Ajee 2
2
Rɔnduba gə́ wɔji dɔ kəi gə́ to gə kəmee gə́ njekɔm’g joo lé
1Ndɔ rɔ-joo-giree-kára lə naḭ gə́ njekɔm’g siri lé mee ləb gə́ njekɔm’g joo gə́ Darius o̰ ne ɓee lé ɓa Njesigənea̰ riba dɔ ta ləa gə ndu Aje, njetegginta lé gə rɔtaje nee pana: 2Maji kari ula kula dəji Jorobabel, ŋgolə Səaltiel, njeguburuɓee gə́ Juda ləm, gə Juje, ŋgolə Josadak, ŋgɔ-njekinjanéməs ləma, gə ges koso-dəwje gə́ nai ləm tɔ lé pana:
3See dəw gə́ oo kəi neelé gə rɔnduba ləa gə́ kédé lé nai mbuna sí’g ɓəi wa. Ŋga ɓasinè gə́ seḭ éeje lé see to to gə́ ban wa. See to asəna gə né gə́ əḭ kəm sí’g el əsé ban wa . 4Njesigənea̰ pana: Ɓasinè, i Jorobabel, wa rɔi kɔgərɔ! I Juje, ŋgolə Josadak, ŋgɔ-njekinjanéməs lé wa rɔi kɔgərɔ! Seḭ koso-dəwje lai gə́ mee ɓee’g lé waje rɔ sí kɔgərɔ! Njesigənea̰ ɓa pa bèe. Tɔɓəi raje kula! Mbata neḛ nja nai sə sí ya. Njesigənea̰ gə́ njeboo-néje ɓa pa bèe. 5Neḛ n’aar dɔ manrɔ’g lə neḛ gə́ neḛ man ne rɔ neḛ n’ar sí loo gə́ seḭ undaje ne loo mee ɓee gə́ Ejiptə teḛje lé ya mbata Ndil neḛ nai mbuna sí’g ya. Maji kar sí gə́ ɓəlje el ! 6Mbata Njesigənea̰ gə́ njeboo-néje ɓa pa togə́bè pana: Nai lam ba bèe ndá n’a gə́ yə dara gə naŋg nee ləm, gə baa-booje gə loo-gə́-tudu bura ləm tɔ . 7N’a yə ginkoji dəwje gə raŋg lai. Nébaoje lə ginkoji dəwje gə raŋg lai lé d’a ree ne ndá n’a kar rɔnduba taa mee kəi neelé pəl-pəl. Njesigənea̰ gə́ njeboo-néje ɓa pa bèe. 8Larnda gə larlɔr to ka̰ neḛ, Njesigənea̰ gə́ njeboo-néje ɓa pa bèe. 9Rɔnduba lə kəi gə́ gogo neelé a boi yaa̰ kur dɔ yee gə́ kédé’g lé. Njesigənea̰ gə́ njeboo-néje ɓa pa bèe. Lée neelé ɓa n’a kar dee meekulɔm keneŋ. Njesigənea̰ gə́ njeboo-néje ɓa pa bèe.
Njetegginta dəji njékinjanéməsje ta
10Ndɔ gə́ njekɔm’g rɔ-joo-giree-sɔ lə naḭ gə́ njekɔm’g jinaikara mee ləb ko̰ɓee’g lə Darius gə́ njekɔm’g joo lé Njesigənea̰ riba dɔ ta ləa gə ndu Aje, njetegginta lé gə rɔtaje nee pana: 11Njesigənea̰ gə́ njeboo-néje pa togə́bè pana: Maji kam m’unda ta dəji gə́ wɔji dɔ godndu neelé no̰ njékinjanéməsje’g m’pana: 12Ɓó lé dəw tɔ mbida ta da gə́ d’unda gə kəmee gə ta kubu ləa ɓa kubu ləa neelé ɔrɔ rɔ muru əsé nésɔje əsé mán-nduú əsé ubu əsé nésɔ gə́ rara kara ndá see néje neelé d’a tel to gə kəmee to wa.
Njékinjanéməsje d’ilam keneŋ pana: Wah!
