Gḭ-Néje 8
8
1Mee Ala olé dɔ Noe’g gə dɔ daje’g lai, gə dɔ nékulje’g lai gə́ d’aar səa mee kəi-kag’d lé. Ala ar lel ula dɔ naŋg nee ndá mán lé rəm. 2Man bélm gə́ ḭ bwa gə́ naŋg ləm, gə kəm dara gə́ ɔr wuyum ləm tɔ lé gaŋg ŋgəji-ŋgəji ndá ndi əw rəa kər dɔ naŋg nee tɔ. 3Manje gə́ dɔ naŋg nee rəm jan-jan d’aw əw ndá as ndɔ tɔl dəa rɔ-mi (150) ɓa rəm yəm-yəm ɓəi. 4Naḭ gə́ njekɔm’g siri gə ndɔ dɔg-giree-siri lé kəi-kag rəm aar dɔ mbalje gə́ Ararat. 5Man lé rəm gə́ kédé-kédé saar naḭ gə́ njekɔm’g dɔg. Ndɔ gə́ dɔtar mee naḭ gə́ njekɔm’g dɔg lé sém mbalje gə́ tar teḛ raga.
6Ndɔ rɔ-sɔ goo’g ndá Noe ɔr kəmbolè kəi-kag gə́ yeḛ ra lé ila tag. 7Yeḛ wa ga̰-ga̰ kára ilá tar aree unda loo teḛ raga. Ga̰-ga̰ neelé ila dɔ mán’g tel ree, aw tel ree ta-ta saar ar mán lé yi dɔ naŋg nee. 8Tɔɓəi Noe wa dərnda ilá tar tɔ, aree unda loo teḛ raga mba koo see mán lé yi dɔ naŋg nee ŋga wa. 9Nɛ dərnda neelé oo loo kəm kila gɔlee keneŋ el ndá yee tel ree rəa’g mee kəi-kag’d mbata mán taa loo yal-yal dɔ naŋg nee ya ɓəi. Noe ula jia wá ilá rəa’g mee kəi-kag’d. 10Yeḛ ŋgina ndɔ siri goo’g ɓəi ndá yeḛ ila dərnda lé raga ya tɔɓəi. 11Kàrkemetag ndá yel lé tel ree rəa’g ndá aa oo, kam koiyo gə́ yee ti lé to təa’g. Togə́bè ɓa Noe gər gao to gə́ mán lé rəm aw yi dɔ naŋg nee ŋga. 12Yeḛ ŋgina as ndɔ siri ya tɔɓəi ndá yeḛ wa dərnda lé ilá raga ya ɓəi. Nɛ yee tel ree rəa’g gogo el ŋga.
13Mee ndɔ gə́ kára lə naḭ gə́ dɔtar, loo gə́ ləb Noe aḭ tɔl-misa̰-giree-kára (601) lé ndá mán lé yi dɔ naŋg nee tɔ. Noe ɔr né gə́ dəb dɔ kəi-kag’d, yeḛ aa loo oo ndá naŋg nee tudu mba̰ ya. 14Naḭ gə́ njekɔm’g joo, gə ndɔ rɔ-joo-giree-siri ləa lé naŋg tudu kurum-kurum.
15Togə́bè Ala ula Noe pana: 16Teḛ mee kəi-kag’d gə́ raga ŋga, i seḭ gə dené ləi, gə ŋganije gə́ diŋgam, gə denéje lə ŋganije səi na̰’d. 17Daje lai ləm, gə nékundaje lai gə́ d’aw kəmba gə́ d’aar səi na̰’d ləm tɔ lé ar dee teḛ səi gə́ raga na̰’d ya, yelje ləm, gə nékulje ləma, gə daje lai gə́ d’ag naŋg ləm tɔ. Maji kar dee taa naŋg nee pəl-pəl ləm, d’oji na̰ yaa̰ d’ɔs goo na̰ gə́ kédé-kédé ləm tɔ. 18Noe unda loo teḛ gə ŋganeeje gə́ diŋgam gə dené ləa gə denéje lə ŋganeeje na̰’d tɔ. 19Daje lai ləm, gə néje lai gə́ d’ag naŋg gə ta mee dee ləm, gə yelje lai ləma, gə néje lai gə́ d’aw kəmba dɔ naŋg nee gə gel dee gel dee ləm tɔ lé d’unda loo mee kəi-kag’d lé teḛ.
20Noe ra loo-nékinjaməs ar Njesigənea̰. Yeḛ mbər nékulje gə́ d’àr ŋgad-ŋgad ləm, gə yelje gə́ d’àr ŋgad-ŋgad ləm tɔ ndá yeḛ inja dee gə́ nékinjaməs gə́ ka̰ roo dɔ loo-nékinjaməs’g neelé. 21Njesigənea̰ taa baḭ né gə́ ə̰də lel ndá yeḛ pa mée’g pana: M’a Man naŋg neelé gə mbata lə dəw lé gogo el ŋga, mbata dəw lé un kudee gə́ kasee ba saar gə́ kédé-kédé lé takə̰ji gə́ mée’g majel ya, tɔɓəi m’a tel tuji néje lai gə́ d’aw kəmba lé to gə́ m’ra kédé lé el ŋga tɔ.
22A k’un kudee nee saar gə́ rudu ndɔ’g lé
Naḭ dubu né gə yee gə́ ka̰ kinja né ləm,
Kul gə loo nuŋga ləm,
Ɓàr gə naḭ-kàr ləma,
Dan-kàr gə loondul ləm tɔ lé
D’a godo nda̰ bèe el.
Currently Selected:
Gḭ-Néje 8: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
