Loo gə́ killa rea kəm Daniel’g 11
11
1Mee ləb ko̰ɓee gə́ dɔtar lə Darius gə́ to Medə lé ma ya m’nai rəa’g mba la səa ləm, mba gədee ləm tɔ. 2Ɓasinè m’a gə kar kəmi inja dɔ kankəmta’g ya.
Rɔ gə́ a to mbuna mbaije gə́ dɔgel gə dɔkɔl’g lé
Aa oo, mbaije gə́ Persə munda d’a kḭ taa tor na̰ munda ya ɓəi. Yeḛ gə́ njekɔm dee’g sɔ lé a mbo̰ nébaoje kar dee d’ur dɔ ka̰ dee-deḛ lai. Loo gə́ mbɔl dɔ nébaoje ləa lé siŋgá a to ne yaa̰ ndá yeḛ a sula deḛ lai kar dee d’ɔm səa na̰’d mba rɔ ne gə ɓeeko̰ lə Grekje. 3Nɛ mbai gə́ to njesiŋgamoŋ a kḭ ndá yeḛ a dum dɔ loo gə boo-siŋgamoŋ ləm, yeḛ a ra né to gə́ mée ndigi ləm tɔ. 4Loo gə́ yeḛ a kḭ mba̰ ndá d’a təd siŋga ɓeeko̰ ləa rém-rém kunda kəmee dana kai kwɔji ne dɔ dɔkum naŋg gə́ sɔ. D’a kaiyee kar ŋgakeaje el ləm, siŋgá a kas gə yee gə́ kédé lé el ləm tɔ. Mbata d’a kunda kəm ɓeeko̰ ləa dana gaŋg ndá yee a tel to ka̰ njé gə́ raŋg ɓó ka̰ dee-deḛ el.
5Mbai gə́ par gə́ dɔkɔl lé a tel to njesiŋgamoŋ. Nɛ siŋga dəw kára mbuna ŋgan-mbaije’g ləa a kur dɔ kea̰-yeḛ’g ndá yeḛ a dum dɔ loo. Dum dɔ loo ləa lé siŋgá a to yaa̰. 6Loo gə́ ləbje gə́ na̰je dəs mba̰ ndá d’a kɔm na̰’d tɔɓəi ŋgon gə́ dené lə mbai gə́ dɔkɔl a ree rɔ mbai gə́ dɔgel’g gə mba tel kɔm ta lə dee na̰’d. Nɛ siŋgamoŋ lə jia lé a rəm ndá mbai lé a kaar njaŋg el ləm, siŋgá kara a rəm ləm tɔ. Ŋgon gə́ dené lé d’a kya̰ gée na̰’d gə deḛ gə́ ree səa ləm, gə bɔbeeje ləma, gə yeḛ gə́ njegədee mee ndəaje’g neelé ləm tɔ. 7Kag gə́ uba dɔ ŋgira’d gə́ idi lé a taa toree. Yeḛ a kɔr rɔ ree rɔ gə bao-rɔje ləm, yeḛ a kandə mee kəi-kaar-kɔgərɔje’g lə mbai gə́ dɔgel ləm tɔ ndá yeḛ a rɔ sə dee to gə́ mée ndigi dum dee ne. 8Yeḛ a kodo magəje lə dee ləm, gə néndajije lə dee gə́ léḛ gə larndul ləma, gə némajije lə dee gə́ ra gə larnda gə larlɔr ləm tɔ ndá a kaw ne sə dee Ejiptə gə́ nébanrɔ. Tɔɓəi mee ləbje gə́ na̰je yeḛ a si əw gə mbai gə́ dɔgel lé. 9Mbai neelé a kɔr rɔ kaw rɔ gə ɓeeko̰ lə mbai gə́ dɔkɔl ndá yeḛ a tel ree mee ɓee’g ləa gogo.
