɔm’g neelé aree oso dan kaiya’g ndá kun biri mbal tɔ gwɔsee’g kundá ne kilá dan baa-boo-kad’g ɓa a to maji unda karee aw kari ba. 43Ɓó lé jii to né gə́ ɔsi ilai dan kaiya’g ndá tuga badə gaŋg#Mat 5.30. 44Kaw gə jii gə́ dum loo-si kəmba’g lé maji unda kari aw gehene loo gə́ pər a kwəi keneŋ nda̰ el lé gə jii gə́ joo bɔr#9.44 Ta neelé godo mee maktubje gə́ ləw gə́ na̰je’g.. 45Ɓó lé gɔli to né gə́ aw səi ilai dan kaiya’g ndá maji kari tuga badə gaŋg. 46Kaw gə gɔli gə́ məd loo-si kəmba’g lé maji unda kar dee d’ilai gehene’g gə gɔli joo-bɔr, loo gə́ pər a kwəi keneŋ nda̰ el lé#9.46 Ta neelé godo mee maktubje gə́ ləw gə́ na̰je’g.. 47Ɓó lé kəmi to né gə́ ndɔri ilai dan kaiya’g ndá kɔdee ɔree mbata kaw ɓeeko̰’g lə Ala gə kəmi gə́ kára lé maji unda kar dee d’wai gə kəmi joo bɔr d’ilai gehene’g#Mat 5.29, 48to loo gə́ kuru gə́ njesɔ dee a kwəi nda̰ el ləm, pər a kwəi keneŋ nda̰ el ləm tɔ#Esa 66.24. 49Mbata dəwje lai lé pər a kɔb dee kág kərm-kərm keneŋ ya.
50Kad lé to né gə́ maji ya, nɛ ɓó lé kad gə́ rii tel rii el ndá see ɗi ɓa seḭ a raje ne mba karee rii gogo ɓəi wa. Maji kar darɔ sí-seḭ nja to gə́ kad ɓó gə́ ɔmje ne meḛ sí na̰’d sad#Mar 5.13, Lug 14.34-35.
Currently Selected:
Mark 9: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
