Gḭ-Néje 33

Jakob gə Esawu d’ɔm na̰’d yəg

1Jakob un kəmee gə́ tar aa loo. Ndá aa oo, Esawu si ree gə dəwje tɔl-sɔ. Yeḛ kai ŋganje ar Lea ləm, gə Rasel ləma, gə ŋganjélookisije gə́ dené gə́ joo lé ləm tɔ. 2Yeḛ ar ŋganjélookisije gə́ dené gə ŋgan deeje d’aw kédé, tɔɓəi Lea gə ŋganeeje d’aw goo dee’g, ɓa Rasel gə Jisəb d’udu goo dee tɔ. 3Yeḛ nja dəs aw no̰ dee’g. Ndá yeḛ rugu saar aw naŋg-naŋg as gɔl siri ɓa teḛ rɔ ŋgokea̰’g dəb ɓəi. 4Esawu aiŋgwɔd tila kəmee. Yeḛ wá kaaree’g sud, tuga gwɔbee kea̰’g, wá kaaree’g sud tɔ. Deḛ no̰ gə mán-no̰ kəm dee’g. 5Esawu un kəmee gə́ tar oo denéje gə ŋganje ndá yeḛ dəjee pana: See to na̰je ɓa d’aar səi nee wa.

Jakob tel ilá keneŋ pana: To ŋganje gə́ Ala wa ne noji gə kura ləi lé ya.

6Ŋganjélookisije gə́ dené rəm pər gə́ rəa’g, deḛ gə ŋgan deeje ndá d’unda barmba nea̰’g. 7Lea gə ŋganeeje rəm pər gə́ rəa’g d’unda barmba nea̰’g tɔ. Gée gə́ gogo Jisəb gə Rasel kara rəm pər gə́ rəa’g d’unda barmba nea̰’g tɔ. 8Esawu dəjee pana: Néje lai gə́ m’iŋga dee rəbə lé see to mba ra ne ɗi wa.

Jakob ilá keneŋ pana: To gə mba kam taa ne kəm mbai ləm rəgm ya.

9Esawu pana: Ŋgokɔm, ma lé m’isi dan nékiŋgaje gə́ d’asm nag’d. Né ləi lé maji kari ŋgəm aree to gə́ kaḭ ya.

10Jakob ilá keneŋ pana: Wah, bèe el! M’ra ndòo rɔi’g, ɓó lé ma m’taa kəmi rəgm ndá maji kari taa nénoji neelé jim’g. Mbata kaa gə́ m’aa loo m’oo kəmi lé to asəna gə ma m’aa loo m’oo kəm Ala bèe ndá i wam gə́ rɔi’g gə́ majee ya tɔ. 11Ma m’ra ndòo rɔi’g, maji kari taa nénoji ləm gə́ ma m’ree ne rɔi’g lé ya. Mbata Ala ar nénojije ləa taa rɔm pəl-pəl ndá m’lal né kára el.

Yeḛ oma̰ səa saar ar Esawu taa nénoji ləa lé ya tɔ.

12Esawu pana: Maji kar sí j’ḭ j’ɔmje na̰ rəbə j’awje ŋga. Ma lé m’a kaw nɔḭ’g kédé.

13Jakob ilá keneŋ pana: Mbai ləm gər gao to gə́ siŋga ŋganje to lam ba ləm, badje gə maŋgje gə́ ŋgan deeje d’aw d’il mbà dee kara d’aar keneŋ ləm tɔ. Ɓó lé jeḛ j’ɔs dee gə mba kar dee njaa rəbə ndɔ kára doŋgɔ ndá koso-nékulje lé d’a kwəi lai. 14Maji kar mbai ləm dəs aw kédé no̰ kura’g ləa ndá ma lé m’a kaw gée’g lam-lam bèe. M’a njaa gə panjaa koso-nékulje gə́ d’a kaw nɔm’g ləm, gə panjaa ŋganje ləm tɔ saar m’a teḛ ne kəi lə mbai ləm ɓee gə́ Seir ɓəi.

15Esawu pana: Ma m’ndigi kya̰ dəwje ləm gə́ na̰je səi na̰’d ɓa.

Nɛ Jakob ilá keneŋ pana: See gə mba ɗi ɓəi wa. Né gə́ ma m’ndigi lé to mba taa kəm mbai ləm rəgm ɓa. 16Mee ndəa’g neelé nja Esawu tel un rəw gə́ aw gə́ Seir. 17Jakob ɔd aw par gə́ Sukot. Yeḛ ra kəi kára mbata ləa-yeḛ ləm, yeḛ kiri né mbata lə koso-nékulje ləa ləm tɔ. Gelee gə́ nee ɓa d’unda ne ri loo neelé lə Sukot ya.

18Loo gə́ yeḛ ḭ Padan-Aram tel ree ndá Jakob teḛ mee ɓee-boo gə́ Sikem mee ɓeeko̰ gə́ Kana̰ gə́ majee ndá yeḛ la kəi-kubu ləa gir ɓee-boo’g neelé. 19Yeḛ ndogo ges loo-ndɔ, loo gə́ yeḛ la kəi-kubu ləa keneŋ ji ŋgalə Hamɔr gə́ to bɔ Sikemje lé gə kəm ŋgan larnda tɔl#Juj 24.32, Ja̰ 4.5. 20Lée neelé yeḛ ra loo-nékinjaməs keneŋ unda ne ria lə El-Elohe-Israɛl kɔr gelee pana: Ala lə Israɛlje lé.

Currently Selected:

Gḭ-Néje 33: SBA2015

Highlight

Copy