Lugu 24
24
Jeju teḛ loo-yoo’g
Mat 28.1-10, Mar 16.1-8, Ja̰ 20.1-10
1Ndɔ gə́ doŋgɔr gə́ njekorè goo ndɔ-kwa-rɔ lé denéje d’odo kuma̰ gə́ ə̰də sululu gə́ deḛ podé na̰’d lé teḛ ne gə ndɔ rad d’aw ne dɔɓar’g. 2Deḛ d’oo biri mbal gə́ to ta bolè mbal’g lé nduburu oso raŋg. 3Deḛ d’andə d’aw keneŋ nɛ deḛ d’iŋga nin Jeju Mbaidɔmbaije lé el. 4To gə́ deḛ d’ə̰ji bea pi d’aar jim ndá aa oo, dəwje joo gə́ d’ula kubu gə́ ndoolé yḛd-yḛd rɔ dee’g lé teḛ kəm dee’g təsərə-təsərə. 5Ɓəl unda dee badə gaŋg dee ar dee dəb kəm dee naŋg, nɛ dəwje gə́ joo neelé d’ula dee pana: See ban ɓa seḭ ndolèje njesikəmba lé mbuna njé gə́ d’wəi’g wa. 6Yeḛ godo loo gə́ nee’g nɛ yeḛ unda loo teḛ loo-yoo’g mba̰. Arje meḛ sí olé teḛ dɔ ta gə́ yeḛ ula sí kédé loo gə́ yeḛ nai ne Galile ɓəi lé 7yeḛ pana: Lé riri kara d’a kula Ŋgon-dəw ji njékaiyaje’g ləm, d’a ɗaree ləma, tɔɓəi ndəa munda ndá yeḛ a kunda loo teḛ loo-yoo’g ləm tɔ .
8Yen ŋga meḛ denéje lé olé teḛ dɔ ta gə́ Jeju ula dee kédé lé tɔ. 9Loo gə́ deḛ d’ḭ dɔɓar’g d’ɔs tel lé ndá deḛ d’ɔr sor néje neelé lai d’ula dee-deḛ gə́ dɔg-gir-dee-kára lé ləm, d’ula dəwje gə́ raŋg lai ləm tɔ. 10Denéje gə́ d’ɔr sor néje nee d’ar njékaḭkulaje lé ri dee lə Mari gə́ Magdala ləm, gə Jan ləm, gə Mari ko̰ Jak ləma, gə denéje gə́ raŋg gə́ nai sə dee lé ləm tɔ. 11Deḛ d’oo sor kɔr lə denéje neelé gə́ ta ni ɓó d’ɔm meḛ dee dɔ’g el. 12Nɛ Piɛrə uba naŋg ḭta aiŋgwɔd aw dɔɓar’g. Yeḛ ula dəa naŋg tən loo oo ne kubu-dubu-yoo gə́ to naŋg kari ba. Tɔɓəi yeḛ ɔd aw gə́ kəmee gə́ kəi ləa ndá kaaree wá paḭ dɔ néje gə́ teḛ’g lé.
Kaw rəw gə́ Emawus’g
Mat 16.12-13
13Aa ooje, mee ndəa’g neelé nja njékwakila Jejuje joo d’isi d’aw gə́ ɓee kára gə́ ria lə Emawus. Kḭ Jerusalem kaw keneŋ lé əw as kuru loo dɔg-giree-kára bèe. 14Ndá deḛ d’isi d’aw d’wɔji na̰ ta dɔ néje lai gə́ teḛ’g lé. 15Loo gə́ d’aw d’wɔji na̰ taree ləm, gə maḭ na̰ taree ləm tɔ ndá Jeju teḛ sə dee wai orè sə dee rəw na̰’d. 16Nɛ kəm dee tɔ dəa’g sum-sum ar dee d’ée gəree el saar. 17Yeḛ dəji dee pana: See ta ɗi ɓa seḭ aw wɔjije na̰ ɓa arje kəm sí to ne ndòo bèe wa.
18Yeḛ gə́ kára gə́ ria lə Kleopas ndigi təa’g pana: See i nja gə kari ba to gə́ mbá gə́ mee ɓee-boo gə́ Jerusalem gə́ gər né gə́ teḛ mee ndɔje’g neelé el wa.
