Gḭ-Néje 19
19
Ala tuji Sɔdɔm gə Gɔmɔr
1Kuraje lə Ala gə́ dara gə́ joo lé teḛ Sɔdɔm kàrkemetag ndá Lɔt si tarəwkɔg’d lə Sɔdɔm. Loo gə́ Lɔt oo dee ndá yeḛ ḭta aw gə mba tila kəm dee ndá yeḛ unda barmba ɔs dəa naŋg no̰ dee’g. 2Tɔɓəi yeḛ pana: Aa ooje, mbaije ləm, m’ra ndòo rɔ sí’g, maji kar sí a̰dje mee kəi’g lə kura lə sí mba to keneŋ loondul’g nee. Seḭ a togoje gɔl sí ndá seḭ a kḭje gə ndɔ rad ɓa mba kaw kəm sí gə́ kédé ɓəi.
Deḛ tel d’ilá keneŋ pana: Wah! Loondul gə́ neelé jeḛ j’a to raga nee ya.
3Nɛ Lɔt ɔs dee ɓɔḭ-ɓɔḭ saar ar dee ree loo-siée’g ndá d’andə mee kəi’g ləa tɔ. Yeḛ ra muru gad ar dee ləm, yeḛ ar dee ra muru gə́ əm-tiné godo keneŋ ləm tɔ. Ndá deḛ d’o̰ ya.
4Deḛ to naŋg el ya ɓəi ndá dəwje gə́ mee ɓee-boo’d gə́ to dəwje gə́ Sɔdɔm lé ree gugu dɔ kəi sub, un kudee dɔ ŋganje’g saar teḛ ne dɔ ɓugaje’g ya. Koso-dəwje lai lé d’aḭ ree keneŋ ar dəw kára kara naḭ el tɔ. 5Deḛ ɓar Lɔt dəjee pana: See diŋgamje gə́ ree mee kəi’g ləi loondul’g neelé see d’isi ra wa. Maji kari teḛ sə dee gə́ raga rɔ sí’g nee mba kar sí n’toje sə dee#NR 19.22-24.
6Lɔt unda loo teḛ aw par gə́ rɔ dee’g takəi gə́ raga ndá yeḛ udu tarəwkəi gée’g. 7Yeḛ pana: Ŋgakɔmje, ma m’ra ndòo rɔ sí’g, maji kar sí raje né gə́ majel togə́bè el. 8Aa ooje, ŋganəmje gə́ dené joo gə́ gər ŋgaw el ɓəi d’isi gən. M’a ree sə dee rɔ sí’g raga nee ndá seḭ a raje sə dee né gə́ meḛ sí ndigi. Nɛ maji kar sí raje né kára kara gə dəwje neelé el mbata deḛ ree d’isi ndil kəi’g ləm.
9Deḛ tel d’ulá pana: Ɔd gə́ gogo! Deḛ tel pa ya tɔɓəi pana: Yeḛ gə́ ree gə́ dəw-dɔ-ɓee ɓa yeḛ ndigi tel to njegaŋ-rəwta! Maji ya, j’a ra səi majel unda dee-deḛ ya.
Deḛ d’ɔs Lɔt piriŋ gə́ raŋg mba təd takəi kandə keneŋ. 10Diŋgamje neelé d’ula ji dee d’wa Lɔt ŋgə̰dərə ree səa rɔ dee’g kəi ndá deḛ d’udu takəi gée’g. 11Tɔɓəi deḛ d’ila kəm tɔ dɔ dəwje gə́ d’aar tarəwkəi’g lé, un kudee dɔ ŋganje gə́ gɔ-gɔ’g saar teḛ ne dɔ dəwje gə́ tɔg-tɔg’d tɔ, ndá deḛ sané siŋga dee kari ba ɓó d’iŋga tarəwkəi lé el#2Mb 6.18.