13Bèe ɓa Aje dəji dee pana: Ɓó lé dəw kára gə́ rəa mina̰ mbata kwa gə́ wa nin ɓa ɔrɔ ne rɔ néje nee ndá see néje neelé d’a mina̰ ne wa.
Njékinjanéməsje tel d’ilam keneŋ pana: D’a mina̰ ne ya .
14Yen ŋga Aje tel un ta pa pana: To togə́bè gə koso-dəwje gə́ nee ləm, gə ginkoji dəwje gə́ d’aar no̰ neḛ’g ləma, gə néje lai gə́ dee ra gə ji dee ləm tɔ. Njesigənea̰ ɓa pa bèe. Néje gə́ dee d’un d’am dɔ loo nékinjaməs’g neelé to néje gə́ mina̰.
15Maji kar sí sije gèŋ ə̰jije ooje ne né gə́ dəs ləw ba saar mee ndəa gən, kédé ɓa d’un ne mbal d’unda dɔ maree’g maree’g d’unda ne kəi lə Njesigənea̰ lé ɓəi lé! 16Mee ndəa’g neelé ɓó lé dəw aw loo gə́ d’ɔm kó dɔ na̰’d as kəm nékwɔjee rɔ-joo ndá kó neelé nai keneŋ mee né dɔg ba. Ɓó lé dəw aw ta dura gə́ d’ɔm mán-nduú keneŋ mba kɔr kulum rɔ-mi ndá nai keneŋ as rɔ-joo ba ya. 17Neḛ n’ar rɔko̰ rɔ-kwa-moro ɗugugu-ɗugugu ləm, gə mia̰je ləma, gə ndi-kwɔji ləm tɔ tuji kó lə sí. Neḛ n’tuji kulaje lai gə́ seḭ raje gə ji sí tɔ. Nɛ lé bèe kara seḭ tel reeje rɔ neḛ Njesigənea̰’g el ya ɓəi. 18Maji kar sí síje gèŋ ə̰jije ooje néje gə́ dəs mee ndəa gən saar mee ndɔ gə́ njekɔm’g rɔ-joo-giree-sɔ’g lə naḭ gə́ njekɔm’g jinaikara, un kudee mee ndəa gə́ deḛ tum ne gel kəi lə Njesigənea̰ lé síje gèŋ ə̰jije ooje ɓa! 19See néje gə́ ka̰ dubu nai mee damje’g ya ɓəi wa. Kag-nduúje əsé kag-kodéje əsé kag-dḭje əsé kag-koiyoje kara d’andə el. Nɛ un kudee mee ndəaje gə́ nee lé n’a tel tɔr ndu neḛ dɔ sí’g ya.
Ndukun gə́ wɔji dɔ Jorobabel, kura lə Njesigənea̰ lé
20Ndɔ gə́ njekɔm’g rɔ-joo-giree-sɔ lə naḭ gə́ neelé Njesigənea̰ ula Aje ta gə́ njekɔm’g gɔl joo gə rɔtaje neelé pana: 21Maji kari ula Jorobabel, njeguburuɓee gə́ Juda togə́bè pana: N’a gə yə dara gə naŋg nee. 22N’a tɔs kalimbai ɓeeko̰je tila ləm, n’a tuji siŋgamoŋ lə ɓeeko̰je lə ginkoji dəwje gə raŋg ləm, n’a tɔs pusu-rɔje gə dee gə́ d’isi dɔ’g tila dee ləma, kundaje gə njékaw rɔ gə kundaje lé d’a tɔl na̰ ləm tɔ. 23Njesigənea̰ gə́ njeboo-néje lé pana: Mee ndəa’g neelé n’a kuni-i Jorobabel, kura lə neḛ gə́ to ŋgolə Səaltiel. Njesigənea̰ ɓa pa bèe. N’a ŋgəmi asəna gə nétorji neḛ mbata neḛ nja n’kɔdi n’ɔri. Njesigənea̰ gə́ njeboo-néje ɓa pa bèe ya.
Currently Selected:
Ajee 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
