Gḭ-Néje 17
17
Kinja tamɔd lé to nétɔji gə́ wɔji dɔ manrɔ lé
1Loo gə́ ləb Abram aḭ rɔ-jinaikara-giree-jinaikara (99) ndá Njesigənea̰ teḛ kəm Abram’g ulá pana: Ma m’to Ala gə́ Bao-siŋgamoŋ. Maji kari njaa gə gelgodo ləi nɔm’g. 2M’a kar ta manrɔ ləm tɔ mbuna sí jeḛ səi’g ləm, m’a kar ŋgakaije d’a kɔs goo na̰ goo na̰ gə́ kédé-kédé ləm tɔ.
3Abram oso naŋg bəbərə, dəb kəmee naŋg, ndá Ala ulá pana: 4Aa oo, manrɔ ləm gə́ ma man rɔm m’ari ɓa to nee: I a tel to bɔ ginkoji dəwje gə raŋg bula. 5D’a ɓari Abram gogo el ŋga, nɛ rii a to Abrakam mbata ma m’teli gə́ bɔ ginkoji dəwje bula-bula ya#Rɔm 4.17 . 6M’a kari oji ŋganje gə́ kédé-kédé, m’a kari to ginkoji dəwje ɓəd-ɓəd ləm, mbaije kara d’a kḭ məəi’g ya ləm tɔ. 7M’a kar ta manrɔ ləm tɔ mbuna sí jeḛ səi gə mbuna ŋgakaije gə́ d’a gə korè gooi gə goo ŋgaka deeje. Ta manrɔ neelé a to gə́ kédé-kédé gə no̰ mba karm m’to ne Ala ləi ləm, gə ka̰ ŋgakaije gə́ d’a gə korè gooi ləm tɔ#Lug 1.55. 8Ɓee neelé gə́ i si keneŋ asəna gə mbá bèe lé m’a kari gə́ ka̰ ŋgakaije gə́ d’a gə korè gooi, dɔ naŋg gə́ Kana̰ bura a to ka̰ dee-deḛ ya doŋgɔ doi saar-saar gə no̰ ndá m’a to gə́ Ala lə dee lé#NNk 7.5.
9Ala ula Abrakam pana: I lé i a kaa dɔ manrɔ ləm kər-kər, i gə ŋgakaije gə́ d’a gə korè gooi gə goo ŋgaka deeje. 10Ta manrɔ ləm gə́ seḭ a kaaje dəa kər-kər gə́ a to mbuna sí jeḛ səi’g ləm, gə mbuna ŋgakaije gə́ d’a gə korè gooi ləm tɔ lé ɓa to nee: Diŋgam gə́ rara kara mbuna sí’g lé d’a kinja tamɔdee#NNk 7.8, Rɔm 4.11. 11Seḭ a kinjaje tamɔd sí, yee ɓa a to nétɔji ta manrɔ gə́ to mbuna sí jeḛ səi’g. 12Ŋgon gə́ diŋgam gə́ rara kara mbuna sí’g lé loo gə́ ndəa aḭ jinaijoo ndá d’a kinja tamɔdee gə goo ŋgaka síje ya, lé to ŋgon gə́ d’ojee mee kəi’g ləi əsé to yeḛ gə́ ndogee gə lar ji dəw-dɔ-ɓee gə́ to ginkoji ləi el kara a raje səa bèe ya tɔ. 13Lé riri kara d’a kinja tamɔd yeḛ gə́ d’ojee mee kəi’g ləi ləm, gə yeḛ gə́ ndogee gə lar ləm tɔ. Togə́bè manrɔ ləm gə́ a to darɔ sí’g lé a to manrɔ gə́ to saar-saar gə no̰. 14Diŋgam gə́ lal kinja tamɔdee, gə́ deḛ d’inja tamɔdee el lé d’a karee udu bo̰ mbuna koso-dəwje’g ləa, mbata yeḛ ɔs ta manrɔ ləm ŋgərəŋ.
15Ala ula Abrakam pana: I a ɓar Sarai, dené ləi lé gə ria gə́ Sarai el ŋga, nɛ ria a to Sara ɓa. 16M’a tɔr ndum dəa’g ləm, mbɔl dəa ɓa m’a kari ne ŋgon ləm tɔ. M’a tɔr ndum dəa’g karee to ne ko̰ ginkoji dəwje gə raŋg bula, mbaije lə koso-dəwje kara d’a kḭ mée’g tɔ.
17Abrakam oso naŋg bəbərə dəb kəmee naŋg. Yeḛ kogo ndá pa mée’g pana: See diŋgam gə́ ra ləb tɔl (100) a koji ŋgon loo gə́ ra tɔɓəi wa. Sara kara ləbee aḭ rɔ-jinaikara (90) tɔ, nɛ see yeḛ a koji ŋgon ya tɔɓəi wa. 18Ndá Abrakam ula Ala pana: Wai! Maji kar Ismael si kəmba nɔḭ’g ya.
19Ala pana: Tɔgərɔ ya, Sara gə́ dené ləi lé a koji səi ŋgon ndá i a kunda ria lə Isaak. Maa̰ gə́ m’a man rɔm karee lé a to manrɔ gə́ a to saar-saar gə no̰ gə mbata lə ŋgakeaje gə́ gée’g. 20Ta ləi gə́ wɔji dɔ Ismael kara ma m’oo ya. Aa oo, m’a tɔr ndum dəa’g karee oji ŋganje bula ləm, m’a kar dee d’ɔs goo na̰ goo na̰ saar-saar ləm tɔ, yeḛ a to bɔ ŋgalə mbaije dɔg-gir-dee-joo ndá m’a karee to ginkoji dəwje gə́ boo ya tɔ. 21M’a man rɔm kar Isaak, yeḛ gə́ Sara a kojee səi mee naḭ gə́ togə́bè’g ləb gə́ gogo tɔ.
22Loo gə́ Ala ila ta gə́ yeḛ wɔji səa naŋg ɗəgərə ndá yeḛ ya̰ Abrakam ḭ aw tar. 23Abrakam wa ŋgonee gə́ diŋgam Ismael gə deḛ lai gə́ d’oji dee mee kəi’g ləa ləm, gə deḛ lai gə́ yeḛ ndogo dee gə lar ləm tɔ, diŋgamje lai mbuna njé gə́ mee kəi’g lə Abrakam ndá yeḛ aw sə dee aw inja tamɔd dee mee ndəa gə́ kára neelé gə goo ndukun gə́ Ala un aree lé tɔ. 24Abrakam ra ləb rɔ-jinaikara-giree-jinaikara (99) ɓa d’inja tamɔdee ɓəi. 25Ismael, ŋgonee gə́ diŋgam lé kara ra ləb dɔg-giree-munda ɓa d’inja tamɔdee ɓəi tɔ. 26Mee ndəa gə́ kára ba lé deḛ d’inja tamɔd Abrakam ləm, gə ka̰ ŋgonee gə́ diŋgam Ismael ləm tɔ. 27Ndá diŋgamje gə́ mee kəi’g ləa lai lé deḛ gə́ d’oji dee mee kəi’g ləa əsé deḛ gə́ ndogo deḛ gə lar kara d’inja tamɔd dee səa na̰’d tɔ.
Currently Selected:
Gḭ-Néje 17: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
