Tel tura Godndu 21
21
Rəwta gə́ kəm gaŋg dɔ njetɔl dəwje’g
1Ɓó lé mee ɓee gə́ Ala lə sí gə́ Njesigənea̰ ar sí gə́ né ka̰ sí ɓa d’iŋga nin dəw gə́ maree tɔlee ilá mee wala’g lal gər dəw gə́ njetɔlee lé ndá, 2ŋgatɔgje lə sí gə njégaŋ-rəwtaje lə sí lé d’a kaw keneŋ gə mba kwɔji kuruloo gə́ ḭ loo gə́ nin dəw to keneŋ lé saar kaw ne ɓee-booje gə́ to mbɔree’g lé gə mba koo. 3Loo gə́ d’iŋga ɓee-boo gə́ to mbɔr nin’g dəb lé mba̰ ndá ŋgatɔgje gə́ mee ɓee-boo’g neelé d’a kwa ma̰də maŋg gə́ ra kula gɔl kára el ɓəi ləm, gə d’ila néməməna̰ gwɔsee’g el ɓəi ləm tɔ. 4D’a kaw gə́ ma̰də maŋg lé kəm-rəw-mán’d gə́ mán yi keneŋ el saar ləm, lé neelé ndɔ el ləma, dubu né keneŋ el ləm tɔ ndá lé neelé ɓa d’a təd gina gwɔb ma̰də maŋg neelé keneŋ mee kəm-rəw-mán’g lé.
5Tɔɓəi njékinjanéməsje gə́ to Ləbije lé d’a kaw pər gə́ keneŋ mbata Ala lə sí gə́ Njesigənea̰ mbər dee mba kar dee ra né d’aree ləm, gə mba kar dee tɔr ne ndu dee dɔ loo’g gə ri Njesigənea̰ lé ləm tɔ ndá deḛ nja ɓa d’a gaŋg rəwta dɔ tamaḭje’d gə́ rara kara ləm, gə dɔ dooje’d gə́ rara gə́ dəwje d’ar na̰ lé ləm tɔ.
6Ŋgatɔgje lai gə́ mee ɓee-boo’g neelé, deḛ gə́ d’aw pər gə́ rɔ nin’g lé ndá d’a togo ji dee dɔ ma̰də maŋg gə́ deḛ təd gina gwɔbee kəm-rəw-mán’g lé. 7D’a kun ta pa pana: Ji síjeḛ ɓa j’ila ne məs neelé el ləm, kəm síjeḛ kara j’oo ne njekila məs nee naŋg lé el ləm tɔ. 8Ǝi Njesigənea̰! Ar məəi oso lemsé dɔ koso-dəwje’g ləi gə́ Israɛl gə́ i uga dɔ dee lé, ila ta məs njegelgodo neelé dɔ koso-dəwje’g ləi gə́ Israɛl lé el.
9Togə́bè ɓa seḭ a karje ta kila məs njegelgodo naŋg godo ne mbuna sí’g loo gə́ seḭ a raje né gə́ danasur kəm Njesigənea̰’g lé.
10Loo gə́ seḭ awje kaw rɔje gə njéba̰je lə sí ɓa ɓó lé Njesigənea̰ ya̰ dee ji sí’g ar sí wa deeje gə́ ɓərje, 11ɓa seḭ ooje dené gə́ ma̰də yaa̰ mbuna ɓərje’g ndá malee a ra sí kar sí ndogeeje gə́ dené lə sí. 12Bèe ɓa seḭ a kawje səa mee kəi’g lə sí ndá yeḛ a ndisa dəa ləm, a tḭja yel jiaje ləm tɔ. 13Yeḛ a kɔr kubu gə́ ula rəa’g kédé loo gə́ d’wá ne lé ləm, a si mee kəi’g lə sí as naḭ kára gə mba no̰ ndòo bɔbeeje gə kea̰je ləm tɔ. Gée gə́ gogo ndá seḭ a kawje rəa’g kaw teaaje kaareeje tel to dené lə sí ya. 14Ɓó lé yeḛ tel taa kəm sí el ŋga ndá seḭ a kya̰je kaareeje aw loo’d gə́ mée ndigi, seḭ a kasjekəm kwáje ndogoje ne lar el ləm, a raje səa to gə́ ɓər bèe el ləm tɔ mbata seḭ ooje loo rɔkul ləa mba̰.
15Ɓó lé dəw kára taa denéje joo ɓa ndigi yeḛ gə́ kára nɛ ndigi yeḛ gə́ kára el ɓa loo gə́ deḛ d’oji səa ŋganje ɓa ŋgondəree lé to ka̰ dené gə́ yeḛ ndigee el lé ndá, 16ndɔ gə́ yeḛ a gə kai ŋganeeje nénduba ndá yeḛ a kaskəm kun ŋgolə yeḛ gə́ yeḛ ndigee lé ɓa kée gə́ ŋgondəree tor yeḛ gə́ yeḛ lal ndigi kea̰je’g lé bèe el. 17Nɛ ŋgolə dené gə́ yeḛ ndigee el lé yeḛ a kée gə́ ŋgondəree ya ləm, yee a karee némajije ləa gə́ ur dɔ maree’g as loo joo ləm tɔ, mbata ŋgon neelé to doŋgɔr siŋgamoŋgee ndá né gə́ wɔji dɔ ŋgondər lé to gə́ kea̰ ya.
18Ɓó lé dəw kára ŋgonee gə́ diŋgam to gə́ mbim-oo-ta-el gə njekalta, ar loo gə́ bɔbeeje əsé kea̰je d’wɔjee kəmkàr, nɛ yeḛ oo ta lə dee el ndá, 19bɔbeeje gə kea̰je d’a kwá kaw səa rɔ ŋgatɔgje gə́ mee ɓee-boo’g ləa gə́ d’isi tarəwkɔg’d lə ɓee lé, 20deḛ d’a kula ŋgatɔgje gə́ mee ɓee-boo’g ləa neelé pana: Aa ooje, ŋgon sí lé to mbim-oo-ta-el gə njekalta gə́ oo ta lə sí el ləm, gə to dəw-nésɔ ləma, gə dəw-kido ləm tɔ. 21Bèe ɓa koso-dəwje lai gə́ mee ɓee-boo’g ləa lé d’a tilá gə kɔri-ər tɔlee. Seḭ a raje togə́bè mba kɔrje ne né gə́ majel mbuna sí’g gə mba kar Israɛlje lai d’oo ndá d’a ɓəl ne tɔ. 22Ɓó lé deḛ tɔl dəw gə́ ra kaiya gə́ as yoo ɓa ɗaree kaar kag’d ndá, 23a nai kaar kag’d loondul’g saar kar loo àr dɔ’g el, nɛ seḭ a dubeeje mee ndəa gən ya mbata yeḛ gə́ deḛ ɗaree lé to né gə́ ndɔl wa dəa kəm Njesigənea̰’g ndá maji kar sí arje ɓee gə́ Ala lə sí gə́ Njesigənea̰ ar sí gə́ nédɔji lə sí lé tel to gə́ né gə́ mina̰ el .
Currently Selected:
Tel tura Godndu 21: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
