Mark 7

Néjiɓee lə dəwje gə́ ləw

Mat 15.1-9

1Parisiḛje gə njéndaji-maktubje gə́ na̰je gə́ d’ḭ Jerusalem lé ree mbo̰ dɔ na̰ rɔ Jeju’g. 2Deḛ d’oo njékwakila Jejuje gə́ na̰je d’o̰ né lal togo ji dee.

3Parisiḛje gə Jibje lai lé togo ji dee sugu-sugu gə goo néjiɓee lə ka deeje lé ɓa d’o̰ ne né ɓəi. 4Loo gə́ d’ḭ loo-nada tel ree kəi kara deḛ d’ɔr won rɔ dee ndɔs ɓad ɓa d’usɔ ne né ɓəi. Deḛ ra néjiɓeje lə dee gə́ raŋg ɓəd-ɓəd loo bula, d’wɔji ne dɔ kaje ləm, gə ku-joje ləma, gə jo larje ləm tɔ.

5Parisiḛje gə njéndaji-maktubje lé dəji Jeju pana: Gelee ban ɓa njékwakilaije ndolè goo néjiɓee lə ka deeje el ɓa d’usɔ né lal togo ji dee wa.

6Jeju ila dee keneŋ pana: Seḭ njéhulaije, Esai lé teggin ta gə́ gəd wɔji ne dɔ sí ya mbata yeḛ ndaŋg mee maktub’g pana:

Koso-dəwje neelé taje gə́ teḛ ta dee’g ɓa deḛ d’ila ne riɓar dɔm’g

Nɛ meḛ dee nai səm əw#Esa 29.13.

7Deḛ d’wam meḛ dee gə mḭdé-mḭdé ba ləm,

Deḛ ndoo dee torndu dəwje ba ləm tɔ.

8Seḭ ubaje godndu Ala ya̰je, gə mba tɔsje kəm sí dɔ néjiɓee’g lə dəwje ba.

9Yeḛ ula dee tɔɓəi pana: Seḭ aaje dɔ néjiɓee lə sí kər-kər gə mba tuji ne godndu Ala lé pugudu ya. 10Mbata Moyis pana: Təd kag bɔbije gə kɔinje, dəw gə́ ɔr gə bɔbeeje əsé kea̰je ndá d’a tɔlee gə́ tɔl ya#Tr 20.12, 21.17, Ləb 20.9, TtG 5.16. 11Nɛ seḭ lé seḭ pajena: Ɓó lé dəw ula bɔbeeje əsé gə kea̰je pana: Né gə́ m’a gə kari la ne səi lé to gə́ Kɔrban#7.11 kɔrba̰ lé wɔji dɔ nékar Ala gə́ to gə kəmee., 12ndá seḭ yá̰je areeje aw gə mba ra né la ne gə bɔbeeje əsé gə kea̰je lé bèe el. 13Togə́bè ɓa néjiɓee lə sí gə́ seḭ nja undaje ginee lé seḭ tujije ne ta lə Ala lé pugudu. Seḭ raje néje gə́ raŋg togə́bè loo bula ɓəi tɔ.

Né gə́ ar mee dəw mina̰ ne jɔmri-jɔmri lé

Mat 15.10-20

14Gée gə́ gogo yeḛ tel ɓar boo-dəwje gə́ rəa’g ula dee pana: Maji kar sí-seḭje lai ooje ta ləm ɓó gə gərje ginee. 15Né kára kara gə́ ḭ raga oso mee dəw’g lé a kar mee dəw mina̰ ne jɔmri-jɔmri el, nɛ né gə́ ḭ mee dəw’g teḛ raga lé yee ɓa ar dəw mina̰ ne ya. 16Ɓó lé nana ɓa gə́ mbia to gən ndá maji karee unda mbia oo ne ta neelé ya#7.16 ta neelé godo mee maktubje gə́ ləw gə́ na̰je’g..

17Loo gə́ yeḛ ya̰ boo-dəwje neelé gə kuree əw ree andə mee kəi’g ndá njékwakiláje dəjee goo ta nee gə́ yeḛ ula dee gə gosota raga lé. 18Yeḛ ula dee pana: See seḭje kara kəm sí inja el nja ɓəi wa. See seḭ gərje né el ɓəi wa. Né kára kara gə́ ḭ raga oso mee dəw’g lé as mba kar mée mina̰ ne jɔmri-jɔmri el. 19Mbata né neelé oso kəi-ɓə̰gəree’g el, nɛ oso jəbəlee’g ɓa aw saar oso looje gə́ to loo-kiya’g, loo gə́ won nésɔje ɔr keneŋ ndɔs-ndɔs lé ɓəi.

