Njéga̰g-Rəwtaje 19
19
Néra gə́ yèr lə Bḛjamije gə́ d’isi Gibea
1Mee ndəa gə́ mbai godo ne ɓee gə́ Israɛl lé dəw kára gə́ to gə́ Ləbi gə́ si gə́ mbá raga ŋgaŋ mbal’d gə́ Eprayim lé taa gamla-dené kára mee ɓee gə́ Betlehem gə́ ka̰ Judaje. 2Gamla-dené ləa lé ée gə́ né gə́ əḭ kəmee’g el ndá unda loo teḛ aw ɓee lə bɔbeeje gə́ Betlehem gə́ ka̰ Judaje lé tɔɓəi yeḛ si keneŋ as naḭ sɔ. 3Ŋgabeeje lé ḭ aw gée’g mba gɔl mée karee tel ree səa. Yeḛ ar kura ləa aw səa na̰’d gə mulayḛ̀je-je joo. Dené lé aree andə mee kəi’g lə bɔbeeje. Loo gə́ bɔ denéje lé ée ndá yeḛ wa gə́ rəa’g gə rɔlel. 4Memeeje gə́ to bɔ dené ləaje lé ɔgee naŋg aree si rəa’g ndɔ munda. Deḛ d’usɔ gə d’ai ləm, to keneŋ loondul’g ləm tɔ. 5Ndɔ gə́ njekɔm’g sɔ lé deḛ d’ḭ gə ndɔ rad ndá dəw gə́ to Ləbi lé wɔji-kwɔji mba kaw. Nɛ bɔ dené ləaje lé ula məmeeje lé pana: Maji kari taa ges muru nee o̰ ar siŋgai to ɓa awje ɓəi.
6Bèe ɓa deḛ joo bɔr d’isi naŋg d’usɔ gə d’ai. Tɔɓəi bɔ denéje lé ula məmeeje lé pana: M’ra ndòo rɔi’g, maji kari to naŋg loondul’g nee ya ɓəi mba kar məəi to lɔm ɓa.
7Diŋgam lé ḭ gə mba kaw nɛ məmeeje lé oma̰ səa saar aree tel to naŋg ya ɓəi. 8Ndɔ gə́ njekɔm’g mi lé yeḛ teḛ gə ndɔ rad mba kaw. Nɛ bɔ denéje lé ulá pana: M’ra ndòo rɔi’g, maji kari ila məəi po̰ sɔ né ndá ŋgina saar ar loo kul ɓa awje ɓəi.
Bèe ɓa deḛ joo bɔr d’isi naŋg d’usɔ ne né tɔ. 9Diŋgam lé ḭ gə dené ləa gə kura ləa na̰’d gə mba kaw nɛ məmeeje gə́ bɔ denéje lé ulá pana: Aa oo, kàr si andə ləm loo aw ndul ləm tɔ, maji kar sí toje naŋg, kàr si godo ŋga ndá toje naŋg nee ya arje meḛ sí to ne lɔm, bèlè ɓa a kḭje gə ndɔ rad kawje ɓəi, bèe ɓa a kawje ɓee lə sí gə́ majee.
10Diŋgam lé ndigi to naŋg loondul’g nee el ŋga ndá yeḛ uba naŋg ḭ aw. Yeḛ ree saar unda dɔ ɓee gə́ Yebus gə́ to Jerusalem lé dəb gə mulayḛ̀je-je ləa gə́ joo gə́ njékodo néje ləm, gə gamla-dené ləa na̰’d ləm tɔ. 11Loo gə́ deḛ teḛ ta ɓee’d gə́ Yebus dəb ndá loo dəb yaa̰ ŋga. Kura lé ula ɓéeje pana: Ar sí j’awje par gə́ ɓee-boo’g lə Yebusje nee ndá j’a toje keneŋ.
12Ɓéeje lé tel ilá keneŋ pana: Jeḛ j’a kawje ɓee lə dəw-dɔ-ɓeeje loo gə́ Israɛlje godo keneŋ lé el nɛ j’a kaw saar Gibea ɓa.
13Yeḛ ula kura ləa lé tɔɓəi pana: Ar sí j’awje pər gə́ mbɔr ɓee gə́ Gibea əsé Rama ɓa j’a toje keneŋ ya.
14Deḛ d’aw dɔ dee gə́ kédé ndá kàr ur naŋg loo gə́ d’unda dɔ Gibea gə́ wɔji dɔ Bḛjamije lé dəb tɔ. 15Deḛ d’aw kəm dee gə́ Gibea mba kaw to keneŋ. Dəw gə́ to Ləbi lé andə mee ɓee’g ndá yeḛ aar naŋg ndaa-loo’g nɛ dəw kára kara wa dee gə́ rəa’g mee kəi’g ləa mba kar dee to keneŋ el.