10Ŋganeeje d’a kwa dɔ gɔl rɔ ləm, d’a mbo̰ koso-njérɔje bula ləm tɔ. Yeḛ gə́ kára mbuna dee’g a kaw kəmee gə́ kédé taa loo asəna gə kəm-rəw-mán gə́ ula taa loo pəl-pəl bèe ləm, a ruba pɔ-pɔ ləma, a tel rəm ləm tɔ. D’a rɔ kəm dee gə́ kédé-kédé saar teḛ ne kəi-kaar-kɔgərɔ’g lə mbai gə́ dɔkɔl. 11Mee mbai gə́ dɔkɔl a kḭ səa pu ləm, yeḛ a teḛ kaw rɔ gə mbai gə́ dɔgel lé ləm tɔ. Yeḛ a kula ta meḛ koso-njérɔje’g ndá kudu-njérɔje lə mbai gə́ dɔgel lé d’a koso jia’g. 12Koso-njérɔje neelé d’a ti rɔ dee ndá mbai lé a kəsta ti ne rəa tɔ. Yeḛ a kar koso-dəwje gə́ dum tura lé d’wəi ne ya nɛ yeḛ a kun baŋga el. 13Mbata mbai gə́ dɔgel a kḭ tel mbo̰ koso-njérɔje bula unda njé gə́ kédé, tɔɓəi loo gə́ ndɔje gə́ na̰je gə ləbje gə́ na̰je dəs mba̰ ndá yeḛ a kɔr rɔ kaw gə boo-njérɔje neelé ləm, gə boo-nébaoje ləm tɔ mba kaw rɔ ne. 14Mee ndəa’g neelé njé gə́ na̰je bula d’a kḭ rɔ gə mbai gə́ dɔkɔl. Tɔɓəi dəwje gə́ njéra né kərm-kərmje mbuna dəwje’g ləi d’a kḭ kɔs ta rəw mba kar ta némḭdi lé aw ne lée’g béréré nɛ d’a teḛ ne kɔr el. 15Mbai gə́ dɔgel lé a kaw kəmee gə́ kédé ləm, yeḛ a kuba dɔndalje ləma, ɓee-booje gə́ gə siŋga dee kara yeḛ a taa dee ləm tɔ. Kudu njérɔje gə́ dɔkɔl gə bao-rɔje lə mbai lé d’a kaar kɔgərɔ koma̰ ne səa el ləm, siŋga dee a kaskəm kar dee d’aar gəs nea̰’g el ləm tɔ. 16Yeḛ gə́ a kɔr rɔ kaw rɔ səa lé a ra to gə́ mee ndigi ya ndá dəw kára kara siŋgá a kas mba kaar gəs nea̰’g el. Yeḛ a kaar naŋg mee ɓee gə́ maji dum ɓeeje gə́ raŋg ndá né gə́ rara gə́ a koso jia’g lé yeḛ a tujee pugudu ya. 17Yeḛ a kwɔji mba ree gə nésiŋgamoŋ lə ɓeeko̰ ləa lai ləm, gə mba gɔl ta kɔm na̰’d kisi ne gə meelɔm gə mbai gə́ dɔkɔl ləm tɔ. Tɔɓəi yeḛ a karee ŋgonee gə́ dené gə́ dené ləa mba kar tuji-boo oso ne dəa’g. Nɛ né neelé a to el ləm, a teḛkɔr el ləm tɔ. 18Yeḛ a tel kəmee par gə́ dɔgoré-looje’g ləm, a taa dee bula ləm tɔ. Nɛ mbai kára a kunda ŋgaŋ rɔkul gə́ yeḛ wɔji-kwɔji kila dəa’g lé ndá a karee tel oso dəa-yeḛ’g ya. 19Gée gə́ gogo, yeḛ a tel kəmee par gə́ kəi-kaar-kɔgərɔje gə́ mee ɓee’g ləa. Gɔlee a kunda ndolé karee oso ndá dəw a kiŋgá gogo el ŋga. 20Yeḛ gə́ a taa toree a kar njetaa négədɓee kára aw mee dəb ɓeeko̰ gə́ maji dum mareeje’g, nɛ mee ndɔje gə́ bula lam ba ya mbai neelé a kiŋga tuji ndá tuji neelé gelee a to oŋg el ləm, əsé rɔ el ləm tɔ.
