2 Timote 4
4
Pool ɔr suna rəw ləa ya
1Ma m’tɔgi no̰ Ala’g ləm, gə no̰ Jeju Kristi’g gə́ a gə gaŋg rəwta dɔ deḛ gə́ d’isi kəmba gə deḛ gə́ d’wəi’g ləma, gə ri yeḛ gə́ a gə tel ree gə ɓeeko̰ ləa ləm tɔ, 2Ila mbər Tagə́maji lé ula ne ta meḛ dee’g loo gə́ kul’g ləm, gə loo gə́ nuŋga’g ləm tɔ, ndaŋg dee ləm, gə ndəji dee ləma, gə gɔl dee gə ndu noji ndoo dee ne ləm tɔ ɓó ya̰ gée lal ra ndɔ kára el. 3Mbata ndəa gə́ kàree a gə teḛ lé dəwje d’a taa ta ndoo gə́ gəd lé el. Nɛ mbi dee a ndo̰ dee səgə-səgə mba koo ne ta gə́ rii ndá d’a mbo̰ ne njéndoo dee néje gə́ d’a bula yaa̰ dɔ dee’g to gə́ meḛ dee-deḛ nja wɔji. 4D’a kun mbi dee rəw dɔ kankəmta’g, nɛ d’a kur mbi dee njor gə́ dɔ sutaje’g. 5Nɛ i lé unda kəmkàr dɔ rɔi’g gə mba néje lai ləm, ai məəi sam-sam dan némeekonje’g ləm, ra kula gə́ wɔji dɔ kila mber Tagə́maji lé ləma, ɔr suna kula ləi lai lé ləm tɔ.
6Ma lé m’to asəna gə nékai gə́ ka̰ tər naŋg mba̰ ar ndɔ kaw ləm nai dəb ba ŋga. 7Ma m’rɔ rɔ maji ləm, ma m’ɔr suna rəw ləm njal ləma, m’aar dɔ meekun’g kɔgərɔ ləm tɔ. 8Un gelee ɓogənè saar lé dɔgugu ka̰ meekarabasur gə mba kam to gən ya. Mbaidɔmbaije gə́ njegaŋgta gə goo rəbee lé yeḛ nja ɓa a karm mee ndəa’g neelé, a karm-ma ɓa gə karm el nɛ a kar deḛ lai gə́ to yée d’unda meḛ dee dɔ ndɔ ree’g ləa pèrèrè lé tɔ.
Rudu taje
9Ɔs rɔi ɓad ree iŋgam nà, 10Demas lé ubam ya̰’m mba̰ mbata néje gə́ naŋg nee ɓa wa mée aree ḭ əd Tesalonik mba̰. Kresens əd Galati ləm, Titə kara əd Dalmati sèn ləm tɔ . 11Lugu nja gə karee ba ɓa nai səm. Bèe ndá ɔr Mark aree ree səi na̰’d mbata yeḛ ɓa orəm més loo-kula’g ləm . 12M’a m’ula Tisik m’aree aw Epesə . 13Loo gə́ i a gə ree ndá un kubu kul ləm gə́ m’ya̰ Troas ɓee lə Karpus ləm, odo maktubje ləm ləma, gə ndarje gə́ ka̰ ndaŋg maktub dɔ’g kara ləm tɔ .
14Aleja̰drə gə́ to gə́ njekɔr lé ra səm majel yaa̰. Mbaidɔmbaije a kogá gə goo nérea ya . 15I nja kara unda kəmkàr dɔ rɔi’g mbata ləa, yeḛ to njekɔs kaar sí dɔ taje’g lə sí.
16Loo-gaŋg-rəwta gə́ m’aar m’ɔr ta keneŋ dɔtar mba taa ne dɔm lé dəw kára gə́ njekoso ginm’g godo. Deḛ lai d’ubam d’ya̰’m keneŋ ya. Maji kar taree neelé wa dɔ dee el. 17Mbaidɔmbaije nja la səm ləm, yeḛ to dərgelm ləm tɔ mba kar tagə́maji lé ɓar ne mḭ tam’g ləm, mba kar njépole-magəje lai d’oo taree ləm tɔ. Yeḛ am m’wa dɔm ta toboḭ’g m’bɔr. 18Mbaidɔmbaije ɓa a kɔrm dan néje gə́ majel gə́ gə ria-ria lai ləm, a kajim mba karm m’isi ne mee ɓeeko̰’g ləa gə́ dara ləm tɔ. Yeḛ nja ɓa maji kula rɔnduba dəa’g gə ləbee-ləbee saar-saar gə no̰. Amen!
Lapia gə́ rudu
19Ra Priska gə Akilas gə njémeekəije lə Onesipɔrə lapia am . 20Erastə lé nai Korintə ləm, m’ya̰ Tropim Milet mbata yeḛ oso gə rɔko̰ keneŋ ləm tɔ . 21Ɔs rɔi ɓad mba ree kiŋgam ɓad ɓa kar naḭ kul teḛ ɓəi.
Eubulus, gə Pudens, gə Linus gə Klodia gə ŋgako̰ síje lai rai lapia.
22Maji kar Mbaidɔmbaije nai gə ndili. Maji kar sí sije dan noji’g bèdèg.
Currently Selected:
2 Timote 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.