16Nɛ aa oo, bai-diŋgam kára ḭ loo-ndɔ’g ləa kàrkemetag tel gə́ ɓée. Yeḛ to dəw gə́ dɔ mbal’g lə Eprayim gə́ si Gibea ndá dəwje gə́ lée’g neelé to gə́ Bḛjamije. 17Yeḛ un kəmee oo njekaw mbá lé ndaa-loo gə́ mee ɓee’g ndá bai-diŋgam lé dəjee pana: Aw gə́ ra wa, əsé ḭ ra wa.
18Dəw gə́ to Ləbi lé tel ilá keneŋ pana: Jeḛ j’ḭje Betlehem gə́ ka̰ Judaje j’aw saar teḛje dɔ mbal gə́ to ŋgaŋ mbal gə́ Eprayim, yee ɓa to loo gə́ m’isi keneŋ ya. Ma m’aw Betlehem gə́ Juda ɓa m’isi m’tel m’aw gə́ kəi ɓasinè. Nɛ dəw kára kara wam gə́ rəa’g mee kəi’g ləa el. 19Jeḛ j’awje gə mu gə moro mba mulayḛ̀je-je lə sí ləm, j’awje gə muru gə mán-nduú mbata ləm-ma gə kura ləi gə́ dené ləm, mbata basa gə́ aw gə kuraje ləi na̰’d ləm tɔ. Né kára kara lal sí el.
20Bai-diŋgam lé pana: Maji kar meekulɔm nai səi! Lé bèe kara néje lai gə́ i aw ndée lé ma nja m’a kari ɓó a toje ndaa-loo’g neelé el.
21Yeḛ ar dee d’aw kəi ləa ləm, yeḛ ar mulayḛ̀je-je moro ləm tɔ. Mbáje lé togo gɔl dee ɓa d’usɔ gə d’ai ɓəi ləm tɔ.
22Loo gə́ d’isi d’al rɔ dee bèe-bèe ndá aa ooje, dəwje gə́ mee ɓee-boo’g nee gə́ to njéra nékɔbje ree gugu dɔ kəi sub d’unda tarəwkəi d’ula bai-diŋgam gə́ njekəi lé pana: Teḛ gə dəw gə́ andə kəi ləi neelé mba kar sí n’toje səa .
23Dəw gə́ njekəi lé teḛ aar no̰ dee’g ula dee pana: Wah ŋgakɔmje, m’ra ndòo rɔ sí’g mba kar sí raje né gə́ majel gə́ togə́bè el, mbata dəw neelé ree mee kəi’g ləm ɓó maji kar sí raje səa nérɔkul neelé el. 24Aa ooje, ŋgonəm gə́ ma̰də gə́ gər ŋgaw el si keneŋ ləm, dəw neelé kara gamla-dené ləa si keneŋ ləm tɔ, m’a ree sə dee raga kar sí, seḭ a raje sə dee né gə́ meḛ sí ndigi. Nɛ dəw neelé maji kar sí raje səa nérɔkul gə́ boo neelé el.
25Nɛ dəwje neelé ndigi koo ta ləa el ya saar. Togə́bè ɓa dəw lé wa gamla-dené ləa teḛ səa raga ar dee. Deḛ to səa loondul’g saar loo a gə kàr, loo un kudu kàr ndá deḛ tubá d’aree aw. 26Loo gə́ loo a gə kàr lé ndá dené neelé aw oso naŋg takəi’g lə dəw gə́ ŋgabeeje to kəi ləa lé to keneŋ saar ar loo àr təsərə. 27Teḛ gə ndɔ ndá ŋgabeeje ḭta ɔr tarəwkəi teḛ raga mba kun rəw ləa kaw. Nɛ aa oo, gamla-dené ləa lé to naŋg tereŋ tarəwkəi’g ar jiaje to tarəwkəi’g.
28Yeḛ ulá pana: Ḭta ar sí j’awje. Ndá yeḛ ilá ta’g el. Bèe ɓa ŋgabeeje lé un ninee ilá dɔ mulayḛ̀je’g aw səa loo-siée’g. 29Loo gə́ yeḛ teḛ kəi’g ləa ndá yeḛ un kia tḭja ne barkəmrɔ gamla-dené ləa lé gaŋg dana ɗuguru-ɗuguru as loo dɔg-giree-joo ɓa yeḛ ula ne dɔ naŋg’d lə Israɛlje bura ya . 30Deḛ lai gə́ d’oo né neelé pana: Ta néra gə́ togə́bè lé dəw oo garee el ya ɓəi, un kudee loo gə́ Israɛlje d’unda ne loo mee ɓee gə́ Ejiptə teḛ saar ɓogənè lé. Waje né neelé dɔɓəŋgərə sí’g wɔjije na̰ ta dɔ’g ndá paje taree!
Currently Selected:
Njéga̰g-Rəwtaje 19: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