12Diŋgamje neelé dəji Lɔt pana: See njé’g ləi gə́ ra ɓa nai loo gə́ nee’g ɓəi wa. Məmije-je, gə ŋganije gə́ diŋgam əsé njé gə́ dené, deḛ lai gə́ mee ɓee’g neelé gə́ to kaḭje lé maji kari ar dee d’ḭ loo gə́ nee’g teḛ gə́ raga. 13Mbata j’a gə tuji loo neelé mbata kaa néra majel lə njéɓeeje neelé ɓar yaa̰ no̰ Njesigənea̰’g. Bèe ɓa Njesigənea̰ ula sí ne gə mba kar sí n’tujee ya.
14Lɔt teḛ raga ndá yeḛ neelé pata ar məmeeje-je gə́ njétaa ŋganeeje gə́ dené pana: Ḭje tar, teḛje loo gə́ nee’g gə́ raga. Mbata Njesigənea̰ a gə tuji ɓee-boo neelé ya.
Nɛ məmeeje-je lé d’oo tapea lé gə́ ta kogo ba.
15Loo gə́ loo to gḭdo-gḭdo ndá kuraje gə́ dara d’ɔs Lɔt ɓɔḭ-ɓɔḭ pana: Ḭta, ar dené ləi gə ŋganije gə́ dené gə́ joo gə́ d’isi nee d’ḭ səi na̰’d tɔ, nà i a tuji gə ɓee-boo neelé na̰’d.
16To gə́ yeḛ tila gə́ tila ɓəi ndá diŋgamje neelé d’wa jia gə ji dené ləa gə ji ŋganeeje gə́ dené gə́ joo lé to mbata Njesigənea̰ ndigi kajee ya. Deḛ teḛ sə dee dan dee d’ya̰ dee gir ɓee-boo’g raga#2Pi 2.7.
17Loo gə́ d’ar dee teḛ raga mba̰ ndá yeḛ gə́ kára mbuna dee’g pa pana: Aḭ gə mba kaji rɔi ɓó ɔm rəd gə́ gooi’g el ləm, aar naŋg dan ndag-mbo’g el ləm tɔ. Aḭ par gə́ dɔ mbal’g nà i a tuji ya.
18Lɔt ula dee pana: Ǝi mbai, bèe el! 19Aa oo, ma gə́ m’taa kəmi rəgm lé mbɔl dɔ boo-meekɔrjol ləi ɓa ma m’aji ne ya. Nɛ m’askəm kaḭ kaw njal dɔ mbal’g lé el, mbata banelə ndá né meeko̰ gə́ nee lé a kiŋgam kédé kam m’wəi ne. 20Aa oo, ɓee gə́ nee to dəb ba gə mba kam m’ula dɔm keneŋ ndá yee to gə́ lam ba ya. Ǝi, ya̰’m am m’aḭ gə́ keneŋ. See to gə́ lam ba el wa. Bèe ɓa m’a si ne kəmba ya.
21Ndá yeḛ ulá pana: Aa oo, ma m’ndigi səi dɔ né’g neelé ya ɓəi. Bèe ɓa ɓee gə́ i pa taree lé m’a tujee el tɔ. 22Ɔs rɔi ɓad gə mba kula dɔi keneŋ ya mbata m’askəm ra né kára el saar i a teḛ keneŋ ɓa. Gelee gə́ nee ɓa d’unda ne ri ɓee neelé lə Soar.
23Kàr uba mba̰ ɓa Lɔt andə mee ɓee’d gə́ Soar ɓəi. 24Ndá Njesigənea̰ ar pər gə kṵji pər gə́ kas ḭ dara rɔ Njesigənea̰’g ɓugu dɔ Sɔdɔm gə Gɔmɔr’g tɔ#Mat 10.15, 11.23-24, Lug 10.12, 17.29, 2Pi 2.6, Jud 7. 25Yeḛ tuji ɓee-booje neelé ləm, gə loo gə́ to gə́ ndag-loo’g lai ləm, gə dəwje lai gə́ d’isi ɓee-booje’g ləma, gə néje lai gə́ d’uba naŋg ləm tɔ. 26#Lug 17.32 Dené lə Lɔt lé ɔm rəd gə́ gogo ndá yeḛ tel to puna-kad.