Yeḛ dəji dee pana: See gə́ né ɗije wa.
19Deḛ tel d’ilá keneŋ pana: To né gə́ teḛ wɔji dɔ Jeju gə́ Najaret gə́ to njetegginta gə njesiŋgamoŋ dɔ kula reaje’g gə dɔ tapeaje’g no̰ Ala’g lé ləm, gə no̰ koso-dəwje’g lai ləm tɔ. 20Mbai dɔ njékinjanéməsje-je gə njégaŋ-rəwtaje lə sí lé d’wá d’ilá ta yoo dəa’g ɗaree ne kar kag’d tɔ. 21Jeḛ lé j’unda meḛ sí yel gə́ dəa’g n’pana: Yeḛ nja ŋga a kɔr kúla dɔ Israɛlje’g kɔm dee tar, nɛ aa oo néje lai neelé teḛ as gə ndɔ munda ɓogənè ya. 22To tɔgərɔ ya, denéje gə́ na̰je mbuna sí’g d’ula sí ta néje gə́ ar kaar sí wa sí ne paḭ-paḭ, deḛje neelé teḛ gə ndɔ rad d’aw dɔɓar’g, 23nɛ loo gə́ deḛ d’oo ninee lé el ndá deḛ tel d’ula sí pana: Kuraje gə́ dara ɓa teḛ dɔ neḛje’g d’ula neḛje pana: Jeju lé si kəmba ya. 24Njé gə́ na̰je mbuna deḛ gə́ d’aar sə sí lé d’ɔd d’aw dɔɓar’g ndá d’iŋga néje to gə́ denéje pa lé nja tɔ nɛ kəm dee oso dəa-yeḛ’g bèe el.
25Yen ŋga Jeju ula dee pana: Wah! seḭ dəwje gə́ kəmkàr na meḛ sí tas ləm, meḛ sí tɔ kujita dɔ ta’g lə njéteggintaje el ləm tɔ lé. 26See Kristi lé néurti a rəa togə́bè ɓa mba karee andə ne loo-ronduba’g ləa lé el wa.
27Tɔɓəi un ginee ɓee lə Moyis gə ɓee lə njéteggintaje lai lé yeḛ ɔr sə dee gintaje lai gə́ to mee maktub gə́ to gə kəmee gə́ pata wɔji ne dəa-yeḛ lé ar dee ya.
28Loo gə́ deḛ d’unda dɔ ɓee gə́ d’isi d’aw gə́ keneŋ lé dəb ndá yeḛ ra to gə́ lə yeḛ a gə dəs tar bèe səm. 29Nɛ deḛ to təa’g pəgə-pəgə d’ɔgee naŋg pana: Maji kari sí sə sí mbata kàr a gə godo ɓasinè gə mba kar loondul ŋga.
Yeḛ andə aw sə dee kəi gə mba si sə dee ya tɔ. 30Loo gə́ yeḛ si sə dee ta nésɔ’g ndá yeḛ un muru ra oiyo ɓa ya̰ gaji dana ar dee. 31Yen ŋga kəm dee inja dəa’g yərərə ar dee gəree ne, nɛ yeḛ ḭ sané pá kəm dee’g. 32Deḛ d’ula na̰ pana: Loo gə́ yeḛ teḛ dɔ sí’g rəbə wɔji sə sí ta ɔr ne gin maktub gə́ to gə kəmee ar sí lé see j’isi dan rɔlelee’g el wa.
33Mee kàree’g neelé nja deḛ d’ḭ d’ɔs tel d’aw Jerusalem. Deḛ d’iŋga deḛ gə́ dɔg-gir-dee-kára gə deḛ gə́ nai sə dee gə́ mbo̰ sə dee dɔ na̰ 34gə́ d’isi pana: Mbaidɔmbaije lé unda loo teḛ tɔgərɔ ya. Yeḛ teḛ kəm Simo̰’g ya.
35Deḛ kara d’ɔr sor né gə́ teḛ dɔ dee’g rəbə gə kəm dee gə́ inja dəa’g loo gə́ yeḛ wa muru gaji dana ar dee lé tɔ.
