Néra Njékaḭkulaje 3
3
Kɔr rɔko̰ rɔ njemədə’g
1Piɛrə gə Ja̰ d’isi d’aw na̰’d mee kəi-Ala’g, to kàr ra tamaji gə́ kàr tel rəa gə mbɔree lé. 2Deḛ d’iŋga diŋgam kára gə́ d’ojee gə́ gudugur. Gə ndɔje kára-kára lai lé d’unee d’undá ta kəi-Ala’g, to takəi gə́ d’unda ria lə Kura Yaa̰ gə mba karee kwɔi né deḛ gə́ d’isi d’andə kəi-Ala’g gə kəmndoo. 3Dəw neelé aa loo oo Piɛrə gə Ja̰ gə́ d’isi d’andə mee kəi’g neelé ndá yeḛ kwɔi dee né gə kəmndoo. 4Piɛrə gə Ja̰ d’ée ndá d’ula pana: Oré kəmi dɔ sí’g ndəŋ. 5Yeḛ orè kəmee dɔ dee’g ndəŋ mbata yeḛ ə̰ji ta mée’g pana: D’a kar neḛ né. 6Yen ŋga Piɛrə ulá pana: Ma lé larnda əsé larlɔr godo jim’g nɛ né gə́ to jim’g lé to né gə́ m’a gə kari ya. Ma m’ulai gə ri Jeju Kristi gə́ Najaret, uba naŋg ḭta njaa!
7Yen ŋga Piɛrə wa jikɔlee unee uree tar. Léegəneeya gɔl diŋgam neelé gə kwojḭgon gɔlee ŋgəŋ. 8Yeḛ uba naŋg ja̰gjaŋ ḭta ndá yeḛ ɔd ɔs njaa. Yeḛ andə sə dee na̰’d mee kəi-Ala’g ləm, yeḛ njaa ləm, yeḛ tal jagəra-jagəra ləma, yeḛ pidi Ala ləm tɔ. 9Dəwje lai d’ée loo njaa’g ləa ləm, gə loo pidi Ala’g ləa ləm tɔ. 10Deḛ gəree gə́ yeḛ gə́ si ta kəi-Ala’g gə́ d’unda ria lə Kura Yaa̰ kwɔi dəwje né gə kəmndoo lé ndá kaar dee wa dee paḭ ar ta igi dee sel dɔ né gə́ teḛ dəa’g neelé.
Mber gə́ Piɛrə ila no̰ boo-dəwje’g
11Loo gə́ yeḛ ya̰ goo Piɛrə gə Ja̰ el ndá kaar dəwje lai lé wa dee paḭ-paḭ ar dee d’aḭ yi-i-i gə́ gel jala’g lə Salomo̰. 12Piɛrə oo togə́bè ndá yeḛ ula koso-dəwje neelé pana: Seḭ dəwje gə́ Israɛl, see gelee ban ɓa kaar sí wa sí paḭ dɔ né gə́ teḛ togə́bè’g lé wa. See gelee ban ɓa seḭ oreeje kəm sí dɔ síjeḛ’g ya ndəŋ, to gə́ lə ne gə́ jeḛ nja n’ra gə siŋgamoŋ lə sí əsé meenda lə sí ɓa j’ar dəw neelé njaa ne bèe wa. 13Ala lə Abrakam gə Isaak gə Jakob, Ala lə ka síjeḛ lé ɓa ula rɔnduba dɔ kura’g ləa Jeju, yeḛ gə́ seḭ uláje ji Pilatə’g ləm, seḭ mbadeeje ləm tɔ nɛ yeḛ lé wɔji-kwɔji kilá tar . 14Seḭ nja seḭ mbadje yeḛ gə́ to Njemeenda ləm, gə Njemeekarabasur ləm tɔ nɛ seḭ dəjije njetɔl dəw mareeje ɓa gə mba kar dee d’ilá tar d’ar sí . 15Seḭ tɔlje Mbai gə́ njekar dəwje d’isi gə kəmə lé yeḛ gə́ Ala aree unda loo teḛ dan njé gə́ d’wəi’g, jeḛ lai n’toje njékoogootareeje ya. 16Dəw neelé gə́ seḭ éeje ləm, gə seḭ gəreeje ləm tɔ lé ri Jeju gə́ yeḛ ɔm mée dɔ’g lé ɓa gɔlee ŋgəŋ ne, meekun gə́ yeḛ un ar Jeju lé rəa to ne kari ba péd-péd kəm sí’g lai.
17Ŋgakɔmje, ɓasinè ma m’gər gao, né gə́ seḭ raje lé seḭ raje dɔ mbə’g ləm, mbaije lə sí kara deḛ ra dɔ mbə’g ya ləm tɔ. 18Nɛ yee ɓa Ala nja ar ta gə́ njéteggintaje lai pa kédé pana: Némeeko̰ a gə ndər dɔ Kristi’g lə neḛ lé aw ne lée’g béréré ya. 19Bèe ndá waje ndòo rɔ sí dɔ kaiya’g lə sí ɔsje badm telje mba kar kaiya lə sí ɔr ndɔs-ndɔs ləm, 20mba kar sí sije ne dan loo gə́ kul’g gə́ ḭ rɔ Mbaidɔmbaije’g ləma, mba karee ula Jeju Kristi yeḛ gə́ yeḛ ulá wɔji ne dɔ sí lé rɔ sí’g ləm tɔ. 21Yeḛ neelé a ra ɓee dara saar ndɔ gə́ d’a tel gɔl néje lai lée’g gogo gə goo ta gə́ Ala ula ta njéteggintaje’g ləa gə́ to gə kəmee lé. 22Moyis pana: Mbaidɔmbaije Ala lə sí lé a kɔr njetegginta ləa to gə́ ma bèe mbuna ŋgako̰ síje’g. Seḭ a kooje taje lai gə́ yeḛ a kula sí gə mba raje née ya . 23Ndá nana ɓa gə́ a koo ta ta njetegginta’g neelé el ndá d’a kɔree mbuna koso-dəwje’g lé ya . 24Ta neelé njéteggintaje lai gə́ d’orè na̰ goo Samel’g lé deḛ pa taree d’ila ne mber ta lə ndɔje neelé tɔ. 25Seḭ lé seḭ toje ŋgalə njéteggintaje gə manrɔ gə́ Ala man ne rəa ar ka síjeḛ lé wɔji dɔ sí tɔ, to gə́ yeḛ ula Abrakam pana: Ŋgaka dəwje lai dɔ naŋg lé d’a kiŋga dɔkaisəgərə rɔ ŋgakaije’g ya . 26Ala ɔr kura ləa aree aw rɔ sí-seḭ’g ya dɔtar mba karee tɔr ndia dɔ sí’g mba kar nana kara mbuna sí’g sa rəa dɔ néra gə́ ndɔji pɔdɔdɔ’g ya.
Currently Selected:
Néra Njékaḭkulaje 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
