Gḭ-Néje 35

Ala tɔr ndia dɔ Jakob’g loo gə́ Betel

1Ala ula Jakob pana: Uba naŋg ḭta, aw Betel mba si keneŋ. Lée neelé i a ra loo-nékinjaməs keneŋ kar Ala, yeḛ gə́ teḛ dɔi’g loo gə́ i aḭ ŋgokɔḭ Esawu lé#Gn 28.11-17.

2Jakob ula njémeekəije ləa gə deḛ lai gə́ d’isi səa lé pana: Tɔrje magəje gə́ dɔ ɓee’d gə́ to mbuna sí’g lé gə́ raŋg ləm, togoje rɔ sí ləma, tel tulaje kubuje gə́ raŋg rɔ sí’g ləm tɔ. 3Jeḛ j’a kḭ tuga loo kaw Betel. Lée gə́ neelé ɓa m’a ra loo-nékinjaməs keneŋ kar Ala, yeḛ gə́ oo ndum mee ndɔ gə́ ma m’nai ne dan nékəmndoo’g ləm, gə nai səm loo-mbá gə́ ma m’aw keneŋ lé ləm tɔ.

4Deḛ d’odo magəje gə́ dɔ ɓee’g lai gə́ to ji dee’g ləm, gə mbaiŋgiraje gə́ to mbi dee’g ləm tɔ d’ar Jakob. Ndá Jakob iya dee gel kag gə́ ɓaree térébḭtə gə́ to mbɔr Sikem’g dəb. 5Gée gə́ gogo deḛ d’ɔd d’aw tɔ. Ɓəl Ala gə́ to ɓəl gə́ boo lé oso dɔ ɓee-booje’g lai gə́ gugu dɔ dee ndá deḛ tuba goo ŋgalə Jakob lé el.

6Jakob gə deḛ lai gə́ d’aw səa lé teḛ Luj gə́ to Betel, mee ɓee gə́ Kana̰. 7Yeḛ ra loo-nékinjaməs keneŋ ndá yeḛ unda ri loo neelé lə El-Bétel. Mbata lé gə́ neelé ɓa Ala riba səa dɔ rəa keneŋ loo gə́ yeḛ si aḭ ne ŋgokea̰ lé.

8Debora, njeŋgəm Rebeka lé wəi ar deḛ dubee no̰ Betel’g mbɔr kag-sɛnə gə́ d’unda ria lə kag-sɛnə no̰ yoo.

9Loo gə́ yeḛ ḭ Padan-Aram ree mba̰ ndá Ala tel teḛ dɔ Jakob’g gɔl kára ɓəi ndá yeḛ tɔr ndia dəa’g. 10Ala ulá pana: Rii lé to Jakob nɛ d’a ɓari Jakob gogo el ŋga. Rii a to Israɛl ɓa.

Ndá Ala unda ria lə Israɛl#Gn 32.28. 11Ala ulá pana: Ma m’to Ala gə́ m’to Bao-siŋgamoŋ. Maji kari oji ŋganje bula ar dee d’ɔs goo na̰ goo na̰ ya. Ginkoji dəwje gə́ kára ləm, gə ginkoji dəwje gə́ bula ləm tɔ lé d’a kḭ rɔi’g ləm, mbaije kara d’a teḛ məəi’g ya ləm tɔ#Gn 17.4-8 . 12Dɔ naŋg ɓee neelé gə́ ma m’ar Abrakam gə Isaak lé m’a kari-i gə ŋgakaije gə́ d’a korè gooi gə́ ka̰ dee ya.

13Yen ɓa Ala ḭ loo gə́ yeḛ ula Jakob ta keneŋ lé ya̰ ɔd aw tar. 14Jakob unda nékolé-mee loo gə́ Ala ulá ta keneŋ lé, to nékolé-mee gə́ ra gə kɔr mbalje ndá yeḛ saga nékar gə́ ka̰ kai ləm, gə ubu ləm tɔ dɔ’g#Gn 28.18-19. 15Jakob unda ri loo gə́ Ala ulá ta keneŋ lé lə Betel (kɔr gelee pana): Kəi lə Ala.

Kwəi lə Rasel

16Deḛ d’uba naŋg Betel d’ḭ. Nɛ loo gə́ nai lam ɓa ya gə mba kar dee teḛ Eprata ɓəi ndá ndóo too Rasel. Ndóo lé kədərə səa yaa̰. 17Loo gə́ ndóo lé rəa yaa̰ ndá njeteaandóo lé ulá pana: Ǝw rɔi ɓəl mbata i iŋga ŋgon gə́ diŋgam gə́ raŋg ɓəi.

18Nɛ loo gə́ kəmə ləa a gə godo mbata yeḛ a gə kwəi ndá yeḛ unda ria lə Ben-Oni, nɛ bɔbeeje ɓaree Bḛjami.

19Rasel wəi ndá deḛ dubee rəw gə́ aw gə́ Eprata gə́ to Betlehem. 20Jakob unda nékolé-mee dɔɓaree’g. Nékolé-mee dɔɓar lə Rasel lé to keneŋ saar teḛ mee ndəa gən ya ɓəi.

21Israɛl ḭ keneŋ aw ndá yeḛ la kəi-kubu ləa gir Migdal-Eder’g.

22Loo gə́ Israɛl si dɔ naŋg ɓee’g neelé ndá Rubḛ aw to gə Bila gə́ to gamla-dené lə bɔbeeje lé. Ndá Israɛl oo taree.

Ŋgalə Jakob lai lé d’aḭ dɔg-gir-dee-joo#Gn 49.4. 23Ŋgalə Lea ɓa ri dee to nee: Rubḛ, ŋgondər Jakob lé gə Simeo̰, gə Ləbi, gə Juda, gə Isakar, gə Jabulo̰ tɔ. 24Ŋgalə Rasel lé ɓa ri dee to nee: Jisəb gə Bḛjami. 25Ŋgalə Bila, yeḛ gə́ to gə́ ŋgonjelookisi lə Rasel lé ɓa ri dee to nee: Dan gə Neptali. 26Ŋgalə Jilpa, yeḛ gə́ to gə́ ŋgonjelookisi lə Lea lé ɓa ri dee to nee: Gad gə Aser tɔ. Deḛje neelé to ŋgalə Jakob gə́ yeḛ oji dee Padan-Aram.

Kwəi lə Isaak

27Jakob teḛ rɔ bɔbeeje Isaak’d ɓee gə́ Mamré dɔ naŋg gə́ Kirjat-Arba gə́ to Ebro̰, loo gə́ Abrakam gə Isaak d’isi keneŋ kédé lé#Gn 13.18. 28Ləb Isaak aḭ tɔl dəa rɔ-jinaijoo (180). 29Ndá kəmə ləa ɔr aree wəi aw iŋga keaje-je. Ləbee aḭ bula ləm, ndəaje kara asee nag ləm tɔ. Ndá ŋganeeje gə́ Esawu gə Jakob dubee tɔ.

Currently Selected:

Gḭ-Néje 35: SBA2015

Highlight

Copy