20Yeḛ ula dee tɔɓəi pana: Né gə́ ḭ mee dəw’g ɓa to né gə́ ar mée mina̰ ne ya. 21Mbata né gə́ ḭ mee dəw’g lé ḭ dɔɓəŋgəree’g ɓa teḛ raga ɓəi, néeje lé ɓa to nee, takə̰ji gə́ yèr ləm, gə mɔdkaiya ləm, gə kaw gə́ balgogé ləm, gə tɔl dəw ləm, 22gə ɓogo ləm, gə kəmkəḭ ləm, gə meeyèr ləm, gə néra gə́ ŋgɔm ləm, gə kaw kori-kori ləm, gə kaa loo gə kəm dɔbee ləm, gə kunda ta ta mari’g ləm, gə kəsta ləma, gə néra gə́ bɔsɔsɔ ləm tɔ. 23Néje nee lai lé to né gə́ ḭ mee dəw’g ɓa teḛ raga ɓa ar dəw mina̰ ne ya.

Dené gə́ Kana̰ ɔm mée dɔ Jeju’g

Mat 15.21-28

24Jeju ḭ keneŋ ɔd aw gə́ ɓeeko̰ gə́ Tir gə Sido̰. Yeḛ andə mee kəi’g kára bèe gə ŋgəḭ ba mbata yeḛ ndigi kar dəw kára kara gər loo-siée el, nɛ loo-kiya-rəa godo. 25Dené kára bèe gə́ ndil gə́ yèr to mee ŋgonee gə́ dené’g lé oo soree ndá yeḛ ree ti oso naŋg gɔlee’g. 26Dené neelé ginkojee to gə́ Grek, nɛ d’ojee ɓee gə́ Siro-Pénisi. Yeḛ ra ndòo rəa’g gə mba karee tuba ndil gə́ yèr mee ŋgonee gə́ dené’g lé. Jeju ulá pana: 27Ya̰ ŋganje gə́ kəi ar dee d’usɔ né d’ar meḛ dee ndan ya, mbata kodo muru lə ŋganje kɔm naŋg kar ŋgan bisije ɓa to né gə́ kəm ra el.

28Dené lé tel ilá keneŋ pana: Oiyo, Mbaidɔmbaije, nɛ ŋgan bisije lé to gel tabul’g mba sɔ bum muru gə́ ḭ ta ŋganje’g ya.

29Yen ŋga Jeju ulá pana: Ɔd aw mbata tapai lé ar ndil gə́ yèr unda ne loo mee ŋgoni gə́ dené’g teḛ mba̰ ya.

30Loo gə́ dené lé tel aw kəi ndá yeḛ iŋga ŋgonee lé dɔ tira-tée’g nɛ ndil gə́ yèr lé teḛ mée’g mba̰ tɔ.

Mbigi gə́ njegwɔskudu lé pata yororo-yororo ya

31Jeju uba naŋg ḭ ɓeeko̰ gə́ Tir taa rəw gə́ wɔji dɔ Sido̰ par gə́ kel baa-boo gə́ Galile’g bèe, yeḛ dəs unda mee ɓee gə́ Dekapol tar gaŋg. 32Deḛ ree gə njegwɔskudu gə́ oma̰ gə ta pi rɔ Jeju’g ndá deḛ ra ndòo rəa’g mba karee ila jia dəa’g. 33Jeju ɔree mbuna boo-dəwje’g neelé njɔl, sa səa rəa rɔ dee’g ndá yeḛ ula ŋgaw jia mbia’g ləm, tɔɓəi ra mán təa ɔrɔ ne ndəa̰ ləm tɔ. 34Tɔɓəi yeḛ tel kəmee gə́ dara lé ila mée pugudu pana: Epata, (tel takɔji sí teḛ tai).

35Léegəneeya rəw mbia lé inja bərəŋ ləm, ndəa̰ dila wərərə ləm tɔ aree pata yororo-yororo. 36Jeju ndəji dee bər-bər mba kar dee pa taree d’ar dəw oo el, yeḛ ɔg dee dɔ’g tasəra, nɛ deḛ d’ila mberee gə́ kédé-kédé. 37Kaar dee wa dee paḭ-paḭ ar dee pana: Néje lai gə́ yeḛ ra lé yeḛ ra aree maji ɔr njoroŋ ya: Yeḛ ar mbi njémbikuduje mbudu ləm, deḛ gə́ gwɔs dee tɔ kɔrəm-kɔrəm kara yeḛ ar dee pata njai-njai ləm tɔ.

Currently Selected:

Mark 7: SBA2015

Highlight

Copy