Gḭ-Néje 10

Ŋgaka ŋgalə Noe

1Aa ooje, ri ŋgaka ŋgalə Noe gə́ Sem, gə Kam gə Japet lé ɓa to nee: loo gə́ mán bélm lé godo ndá deḛ d’oji ŋgan deeje gə́ diŋgam.

2Ri ŋgalə Japet ɓa nee: Gomer, Magɔg, Madai, Jaban, Tubal, Mesek gə Tiras. 3Ŋgalə Gomer ɓa ri dee to nee: Askenaj, gə Dipat, gə Togarma. 4Ri ŋgalə Jaban ɓa nee: Elisa, Tarsis, Kitim gə Dodanim. 5Koso-dəwje lai d’ḭ gin dee-deḛ’g d’aw d’isi dɔgoré-looje’g lə ginkoji dəwje gə raŋg gə goo naŋg lə dee ləm, gə goo takɔji dee ləm, gə goo gel-bɔje lə dee ləma, gə goo ginkoji lə dee ləm tɔ.

6Ŋgalə Kam ɓa ri dee to nee: Kus, gə Misrayim, gə Put gə Kana̰. 7Ri ŋgalə Kus ɓa nee: Saba, Habila, Sabta, Raema gə Sabteka. Ri ŋgalə Raema ɓa nee: Seba gə Dedan. 8Kus oji Nimrɔd tɔ. Yeḛ neelé to njesiŋgamoŋ gə́ dɔtar dɔ naŋg nee. 9Yeḛ to njegər goso̰do̰ no̰ Njesigənea̰’g. Gelee gə́ nee ɓa deḛ pa ne pana: Asəna gə Nimrɔd, njegər goso̰do̰ no̰ Njesigənea̰’g bèe. 10Yeḛ o̰ ɓee kédé dɔ ɓeeje gə́ Babel gə Erek gə Akad gə Kalne gə́ to dɔ naŋg gə́ Sineyar. 11Asur ɓa ḭ ɓee’g neelé. Yeḛ tum gin ɓeeje gə́ ri dee lə Ninibə gə Rehobot-Hir gə Kalak 12gə Resen gə́ to mbuna Ninibə gə Kalak’d gə́ to ɓee gə́ boo yaa̰.

13Misrayim oji Ludje, gə Anamje, gə Lehabje, gə Naptuje, 14gə Patrusje, gə Kasluje gə́ Pilistije gə Kaptɔrje d’ḭ keneŋ tɔ.

15Kana̰ oji Sido̰ gə́ to ŋgondəree ləm, gə Het, 16gə́ to bao Yebusje, gə Amɔrje, gə Girgasije, 17gə Hebje, gə Arkije, gə Sinije, 18gə Arbadje, gə Semarje, gə Hamatje tɔ. Gée gə́ gogo, gel-bɔje lə Kana̰je lé sanéna̰. 19Rəw-nim-ɓee lə Kana̰je lé un kudee Sido̰ par gə́ Gerar aw saar teḛ Gaja ləm, tɔɓəi par gə́ Sɔdɔm gə Gɔmɔr, gə Adma, gə Seboyim aw njal teḛ Lesa ləm tɔ. 20Deḛ neelé ɓa to ŋgaka Kam gə goo gel-bɔje lə dee ləm, gə goo takɔji dee ləm, gə goo dɔ naŋg lə dee ləma, gə goo ginkojije lə dee ləm tɔ.

21Sem kara oji ŋganje gə́ diŋgam tɔ. Yeḛ to bɔ ŋgalə Heberje lai ləm, yeḛ to ŋgara Japetje gə́ tɔg ləm tɔ. 22Ri ŋgalə Sem ɓa nee: Elam, gə Asur, gə Arpaksad, gə Lud gə Aram. 23Ri ŋgalə Aram ɓa nee: Uts, gə Hul, gə Géter, gə Mas. 24Arpaksad oji Sela oji Heber, 25Heber oji ŋganje gə́ diŋgam joo: yeḛ gə́ kára ria lə Peleg mbata mee ndəa’g neelé deḛ kai na̰ naŋg, tɔɓəi ŋgokea̰ lé ria lə Joktan tɔ. 26Joktan oji Almodad, gə Selep, gə Hasamabet, gə Jera, 27gə Hadoram, gə Ujal, gə Dikla, 28gə Obal, gə Abimael, gə Seba, 29gə Opir, gə Habila, gə Jobab. Deḛ lai neelé to ŋgalə Joktan ya. 30Deḛ d’isi loo gə́ un kudee Mesa par gə́ Separ saar teḛ ne mbal gə́ to bər. 31Deḛ neelé to ŋgalə Sem gə goo gel-bɔje lə dee ləm, gə goo takɔji dee ləm, gə goo dɔ naŋg lə dee ləma, gə goo ginkojije lə dee ləm tɔ.

32Deḛ nja ɓa to gel-bɔje lə ŋgalə Noe, gə goo ŋgaka deeje ləm, gə goo ginkojije lə dee ləm tɔ. Loo gə́ mán bélm godo ndá ginkoji dəwje gə raŋg d’ḭ gin dee’g taa ne loo dɔ naŋg nee pəl-pəl tɔ.

Currently Selected:

Gḭ-Néje 10: SBA2015

Highlight

Copy