27Abrakam ḭ gə ndɔ rad mba kaw loo gə́ yeḛ aar no̰ Njesigənea̰’g keneŋ kédé lé. 28Yeḛ un kəmee aa loo par gə́ Sɔdɔm gə Gɔmɔr gə loo lai gə́ to ndag-loo’g lé ndá aa oo, yeḛ oo sa pər ḭ naŋg uba ŋgɔg-ŋgɔg asəna gə sa pər mbo-boo bèe.
29Togə́bè loo gə́ Ala tuji ɓee-booje gə́ to ndag-loo’g ndá yeḛ ar mée olé dɔ Abrakam’g ɓa yeḛ ar Lɔt teḛ ne dan tuji gə́ boo gə́ yeḛ ɓugu ne ɓee-booje lé naŋg, loo gə́ Lɔt ra ɓee ləa si keneŋ kédé lé tɔ.
Lɔt gə ŋganeeje gə́ dené
30Lɔt ḭ Soar mba kaw par gə́ tar ndá yeḛ ra loo dɔ mbal’g gə ŋganeeje gə́ dené gə́ joo lé mbata yeḛ ɓəl gə mba si Soar. Yeḛ gə ŋganeeje gə́ dené gə́ joo lé deḛ ra ɓee mee bolè mbal gə́ kára bèe. 31Ŋgondər lé ula yeḛ gə́ ndɔḭ pana: Bɔ síje lé ɓuga mba̰ ndá diŋgam gə́ raŋg kára kara gə́ a ree rɔ sí’g gə goo néjiɓee lə sí lé godo loo gə́ nee’g tɔ. 32Gə́ ree, ar sí j’ar bɔ síje ai mán-nduú gə́ mḭ ndá ar sí n’toje səa ɓó gə mba kar sí yel ne kó ka bɔ síje lé.
33Deḛ d’ar bɔ deeje mán-nduú gə́ mḭ lé ai loondul’g neelé ndá ŋgondəree aw to gə bɔbeeje lé. Nɛ yeḛ neelé gər loo gə́ ŋgonee to ne səa el ləm, gə loo gə́ yeḛ ḭta aw ne el ləm tɔ. 34Bèlè lookàree, ŋgondər lé ula yeḛ gə́ ndɔḭ pana: Aa oo, tagə́nè loondul’g lé ma m’to gə bɔm ya. Maji kar sí j’aree mán-nduú gə́ mḭ lé ai loondul’g nee ya tɔɓəi ndá i lé aw to səa to ɓó gə mba kar sí yel ne kó ka bɔ síje lé.
35Togə́bè deḛ d’ar bɔ deeje mán-nduú gə́ mḭ lé ai loondul’g nee ya tɔɓəi ndá yeḛ gə́ ndɔḭ aw to səa tɔ. Nɛ yeḛ neelé gər loo gə́ ŋgonee to ne el ləm, gə loo gə́ yeḛ ḭta aw ne el ləm tɔ.
36Togə́bè ɓa ŋgalə Lɔt joo bɔr lé d’aw gə kèm lə bɔ deeje ya. 37Ŋgondər lé oji ŋgon gə́ diŋgam ndá yeḛ unda ria lə Moab, yeḛ to njekunda gin Moabje saar teḛ ɓogənè. 38Yeḛ gə́ ndɔḭ kara oji ŋgon gə́ diŋgam ya tɔ ndá yeḛ unda ria lə Ben-Ami, yeḛ lé to njekunda gin Amo̰je saar teḛ ɓogənè lé tɔ.
Currently Selected:
Gḭ-Néje 19: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