Jeju teḛ dɔ njékwakiláje’g wai
Mat 28.16-20, Mar 16.14-18, Ja̰ 20.19-23, NNk 1.6-8
36Loo gə́ d’isi pata néje neelé bèe-bèe ndá yeḛ nja teḛ dan dee’g wai ula dee pana: Sije gə meekulɔm.
37Ɓəl unda dee badə gaŋg dee ar dee d’unda bala tigi-tigi, meḛ dee ndaji ta pana: To gə́ ndil dəw ɓa. 38Nɛ yeḛ dəji dee pana: See ban ɓa takə̰ji gə́ togə́bè kinja na̰ meḛ sí’g bèe wa. 39Aaje loo ooje jim gə gɔlm, ooje to gə́ darɔm-ma nja, ɔrɔje rɔm ooje, ndil dəw lé darəa gə siŋgarea to keneŋ to gə́ seḭ oomje nee bèe lé el.
40Loo gə́ yeḛ pa togə́bè mba̰ ndá yeḛ tɔji dee jia gə gɔlee tɔ. 41Loo gə́ rɔlel gə́ to meḛ dee’g gə kaar dee gə́ wa dee paḭ-paḭ lé ɔg dee kɔm meḛ dee dəa’g ɓəi ndá Jeju dəji dee pana: See né gə́ kəm sɔ godo rɔ sí’g nee wa.
42Ndá deḛ d’un ka̰ji gə́ kɔb gə mban tə̰ji d’aree tɔ. 43Yeḛ taa sɔ kəm dee’g tɔ. 44Tɔɓəi yeḛ ula dee pana: Ta né gə́ teḛ lé to ta gə́ ma m’ula sí loo gə́ ma m’nai sə sí ɓəi lé ya, mba kar lé riri kara taje lai gə́ deḛ ndaŋg mee maktub godndu Moyis’g ləm, gə ka̰ njéteggintaje ləma, gə yee gə́ ndaŋg mee maktub Pakɔs’g ləm tɔ d’wɔji ne dɔm lé a kaw lée’g béréré togə́bè ya.
45Yen ŋga yeḛ ar meḛ dee tɔ kujita gə mba kar dee gər ne gin ta gə́ mee maktub gə́ to gə kəmee lé tɔ. 46Yeḛ ula dee pana: Togə́bè deḛ ndaŋg taree mee maktub’g pana: Kristi lé néurti a rəa ləm, ndɔ munda ndá yeḛ a kunda loo teḛ dan njé gə́ d’wəi’g ləm, 47d’a kila mber ta kwa ndòo rɔ dɔ kaiya’g gə ta kɔr kaiya dɔ dəwje’g ləm tɔ gə ria-yeḛ kar ginkoji dəwje gə raŋg ya ndá d’a kun kudee Jerusalem ya. 48Seḭ lé seḭ toje njékɔrgoota néje neelé ya. 49Aa ooje, né gə́ Bɔm un ndia gə mba kar sí lé m’a kula ne kar sí ya, nɛ seḭje lé sije dan mee ɓee-boo’g lé saar kar siŋgamoŋ gə́ a kḭ sém loo gə́ tar lé ree dəb dɔ sí’g ɓa .
Jeju tel aw dara
Mar 16.19-20, NNk 1.9-11
50Yeḛ ɔr no̰ dee njal kəmee gə́ Betani, tɔɓəi yeḛ odo jia gə́ tar tɔr ne ndia dɔ dee’g. 51Loo gə́ yeḛ aar tɔr ndia dɔ dee’g bèe-bèe ndá yeḛ ɔd sa rəa igi dara kag . 52Deḛje neelé loo gə́ deḛ d’wá meḛ dee’g mba̰ ndá deḛ d’ɔs tel gə boo-rɔlel meḛ dee’g d’aw Jerusalem. 53Deḛ d’wa dɔ na̰ mee kəi-Ala’g ta-ta pidi ne Ala ləm, d’ɔs ne gajee ləm tɔ.
Currently Selected:
Lugu 24: SBA2015
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.