Gḭ-Néje 38

Juda gə Tamar

1Mee ndəaje’g neelé Juda sa rəa rɔ ŋgakea̰je’g aw si rɔ dəw gə́ Adulam’g gə́ ria lə Hira. 2Lée neelé Juda oo ŋgolə Sua gə́ to dəw gə́ Kana̰. Yeḛ təa gə́ dené ləa ndá deḛ səa d’ɔm na̰’d tɔ. 3Yeḛ taa kèm ndá oji ŋgon gə́ diŋgam ndá yeḛ unda ria lə Er. 4Yeḛ taa kèm gə́ raŋg tɔɓəi oji ŋgon gə́ diŋgam ndá yeḛ unda ria lə Onan. 5Yeḛ oji ŋgon gə́ diŋgam gə́ raŋg ya ɓəi ndá unda ria lə Sela. Yeḛ oji ŋgon neelé loo gə́ Juda si ne Kejib.

6Juda taa dené gə́ ria lə Tamar ar Er, ŋgondəree lé. 7Er gə́ ŋgondər Juda lé to njemeeyèr kəm Njesigənea̰’g ndá Njesigənea̰ tɔlee. 8Bèe ɓa Juda ula Onan pana: Aw rɔ dené lə ŋgokɔḭ’g aw təa gə́ dené nduba ləi bèe mba koji ne ŋgon tor ŋgokɔḭ’g.

9Nɛ Onan lé gər gao to gə́ ŋganje neelé d’a to kea̰ yeḛ-je el ndá loo gə́ yeḛ to gə dené lə ŋgokea̰ lé ndá yeḛ sané mán rəa naŋg kad mba karee oji ŋgon tor ŋgokea̰’g lé el. 10Nérea lé taa kəm Njesigənea̰ el ndá Njesigənea̰ tɔlee ya tɔ. 11Togə́bè ɓa Juda ula məmeeje gə́ Tamar pana: Aw si bua kəi lə bɔbije saar ŋgonəm gə́ Sela lé tɔg ɓa.

Yeḛ pa togə́bè nà banelə Sela kara a kwəi to gə́ ŋgakea̰je bèe ya tɔ. Ndá Tamar lé ɔd aw si kəi lə bɔbeeje ya.

12Ndɔ aḭ bula goo’g ndá ŋgolə Sua gə́ to dené lə Juda lé wəi. Loo gə́ meeko̰ lə Juda unda naŋg mba̰ ndá yeḛ ḭ aw Timna, aw rɔ dee gə́ njékḭja bḭ badje’g ləa, yeḛ gə baokura ləa gə́ ria lə Hira, dəw gə́ Adulam lé na̰’d. 13D’ula Tamar taree pana: Aa oo məmije lé ḭ aw Timna mba kinja bḭ badje ləa. 14Yen ŋga yeḛ ɔr kubu ŋgaw-bua ləa ndá yeḛ un kubu ko̰kəm ula rəa’g ləm, yeḛ ndèm rəa gə kubu gə́ raŋg ləm tɔ ɓa aw si tarəwkɔg’d gə́ Enayim gə́ aw par gə́ Timna. Mbata yeḛ oo to gə́ Sela lé tɔg mba̰ nɛ d’aree təa gə́ dené el. 15Juda lé aa loo ée ndá yeḛ ə̰ji ta mée’g to gə́ yeḛ to kaiya-dené mbata yeḛ on kəmee gə kubu. 16Yeḛ aw rəa’g ta rəbə ulá pana: Ya̰ loo am m’to səi. Mbata yeḛ gəree gə́ məmeeje lé el. Yeḛ lé dəjee pana: See ɗi ɓa i a kam to ne səm wa.

17Yeḛ ilá keneŋ pana: M’a kula gə ŋgon bya̰ gə́ mbuna koso-nékulje’g ləm kari.

Yeḛ dəjee pana: See nékwaɓaŋ gə́ ban ɓa i a kya̰ jim’g saar ndɔ gə́ a kula ne gə ŋgon bya̰ lé kam wa.

18Yeḛ ilá keneŋ pana: See nétona gə́ ban ɓa m’a kari wa.

Yeḛ pana: Nétorjii ləm, gə kúla ləi ləma, gə kag-tɔs gə́ to jii’g ləm tɔ.

Ndá yeḛ aree néje neelé ya. Tɔɓəi yeḛ to səa ndá Tamar lé əskèm. 19Dené lé ɔd aw loo ləa. Yeḛ ɔr kubu ko̰kəm ləa lé rəa’g tel ula kubu ŋgaw-bua rəa’g. 20Juda ula gə ŋgon bya̰ ar baokura ləa gə́ to dəw gə́ Adulam aw ne mba taa ne nétona gə́ to ji dené’g lé. Nɛ yeḛ iŋgá el. 21Yeḛ dəji dəwje gə́ d’isi lée’g neelé pana: See kaiya-dené gə́ si Enayim mbɔr rəbə lé see si ra wa.

Deḛ d’ila keneŋ pana: Kaiya-dené si loo gə́ nee’g kédé el.

22Yeḛ tel aw rɔ Juda’g ulá pana: Ma m’iŋgá el ləm, dəwje gə́ d’isi lée’g neelé kara deḛ pana: Kaiya-dené si loo gə́ neelé kédé el ləm tɔ.

23Juda pana: Maji karee ŋgəm né gə́ to jia’g lé nà banelə a kila rɔkul dɔ sí’g. Aa oo, ma lé m’ula gə ŋgon bya̰ ya ndá i lé i iŋgá el tɔ.

24As naḭ munda gogo ndá deḛ ree d’ula Juda pana: Məmije Tamar tel to kaiya-dené ŋga ndá yeḛ aw gə kèm.

Juda pana: Maji kar sí oreeje gə́ raga ndá réeje ya.

25Loo gə́ deḛ teḛ səa gə́ raga ndá dené neelé ula kula ar məmeeje lé pana: Dəw gə́ njenéje neelé ɓa to njekèm ləm. Tə̰ oo, see nétorji neelé gə kúla neelé gə kag-tɔs neelé to ka̰ nawa.

26Juda oo néje neelé gə́ kea̰-yeḛ ya ndá yeḛ pana: Dené neelé to dəw gə́ gelee godo undam-ma ya. Mbata m’aree taa ŋgonəm gə́ Sela el. Ndá Juda lé tel gəree gogo el ŋga.

27Ndɔ gə́ yeḛ a gə koji ŋgon ndá aa ooje nduŋgaje ɓa yeḛ oji dee ya. 28Loo gə́ yeḛ si oji dee ndá yeḛ gə́ kára ula jia raga kédé. Njetaa-ndóo lé wa tɔ gə kúla gə́ kas njir-njir ndá yeḛ pana: Yeḛ neelé teḛ kédé.

29Nɛ yeḛ tel gə jia gə́ kəi ndá ŋgokea̰ ɓa teḛ ɓəi. Togə́bè njetaa-ndóo lé pa pana: See ban ɓa i nar rəw teḛ gə tɔgi bèe wa. Ndá yeḛ unda ria lə Peres, (kɔr gelee pana): Né gə́ ta̰ lé. 30Gée gə́ gogo ŋgokea̰ lé teḛ, yeḛ gə́ kúla gə́ kas njir-njir to jia’g lé ndá deḛ d’unda ria lə Jera.

Currently Selected:

Gḭ-Néje 38: SBA2015

Highlight

Copy