Gḭ-Néje 5
5
Ŋgaka Adam un kudee Adam saar teḛ Noe
1Aa ooje, maktub gə́ wɔji dɔ ŋgaka Adam lé ɓa nee. Loo gə́ Ala unda dəw lé yeḛ rəa aree to tana gə Ala ya pai-pai#Gn 1.27-28 . 2Yeḛ unda diŋgam gə dené ləm, yeḛ tɔr ndia dɔ dee’g ləm tɔ ndá yeḛ unda ri dəw dɔ dee’g ɓar dee ne mee ndəa gə́ yeḛ unda dee lé#Mat 19.4, Mar 10.6.
3Ləb Adam aḭ tɔl dəa rɔ-munda (130) ndá yeḛ oji ŋgon gə́ diŋgam gə́ ɔr rəa pai-pai ləm, to tana səa ləm tɔ ndá yeḛ unda ria lə Set. 4Ndɔ si kəmba lə Adam gə́ orè goo ndɔ koji Set lé aḭ ləbee tɔl jinaijoo (800) ɓa yeḛ oji ŋganje gə́ diŋgam gə njé gə́ dené ɓəi tɔ. 5Ndɔ si kəmba lə Adam lai lé aḭ ləbee tɔl jinaikara gə dəa rɔ-munda (930) ɓa yeḛ wəi ɓəi.
6Ləb Set lé aḭ tɔl-giree-mi (105) ndá yeḛ oji Enɔs tɔ. 7Set lé si kəmba ləbee tɔl jinaijoo giree-siri (807) orè goo ndɔ koji Enɔs ɓa yeḛ oji ŋganje gə́ diŋgam gə njé gə́ dené ɓəi tɔ. 8Ndɔ si kəmba lə Set lai lé aḭ ləb tɔl jinaikara gə dəa dɔg giree-joo (912) ɓa yeḛ wəi ɓəi.
9Ləb Enɔs aḭ rɔ-jinaikara (90) ndá yeḛ oji Kenan. 10Enɔs lé si kəmba ləbee tɔl jinaijoo gə dəa dɔg giree-mi (815) orè goo ndɔ koji Kenan ɓa yeḛ oji ŋganje gə́ diŋgam gə njé gə́ dené ɓəi tɔ. 11Ndɔ si kəmba lə Enɔs lai lé aḭ ləbee tɔl jinaikara gə giree-mi (905) ɓa yeḛ wəi ɓəi.
12Ləb Kenan aḭ rɔ-siri (70) ndá yeḛ oji Mahalaleel. 13Kenan lé si kəmba ləbee tɔl jinaijoo gə dəa rɔ-sɔ (840) orè goo ndɔ koji Mahalaleel ɓa yeḛ oji ŋganje gə́ diŋgam gə njé gə́ dené ɓəi tɔ. 14Ndɔ si kəmba lə Kenan lai lé aḭ ləbee tɔl jinaikara gə dəa dɔg (910) ɓa yeḛ wəi ɓəi.
15Ləb Mahalaleel aḭ rɔ-misa̰-giree-mi (65) ndá yeḛ oji Jered. 16Mahalaleel lé si kəmba ləbee tɔl jinaijoo gə dəa rɔ-munda (830) orè goo ndɔ koji Jered ɓa yeḛ oji ŋganje gə́ diŋgam gə njé gə́ dené ɓəi tɔ. 17Ndɔ si kəmba lə Mahalaleel lai lé aḭ ləbee tɔl jinaijoo gə dəa rɔ-jinaikara giree-mi (895) ɓa yeḛ wəi ɓəi.
18Ləb Jered aḭ tɔl dəa rɔ-misa̰ giree-joo (162) ndá yeḛ oji Enok. 19Jered lé si kəmba ləbee tɔl jinaijoo (800) orè goo ndɔ koji Enok ɓa yeḛ oji ŋganje gə́ diŋgam gə́ njé gə́ dené ɓəi tɔ. 20Ndɔ si kəmba lə Jered lai lé aḭ ləbee tɔl jinaikara gə dəa rɔ-misa̰ giree-joo (962) ɓa yeḛ wəi ɓəi.
21Ləb Enok aḭ rɔ-misa̰-giree-mi (65) ndá yeḛ oji Metusela. 22Enok lé loo gə́ yeḛ oji Metusela mba̰ ndá yeḛ njaa gə Ala ləbee tɔl-munda (300) ɓa yeḛ oji ŋganje gə́ diŋgam gə njé gə́ dené ɓəi tɔ. 23Ndɔ si kəmba lə Enok lai lé aḭ ləbee tɔl munda gə dəa rɔ-misa̰ giree-mi (365). 24Enok lé njaa gə Ala ndá godo mbata Ala nja unee#Jud 14, Ǝbr 11.5 .
25Ləb Metusela aḭ tɔl gə dəa rɔ-jinaijoo giree-siri (187) ndá yeḛ oji Lemek. 26Metusela si kəmba ləbee tɔl siri gə dəa rɔ-jinaijoo giree-joo (782) orè goo ndɔ koji Lemek ɓa yeḛ oji ŋganje gə́ diŋgam gə njé gə́ dené ɓəi tɔ. 27Ndɔ si kəmba lə Metusela lai lé aḭ ləbee tɔl jinaikara gə dəa rɔ-misa̰ giree-jinaikara (969) ɓa yeḛ wəi ɓəi.
28Ləb Lemek aḭ tɔl gə dəa rɔ-jinaijoo giree-joo (182) ndá yeḛ oji ŋgon gə́ diŋgam. 29Yeḛ unda ria lə Noe pana: Yeḛ neelé a gɔl meḛ sí loo dao gə́ jeḛ n’daoje’g ləm, gə loo kulaje’d gə́ kədərə gə́ jeḛ n’raje gə ji sí dɔ naŋg nee gə́ Njesigənea̰ manee lé ləm tɔ. 30Lemek si kəmba ləbee tɔl-mi gə dəa rɔ-jinaikara giree-mi (595) orè goo koji Noe ɓa yeḛ oji ŋganje gə́ diŋgam gə njé gə́ dené ɓəi tɔ. 31Ndɔ si kəmba lə Lemek lai lé aḭ ləbee tɔl-siri gə dəa rɔ-siri giree-siri (777) ɓa yeḛ wəi ɓəi.
32Ləb Noe aḭ tɔl-mi (500) ndá yeḛ oji Sem, gə Kam gə Japet tɔ.
Currently Selected:
Gḭ-Néje 5: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