21Dəw gə́ gə mḭdé ba ya a kḭ taa toree lal kar dee d’ula mbai dəa’g. Yeḛ a teḛ kəm dee dan meelɔm’g ndá ta gə́ rii gə́ təa’g lé yeḛ a taa ne ɓeeko̰ ya. 22Kudu-njérɔje gə́ d’a taa loo asəna gə kəm-rəw-mán bèe lé d’a kigi yɔm nea̰’g ləm, d’a tuji pugudu gə mbai gə́ njegel manrɔ lə dee lé kara na̰’d ləm tɔ. 23Loo gə́ d’a kɔm səa na̰’d sad mba̰ ndá gée gə́ gogo yeḛ a su kəm dee su-su. Yeḛ a kɔr rɔ kaw rɔ sə dee ndá yeḛ a dum ne dɔ dee gə dəwje gə́ jebəre ba ya. 24Ndɔ gə́ d’isi dan meelɔm’g lé yeḛ a kaw dɔ naŋg looje’d gə́ maji dum mar deeje mee dəb ɓeeko̰’g. Yeḛ a ra né gə́ bɔbeeje-je ra el ləm, keaje-je kara ra kédé el ləm tɔ. Yeḛ a kai dəwje nébanrɔje ləm, gə néje gə́ yeḛ taa gə siŋgamoŋ ləma, gə nébaoje ləm tɔ. Tɔɓəi yeḛ a kwɔji mba taa kəi-kaar-kɔgərɔje ndá kuree a kəw waga ba ya.
25Yeḛ a kɔr no̰ bao-rɔje gə siŋgamoŋ gə kwa mee kɔgərɔ mba rɔ ne gə mbai gə́ dɔkɔl. Mbai gə́ dɔkɔl lé a kaw gə bao-rɔje ləa gə́ bula digi-digi ləm, siŋga dee to kɔgərɔ-kɔgərɔ ləm tɔ mba rɔ ne səa nɛ yeḛ a kaar nea̰’g gəs el mbata d’a la̰ji tor gosɔyèr meḛ dee’g dəa’g. 26Gel tuji ləa lé a kḭ rɔ deḛ gə́ d’usɔ səa né na̰’d ta ka-nésɔ’g ləa. Njérɔje ləa lé d’a sanéna̰ kad-kad tɔɓəi yoo-dəwje a to naŋg rib-rib. 27Mbaije gə́ joo lé d’a la̰ji tor rəw né gə́ majel meḛ dee’g mba ra gə na̰, tɔɓəi ta ka-nésɔ’d gə́ kára ba ya d’a pa taŋgɔm keneŋ kar na̰. Nɛ né neelé a teḛkɔr el mbata rudee a kun el saar ndəa gə́ d’wɔji ɓa. 28Yeḛ a tel kaw mee ɓee’g ləa gə nébaoje gə́ ur kugu. Mée a mbad manrɔ gə́ to gə kəmee ndá yeḛ a koma̰ ne səa ɓa a tel kaw mee ɓee’g ləa ɓəi.
29Ndəa gə́ d’wɔji lé as lée’g mba̰ ndá yeḛ a tel kɔr rɔ kaw rɔ gə ɓee gə́ dɔkɔl. Nɛ telee gə́ gogo neelé néje a teḛ to gə́ kédé lé el. 30Njé gə́ Kitim d’a ree gə bato-rɔje mba rɔ ne səa ndá mée a kila kas karee rəm gə gée. Tɔɓəi mée a kḭ səa pu dɔ manrɔ gə́ to gə kəmee’g ndá yeḛ a tel rɔ səa gogo ɓəi. Tel ləa gə́ gogo lé yeḛ a kɔm na̰’d sad gə deḛ gə́ d’uba manrɔ gə́ to gə kəmee d’ya̰ lé. 31Kudu-njérɔje gə́ yeḛ a kula dee lé d’a kula sul dɔ loo gə́ to gə kəmee’g ləm, gə dɔ kəi-kaar-kɔgərɔ’g ləm tɔ. D’a kɔg dee dɔ nékinjanéməsje gə́ ra ta-ta ləm, d’a kunda né gə́ mina̰ gə́ ka̰ tuji ne loo lé tar ləm tɔ . 32Deḛ gə́ ra né gə́ yèr d’uba ne goo manrɔ d’ya̰ lé yeḛ a su kəm dee gə ta gə́ rii. Nɛ dəwje gə́ gər ndaa Ala lə dee lé d’a kaar ne dɔ gɔl dee’g njaŋg ləm, 33deḛ gə́ kəmkàr lə dee ur dɔ ka̰ mar deeje lé kara d’a ndoo koso-dəwje ta kəmkàrje ləm tɔ. Nɛ njé gə́ na̰je d’a kwəi yoo-kiambas ləm, gə yoo-ndo̰ pər ləm, d’a kwa dee ɓər kaw sə dee raŋg ləma, d’a taa néje lə dee kɔg ləm tɔ. 34Mee ndəaje gə́ d’a gə kwəi bèe neelé d’a la sə dee lam ba, tɔɓəi njé gə́ na̰je bula bəl d’a kɔm sə dee na̰’d gə ta gə́ ta dee’g ba. 35Njékəmkàrje gə́ na̰je d’a koso ne gə mba naa ne meḛ dee ləm, kar dee d’àr ne ŋgad-ŋgad ləma, kar meḛ dee ndá ne londoŋ ləm tɔ saar ndəa gə́ rudee a kun ɗiao mbata né neelé a teḛ mee ndəa gə́ d’wɔji lé ɓa.
