Habakuk 2
2
1Ma lé m’isi loo-kula-ŋgəm-loo’g ləm,
Ma m’aar dɔ kəi gə́ ŋgal gə́ duu dɔ loo.
Ma m’isi kəmba mba koo né gə́ Njesigənea̰ a gə kulam ləm,
Gə ta gə́ m’a gə kilá keneŋ dɔ né gə́ m’dəjee’g lé ləm tɔ.
Ta kila’g lə Njesigənea̰
2Njesigənea̰ ulam ta pana:
Maji kam m’ndaŋg gin ndərta gə́ m’oo lé,
Maji kam m’tḭja dɔ bəgərə ndaŋg maktub’g
Mba kar dee tura d’oo njai-njai.
3Mbata ndərta neelé ta gə́ wɔji ndəa to njaŋg mba̰.
Ta neelé aw gə́ loo tɔl ŋgaŋgee’g ya ndá
Taŋgɔm a godo keneŋ,
Ɓó lé yee tila gə́ tila ɓəi kara maji kam ŋgina ya
Mbata yee a kaw lée’g ya,
A kaw lée’g béréré tɔgərɔ ya .
4Aa ooje, dəw neelé ti rəa
Ar ta néra gə́ danasur godo mée’g,
Nɛ njemeekarabasur lé meekun ləa ɓa yeḛ a si ne kəmba .
5Njebeelé lé to asəna gə dəw gə́ kido tɔlee aree ti ne rəa
Ndá yeḛ si lɔm el,
Yeḛ teḛ təa to gə́ bwa-dɔɓar bèe ləm,
Yeḛ to asəna gə yoo gə́ né asee el bèe ləm tɔ,
Yeḛ ndɔr ginkoji dəwje gə raŋg lai gə́ rəa’g ləm,
Yeḛ mbo̰ koso-dəwje lai gə́ rəa’g ləm tɔ.
6Débee neelé see a kar dəwje lai d’oo ta ləa gə́ suta ləm,
Gə nékogo ləma, gə né kɔr su ləm tɔ el wa.
Ta ndɔlje gə́ mi
D’a pa pana:
Meeko̰ a koso dɔ sí-seḭ gə́ mbo̰je néje
Gə́ to né ka̰ sí el dɔ na̰’d!
See saar ndɔ gə́ ra wa ...
Meeko̰ a koso dɔ sí-seḭ gə́
Undaje ɓaŋg dɔ sí’g gə́ kédé-kédé!
7Njékṵda ɓaŋg dɔ sí’gje lé
See d’a kuba loo kalaŋ kḭ sə sí el wa.
Njékula kəm sí ndooje lé
See d’a kḭ rad kuba sí kwa sí el wa.
Bèe ɓa seḭ a tel toje ne nékwaje lə dee.
8To gə́ seḭ taaje néje lə ginkoji dəwje gə raŋg bula lé
Ndá koso-dəwje gə́ nai lé d’a taa néje lə sí-seḭ tɔ,
Mbata seḭ ɔmje məs dəwje naŋg ləm,
Seḭ raje néje gə́ kərm-kərm mee ɓee’g ləma,
Seḭ ɔsje ɓee-boo gə dəwje lai gə́ d’isi keneŋ rəw ləm tɔ.
9Meeko̰ a koso dɔ sí-seḭ’d
Gə́ mbo̰je nékiŋgaje gə́ gə goo rəbee el
Oreeje mee kəije’g lə sí
Gə mba kar kəi-si sí to ne tar sab ləm,
Gə mba kɔg ne némeeko̰ loo teḛ dɔ sí’g ləm tɔ!
10Yee ɓa to rɔkul gə́ seḭ wɔjije njaŋg
Mba karee oso dɔ njémeekəije’g lə sí
Loo gə́ seḭ tujije koso-dəwje bula ləm,
To kaiya gə́ seḭ raje ilaje dɔ sí-seḭ’g ya ləm tɔ.
11Mbata kɔr mbal gə́ mee ndògo-bɔrɔ’g ra né wəl ləm,
Kagje gə́ tɔ ne kag dɔ kəi’g na̰’d kara d’ilá ta’g ləm tɔ.
12Meeko̰ a koso dɔ yeḛ gə́ unda gin ɓee gə məs ləm,
Gə tum gin ɓee-boo gə néra gə́ kori-kori ləm tɔ!
13Aa ooje, loo gə́ Njesigənea̰ gə́ njeboo-néje wɔji-kwɔji né mée’g ndá
Koso-dəwje ra kula nɛ pər ɓa tujee ləm,
Ginkoji dəwje gə raŋg ra kula nɛ dao ne kari ba ləm tɔ.
14Mbata gər gə́ dəwje gər rɔnduba lə Njesigənea̰ lé
A taa naŋg nee pəl-pəl
Asəna gə mán gə́ ɔn dɔ ŋguru baa-boo-kad gə́ bər bèe .
15Meeko̰ a koso dɔ sí-seḭ’d
Gə́ arje mar síje nékai gə́ mḭ d’ai lé
Seḭ gə́ mbélje né gə́ mee ku’g lə sí dɔ maree’g
Ar deeje d’ai aree oso kəm dee’g
Gə mba kar sí ooje ne meembaa dee lé.
16Seḭ nja arje rɔkul boo tur dɔ sí pubug,
Seḭ nja kara aije ndá ribaje ne dɔ nérɔkul lə sí gə́ raga ya to!
Njesigənea̰ a kar sí aije bai-oŋg ləa sɔd ya
Ndá nérɔkul lé a kar rɔnduba lə sí tel to né gə́ mina̰.
17Mbata néraje gə́ kərm-kərm gə́ seḭ raje mee ɓee gə́ Liba̰ lé
D’a tel koso dɔ sí’g ləm,
Tuji gə́ seḭ tujije dakulje lé
Dakulje kara d’a kɔm ɓəl dɔ sí’g ləm tɔ.
Mbata seḭ ɔmje məs dəwje naŋg ləm,
Seḭ raje né gə́ kərm-kərm mee ɓee’g
Oma̰je ne gə ɓee-boo gə dəwje lai gə́ d’isi keneŋ ləm tɔ.
18Néndaji gə́ tɔl lé see majee to ɗi mbata lə njetɔlee wa.
Néndaji gə́ léḛ gə́ ndoo ne né gə ŋgɔm
Gə mba kar njerea unda tar ɔm mée dɔ’g
Loo gə́ yeḛ si ra magəje gə́ ta mundu lé kara see majee to ɗi wa.
19Meeko̰ a koso dɔ sí-seḭ’d gə́ ulaje kag pana: Ḭta!
Gə ulaje kɔr mbal gə́ ta mundu pana: si kəmba!
See d’askəm kar kəm sí inja dɔ né’g wa.
Aa ooje, d’ɔr giree gə larnda gə larlɔr
Nɛ kəmə gə́ téḛ bèe godo mée’g.
20Njesigənea̰ si mee kəi’g ləa gə́ to gə kəmee lé.
Maji kar dəwje lai gə́ dɔ naŋg nee
D’isi gə ta dee gə́ mundu nea̰’g ya!
Currently Selected:
Habakuk 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.