Njé gə́ Kolosə 3
3
Kɔm na̰’d gə Kristi ɓa gə́ kankəm né
1Bèe ndá ɓó lé seḭ undaje loo teḛje dan njé gə́ d’wəi’g gə Kristi na̰’d ndá saŋgje néje gə́ wɔji dɔ ɓee gə́ tar loo gə́ Kristi sí keneŋ dɔ jikɔl Ala’g lé . 2Néje gə́ wɔji dɔ ɓee gə́ tar ɓa ulaje rɔ sí keneŋ mbiriri ɓó néje gə́ naŋg nee ɓa a kulaje rɔ sí keneŋ mbiriri el. 3Mbata seḭ wəije mba̰ ndá kɔm gə́ seḭ ɔmje na̰’d gə Kristi lé seḭ ulaje kəmə lə sí rɔ Ala’g pḛ́. 4Loo gə́ Kristi gə́ to gə́ kəmə lə sí a kila rəa ndá seḭ a kilaje rɔ sí səa na̰’d dan rɔnduba’g ləa tɔ.
5Bèe ndá arje mal néje gə́ ra sí gə́ wɔji dɔ naŋg neelé wəi mburug rɔ sí’g, yee ɓa to mɔdkaiya ləm, gə kəmnda ləm, gə mal néje gə́ ula pər meḛ sí’g ləma, gə mwəiyoolar gə́ to gə́ magəpole lə dəwje lé ləm tɔ. 6Néje nee ɓa gə́ né gə́ teggin oŋg gə́ Ala ɔm dɔ njékaltaje’g lé tɔ. 7Kédé lé seḭje kara seḭ njaaje mbuna deḛje’g neelé loo gə́ seḭ síje ne dan kaiyaje’g neelé ɓəi.
8Nɛ ɓasinè lé maji kar sí undaje néje lai neelé ɓad: Oŋg ləm, gə ba̰ ta ləm, gə meeyèr ləm, gə ndá ta gə́ təd ləma, gə ta gə́ ərm gə́ rara kara gə́ askəm teḛ ta sí’g ləm tɔ. 9Ulaje na̰ taŋgɔm mbuna sí’g el mbata dəw gə́ ləw gə néreaje lé seḭ ɔrje jo̰gee ubaje ya̰je mba̰ , 10ndá dəw gə́ sigi ɓa seḭ ulaje rɔ sí’g ya. Dəw gə́ sigi lé négər ləa ḭ mbaḭ-mbaḭ gə́ kédé-kédé aree tel to tana gə njekṵdá . 11Grek əsé Jib godo nee ləm, njekḭja tamɔd əsé yeḛ gə́ lal kinja godo ləm, dəw-dɔ-ɓee əsé dəw walá godo ləma, ɓər əsé ŋgonkoji godo ləm tɔ, nɛ Kristi ɓa gə́ dəw kára ba dan dee’g lai.
12Bèe ndá to gə́ seḭ toje dəwje gə́ to gə kəmee gə́ m’unda sí dan kəm’g ləm, Ala lé nja ɔr sí gə kəmee ləm tɔ ndá maji kar sí arje meekoso lemsé ləm, gə meemaji ləm, gə kosokul ləm, gə kaw yururu ləma, gə meekila ləm tɔ lé to ne néje gə́ seḭ dolèje ne rɔ sí yul-yul ya . 13Ilaje meḛ sí po̰ dɔ na̰’g tɔɓəi ɓó lé ta oso mbuna sí’g ndá arje meḛ sí ti mbidi dɔ na̰’g tɔ. To gə́ Kristi ar mée ti mbidi dɔ sí’g lé seḭje kara raje gə na̰ togə́bè tɔ . 14Né gə́ ur dɔ néje’g lai lé ulaje rɔ sí dan meenoji’g, yee ɓa to kúla gə́ tuga sí na̰’d keg-keg. 15Maji kar meelɔm lə Kristi taa meḛ sí pəl-pəl, yee ɓa yeḛ ɓar sí ne mba kar sí toje kubururɔ dəw gə́ kára ba. Maji ra Ala oiyo tɔ. 16Maji kar ta lə Kristi gə́ to boo-nébao lé uru kəi meḛ sí’g. Ndooje na̰ ləm, ndəjije na̰ ləm tɔ gə kəmkàree lé gə pakɔsje ləm, gə pa pidije ləma, gə pa kula rɔnduba gə́ wɔji dɔ ndil sí ləm tɔ. Ɔsje pa gə meḛ sí bura arje Ala reaje ne oiyo mbata noji ləa gə́ rusu meḛ sí njḭ-njḭ lé tɔ . 17Né gə́ rara gə́ seḭ raje lé tapa sí əsé néra sí kara raje gə ri Mbaidɔmbaije Jeju, raje ne Ala Bɔ-dəwje oiyo gə mbəa-yeḛ nja tɔ.
Nékəmra mbuna na̰’d lé
18Denéje, osoje kul rɔ ŋgaw síje’g, yee ɓa gə́ nékəmra gin Mbaidɔmbaije’g ya .
19Diŋgamje, undaje denéje lə sí dan kəm sí’g ɓó arje kəm sí mas mbidi-mbidi dɔ dee’g el .
20Ŋganje, né gə́ rara kara ilaje ne ŋgonkoji dɔ njékoji síje’g mbata yee ɓa gə́ né gə́ taa kəm Mbaidɔmbaije ya .
21Bɔ-ŋganje, aaje kəm ŋgan síje gə ta el nà meḛ dee a kila ne kas bilim .
22Seḭ kuraje lé né gə́ rara kara ilaje ŋgonkoji dɔ ɓée síje gə́ dɔ naŋg nee, seḭ a raje togə́bè gə mba kəm dee goo kára ba əsé gə mba taa ne kəm dəwje el nɛ seḭ a raje gə meenda ɓəlje ne Mbaidɔmbaije ya . 23Kula gə́ rara gə́ seḭ raje lé raje gə meḛ sí gə́ maji mbata lə Mbaidɔmbaije ɓó gə mba kar dəwje gə kar dee el, 24mbata seḭ gərje gao, seḭ a kiŋgaje nénduba ji Mbaidɔmbaije’g gə́ nékoga dɔ ji sí lé. Raje né arje Kristi Mbaidɔmbaije lé tɔ. 25Mbata yeḛ gə́ ra né gə́ lal najee ndá bea̰ a kɔs təa’g bɔsɔrɔ, ɓó d’a kɔr ne kəm dəw kára el!
Currently Selected:
Njé gə́ Kolosə 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