36Mbai lé a ra né to gə́ mée ndigi. Yeḛ a ti rəa ləm, a kɔs gaji rəa koo ne rəa gə́ njekur dɔ magəje lai ləm tɔ ndá yeḛ a pata néje gə́ dum kəm loo kɔs ne ta lə Ala gə́ njekur dɔ magəje lé rəw. Néreaje gə́ togə́bè lé a teḛ ne kɔr saar kar oŋgee wəi bém, saar kar né gə́ d’wɔji-kwɔji ra lé a kaw ne lée’g béréré ya . 37Yeḛ a ndəb gə mbata lə magəje lə bɔbeeje-je el ləm, əsé gə mbata lə magəpole gə́ lel denéje el ləm tɔ. Yeḛ a ndəb gə mbata lə magə kára kara el mbata yeḛ a kɔs gaji rəa koo ne rəa gə́ njekur dɔ dee’g lai ya. 38Nɛ lé bèe kara yeḛ a kila riɓar dɔ magə’d gə́ njekaa dɔ kəi-kaar-kɔgərɔje gə́ d’uree tar dɔ né’g lé. Ala neelé gə́ bɔbeeje-je gər el lé yeḛ a polé gə larlɔr gə larnda gə jərje gə néje gə́ gad dee to yaa̰ tɔ. 39Yeḛ a ɓar ri magə gə́ dɔ ɓee gə́ raŋg ɓa mba kɔr ne rɔ kaw rɔ ne gə kəi-kaar-kɔgərɔje. Deḛ gə́ ndigi səa lé yeḛ a kila riɓarje ɓəd-ɓəd dɔ dee’g ləm, yeḛ a kar dee d’o̰ ɓee dɔ dəwje’g bula ləma, yeḛ a kai dee dɔ naŋgje gə́ nédɔji lə dee ləm tɔ.
40Ndəa gə́ rudee a kun ɗiao lé mbai gə́ dɔkɔl a kubá naŋg bus rɔ səa. Tɔɓəi mbai gə́ dɔgel a ɓugu dəa’g asəna gə lel-boo gə pusu-rɔje gə njérɔ gə kundaje ləm, gə bato-rɔje bula ləm tɔ. Yeḛ a kaw kəmee gə́ kédé-kédé asəna gə kəm-rəw-mán gə́ ruba pɔ-pɔ bèe. 41Yeḛ a kandə mee ɓee gə́ maji dum mareeje’g ndá njé gə́ na̰je bula d’a tuji. Nɛ Edɔmje gə Moabje gə deḛ gə́ to Amo̰je gə́ na̰je gə́ d’ur dɔ mar deeje lé d’a kunda jia ti. 42Yeḛ a kula jia ndiŋ dum ne dɔ ɓeeje ɓəd-ɓəd ndá ɓee gə́ Ejiptə a teḛ ta’g el tɔ. 43Yeḛ a taa nébaoje gə́ ra gə larlɔr gə larnda ləm, gə néje lai gə́ gad dee to yaa̰ gə́ to ɓee gə́ Ejiptə ləm tɔ kar dee to kea̰-yeḛ. Libije gə Etiopije d’a ndɔm na̰ gée’g tɔ. 44Nɛ taje gə́ d’ḭ ne bər gə dɔgel lé a koso mbia’g karee ɓəl yaa̰ ndá oŋg a kḭ səa pu karee ḭ aw gə mba tuji koso-dəwje kar dee d’udu guduru. 45Yeḛ a la kəi-kubuje gə́ ka̰ kəi-mbai ləa mbuna baa-booje’g par gə́ mbɔr mbal gə́ to gə kəmee gə́ maji dum lé. Togə́bè ɓa yeḛ a teḛ ne rudu ndɔ’g ləa kar dəw kára kara la səa el tɔ.
Currently Selected:
Loo gə́ killa rea kəm Daniel’g 11: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.